مغامرات لمبة البطارية ولمبة البطارية ...؟
العنوان يمكن يكون في التباس بس احكيلكم اللي حصل ..
لاحظت من اول ما الجو برد من شهر كده ان العربية لما ادورها تدور بعد مرتين او تلاتة قلت عادي يمكن علشان الجو برد
ومن يومين رحت علشان ادور العربية .. قربت منها ودوست على الريموت ولكن لاحس ولا خبر قلت يمكن الانذار باظ وفتحت باب العربية مانيوال واضرب المفتاح في الكونتاكت وادور .. برضو لاحس ولا خير..
آه .. تذكرت عبارة ان الكمبيوتر والسيارة لا يمكن التنبؤ بما سيحدث معهما عند التشغيل ...
قلت اكيد البطارية هي السبب بس معقول حتى انوار التابلوه كلها مش شغالة يعني البطارية تموت فجأة
هنا تذكرت لمبة البطارية اللي في التابلوه وسـألت
السؤال الاول هي لمبة البطارية اللي في التابلوه فايدتها ايه ؟..
استعنت بصديق لي في العمل .. قال لي يا اما البطارية انتهت صلاحيتها يا اما الدينامو هو اللي عطلان ومش قادر يشحن البطارية وقال انو حصل معاه الموقف ده من اسبوعين ولسة جايب بطارية جديدة ومغير دينامو كمان !!؟؟
وقالي احنا نروح نشحن البطارية ونشغل العربية ونفصل كابلات البطارية لو العربية وقفت يبقى عيب دينامو ولو العربية فضلت شغالة يبقى ده عيب بطارية
قولتلو البطارية من النوع الجاف ومش هتقبل شحن قال لأ هتقبل
لاحظت ان لمبة البطارية اللي في البطارية مش منورة وانا بصراحة عمري حتى ما اهتميت اشوفها لان البطارية ونوعها adler كالسيوم (مش عارف ليه كالسيوم )ومكتوب عليها انها الماني او تكنولوجيا الماني كان اشتراها خالي من 14 شهر وركبها وحط عليها غطا كاوتش وما شفتش اذا كانت اللمبة بتاعتها منورة اخضر ولا لأ
قلت لصاحبي وريني البطارية الجديدة بتاعتك اللي انت اشتريتها من اسبوعين عايز اشوف نور اللمبة بتاعتها فتح كبوت عربتو الاوكتافيا وبصيت عليها لقيتها ضلمة برضو ومش منورة ولا الهوى حتى .. قاللي علشان العربية مش دايرة المهم دور العربية وبصيت تاني برضو مش منورة !!!؟؟
السؤال التاني هو ايه فايدة اللمبة اللي في البطارية وهل فعلا هي مؤشر يعتمد عليه ؟
المهم
خدنا البطارية ورحنا لواحد بتاع شحن بطاريات شكلو ميفهمش حاجة لانو اول شئ عملو لما اخد البطارية كان بيحاول يفتحها بالقوة قولتلو بتعمل ايه دي بطارية من النوع الجاف
المهم حط البطارية على جهاز الشحن واتحرك المؤشر بتاع الجهاز حوالي الربع وقال ان البطارية قبلت الشحن وسيبها ساعة وتعالى خدها
انا محاولتش اقرا المؤشر بتاع الشاحن علشان اعرف الربع ده كام امبير
المهم
رجعت بعد ساعة قالي خلاص شحنت وقبل ما يفصلها بصيت على مؤشر الشاحن لقيتو زي ما هو على ربع التدريج ولمب البطارية برضو مش شغالة ولما قلتلو الكلام ده قاللي انا هوريك انها شحنت وجاب كابل وعمل شرز قوى ..
المهم
في هذه الاسناء (الاثناء) اتصلت بخالي وحكيتلو اللي حصل قاللي مصنفرتش اقطاب البطارية والوصلات الاول ليه ؟ يمكن يكون العيب منها وقالي ان لمبة البطارية اللي في التابلوه دي علشان تبين حالة الدينامو اذا كان يشحن البطارية ولا لأ
المهم
خدنا البطارية انا وصاحبي ورجعنا وقبل ما اركب البطارية صنفرت الاقطاب والوصلات وركبتها واشتغل الانزار فجأة وصاحبي كان هيقع من طولو من الخضة وعملنا اختبار الدينامو وفصلت الوصلة الحمرا من البطارية وفضلت العربية شغالة
المهم
اشتغلت العربية وكلو تمام
وبقالها يومين شغالة ولكن بتعاكسني الصبح لما ادور العربية يمكن بعد مرتين او تلاتة ولما العربية تشتغل الار بي ام بيتهز لغاية ما السخان يشتغل وتكمل عادي بس انا عندي كابلات البوجيهات حالتها زي الزفت ويمكن البوجيهات كمان خدت رطوبة لانها بتفرقع مع الامبليه المفاجئ في فترة الصبح وبتختفي الفرقعة لما العربية تسخن واضيف معلومة مهمة ان العربية تبات في الندى بقالها شهرين وتصبح غرقانة مية وحالتها تصعب على الكافر لاني مهمل فيها شويتين
المهم
عندي شوية اسئلة من القطعة السابقة
هل البطارية خلاص بتودع ؟
هل لمبة البطارية اللي في البطارية يعتمد عليها؟
هل لمبة البطارية اللي في التابلوة تبين حالة البطارية ولا حالة الدينامو؟
هل نوع بطاريتي من النوع اللي اخرو سنة ولا ايه ؟
انا موقفي ايه الان؟
في زميل كان كاتب موضوع عن نوع البطاريات ده
http://www.nilemotors.net/Nile/110722-adler.html