كنت نازل بمشمشه ( ربنا يحميها و يبارك فيها )
و كان معايا 10 جنود في درج التابلوه
قلت اروح امون لحسن الرداخ عندي صيني
و بيتلكك انه يبوظ
المهم دخلت المحطه ( جنب بيتنا )
و كان قدامي اوبترا عايزه تغير نص وراني ( اخده خبطه لوز في الشنطه )
و قدامها عربيه شاهين صاحبها بيحط بنزين 92 ( انا مش عارف ايه البزخ ده )
و بعد 7 دقايق كده جه دوري
اتلاقي بنت سايقه لانسر زرقه ( انا بيجيلي ........* من العربيه دي )
جايه من علي شمالي و وقفت قدامي
و قالت للراجل فول ( بفتح الفاء و تسكين الواو )
اعدت اضرب كف علي كف
و البنت بتبصلي عادي و لا كأن حاجه حصلت
المهم راحت في 60 ........*
و الحمد لله وقفت قدام التانك و طفيت العربيه
و قولت للراجل حط ب 10 جنيه 92
و تملي كالعاده انسي افتح التانك من جوه
و كنت في منتهي الاحراج لدرجه
ان الناس حفظتني في المحطه بسبب الموضوع ده
( ده غير اني بمون منها علي طول بحكم انها تحت البيت )
فالراجل حطلي بنزين ب 9 جنيه 75 قرش
و كنت ناوي احرنق معاه في الربع جنيه بس مش مشكله
اجي ادور اسمع صوت تكه كده حاولت ادور تاني دارت بس اتأخرت شويه
( انا معنديش مشكله في العربيه خالص فالمشكله في البنزين المعفن )
و الموضوع ده بيتكرر معايا تملي لما بروح امون
المهم طلعت علي طرح البحر
و عديت علي 3 اشارات و انا مش رابط الحزام
و ال 3 عشاكر طلعوا محترمين و مخدوش الرقم
( يمكن عشان الرقم مميز جدا الله اعلم )
المهم ماشي علي الطرح بتمخطر و ماشي في الحاره اليمين علي 40 او اقل
اتلاقي الناس بتكلكس و ترعش الزينون في قفايا
امشي علي الشمال بسمع شويه شتايم محترمه اوي
امشي في النص اتلاقي طوب و زلط
طب اروح فين ؟
جيت في الشمال و اليمين و ال in between
برضه مش نافع طب اعمل ايه ؟
اخر مره كنت اعرف اللي ماشي بطئ بيمشي في الحاره اليمين
يمكن اتغير الحوار و ده
و بقه البطاء بيمشوا علي الرصيف الله اعلم
المشكله و انا داخل علي ملف نحيه الشمال
و مع البصه المحترفه في المرايات و الاشاره الشمال العسل
اتلاقي شاب تيت جاي من علي يميني بسرعه
( بعربيه هوندا و لا تعليق )
و اخد الملف و قام عامل دريفت قدامي
طبعا انا مسكت الفرامل و لولا لطف الله
و سرعتي البطيئه و فرامل الحلوه
لكنت خيشت بوش مشمشه و كنت هضطر اعملها عمليه تجميل
و انا مش عارف امتي الشباب دول ربنا هيهديهم و يحترموا نفسهم ؟
انا مش عارف مع اني شاب ( 23 سنه )
بس مبعملش العمايل دي خالص
و ببقي مرعوب و انا سايق
و خايف علي ارواح و عربيات الناس و ربنا يهدي الجميع
قمت سايب الشارع الشؤم
و طلعت علي شارع الممشي السياحي برضه الغباوه شغاله
بنت راكبه لانسر برضه و انا ماشي علي الشمال علي 50
و هي عايزه تعدي قمت معديها
و جيت انا علي اليمين عادي خالص
قمت جاي ارجع تاني علي الشمال
اتلاقيها بتفرمل في نص الشارع ليه ؟
اتضح ان في حيوان ما بيعدي و خافت تدوسه ( يا حرام )
و مش خايفه علي وش عربيه ال....* ( اللي هو انا ) اللي وراها
طبعا انا ريحت علي اكصدامها سنه صغيره
و نمري و نمرها اتعوجت و الحمد لله بسيطه
طبعا جت تبص علي الاكصدام
و قامت راكبه و ماشيه من غير نفس لانها غلطانه وش
و عدت الحمد لله
قولت بقي اروح عني ما اتفسحت و شوفت البلد
و قمت طالع علي شارع محمد علي و رايح علي البيت
طبعا ده شارع سريع كأنه سفر بالظبط
و فيه تقاطع من نحيه اليمين و انا ماشي علي اليمين
اتلاقي عربيه مرسيدس glk طالعه من التقاطع ده و بتحود قدامي
بدون اي heads up او حتي كلاكس و لا حتي ترعيشه نور
( شكل الراجل كان خايف علي البطاريه )
طبعا وقفت علي الفرامل و اخدت غرزه
و رميت نفسي شمال و العربيه عامت مني
و خبطت في الرصيف بس محصلش حاجه الحمد لله
و بعد معاناه و لف في المنطقه علي اتلاقي حته اركن فيها ركنت بفضل الله
نفسي اعرف بقه حاجه
امتي حال البلد دي هيتعدل ؟
و اللي يعرف سبب التكه اللي حكيت عليها يقولي
و اي خودعه و كل سنه و انتوا طيبين بمناسبه اعياد الربيع
المفضلات