مفتاح العربية ضاع والريموت
مفتاح العربية ضاع من سايس الجراج وكمان الريموت ، المشكله كمان ان كنت عامل اللوك للشنطة يعنى كمان الشنطة مكنتش عارف افتحها بالمفتاح النبيتى .
طبعاً انا خفت ليكون حد سرقه من السايس ، وعلشان كده سألت فى مركز الصيانه ممكن أعمل أية .
قالى المهندس انى أغير كاولين العربية { طقم الكاولين (بابين-كونتاك -شنطه -عدد 2 مفتاح خام)} ب 1100 جنيه ومش موجود بييجى بالطلب باللأضافة للريموت ب 685 جنية و80 برمجة .
وناس قالولى ممكن ادور فى الحرفيين على طقم كاولين بس المشكلة ان ألاقى طقم كامل بمفتاح واحد وبعد ما روحت للمغربى فى الحرفيين وده أكتر واحد لاقيت عنده حاجات نيسان بس لقيت السعر مش فارق كتير .
وانا بدور فى الحرفيين واحد قالى ممكن أروح لحد بتاع مفاتيح ويغير ريش الكاولين والموضوع كله هيتكلف 300 جنية ووصفلى واحد ،انا كنت فى البداية رافض الفكرة بس قولت اروح واشوف .
ورحت لقيت الراجل فاهم الموضوع وكان واضح انه بيعملوا كتير وفعلاً أول حاجه عملها فتح الشنطة بالمفتاح النبيتى .وبعد كده فك كل الكوالين وغير الريش وعملى مفتاح جديد وكل ده ب250 جنية .