الموضوع: اشتريت أوبل كورسا سيدان..ممكن أنضم للعصابة؟

المشاركة الأصلية كتبت بواسطة tamertamer

مبروك على العربية ومبروك على مجموعة الاوبل عضو جديد
المهم نخش فى العربية على طول
العربية بتتكون من ارعة اقسام مهمة وهى
1- صيانة المتور
ودية بتكون سير الدنمو وسير الكتينة وبلية الكتينة وفلتر البنزين وفلتر الهواء والبوجيهات و2 اسبراى انجكشن
وكل فترة بعيدة بتغير طرنبة المية ومتخفش مش غلية بتتغير كل فترة كبيرة ما بين 100 120 الف وبتديك صوت قبليها فمتخفش خالص
دية تسماء بصيانة 50 الف كيلو
وفى صيانة جانبية كل 20 25 الف كيلو متر وهى تشمل تيل الفرامل وحسب حالة البوجيهات لو بتحرق كتير وكدة وفلتر البنزين لو بتستخدم 90 لو 92 بيعد شوية كويسين
وتبقا ريحت دماغك من هم المتور خالص
2- العفشة
ودية اهم حاجة فى البلد الحلوة بتعتناء ودية تشيك عليهاء كل فترة لما تحس انها بقت نشفة والاصوات وكدة وهى غالبا بتبان لما بتطلع سرعات علية بعد 140 150 تبان العفشة وكفائتها ومتخفش لان العفشة الالمانى بتعيش بس متسكتش على حاجة خصوصا كوتشات الكبالن لو اتقطعت خلاص
3- التكيف
صينتة مقرفة شوية وموكلفة حبتين ولك نصحتى متجبش حاجة غير لما تكون اصلية عشان يعيش معاك وتتجنب اعطالة فى الصيف

4- حالة الصاج الخارجية والصلون الداخلى
ودية بترجع للشخص نفسة سواء فى الخبطات او الحوادث

جزاك الله خيرا بجد على المعلومات القيمة دى ..أنا ماشى حسب الجدول و ربنا يسهل ان شاء الله :)

المشاركة الأصلية كتبت بواسطة hellboy

اهلا بيك في عصابه اوبل المفتريه ...

شكرا يا باشا . لو قلت لك ان من أسباب انى اشتريت أوبل انى أنضم للعصابة مش هتصدق :)

المشاركة الأصلية كتبت بواسطة ibrahim hassan

أهلا بيك عضو أوبلاوى معانا

شكرا يا باشا

المشاركة الأصلية كتبت بواسطة hostook

اهلا ومرحباً بالعضو الجديد اشترتها بكام لاني معايا نفس العربية والموديل وعاوز اعرف سعرها دلوقتي كام يا تامر انت حلو في موضوع الاوبل ده خليك دايما على اتصال معانا لاني هحتجلك قريبا انشاء الله

أنا جبتها ب 51 ألف من واحد معرفة هو كان ماسك ف 53 بس عشان رخصتها منتهية اكمنة كان راكنها من فترة و كدة و كان عاوز يبيع بعقد مسجل و أنا كمان فوافق ينزل ال 2000 جنية دول

المشاركة الأصلية كتبت بواسطة khaled ayman

اهلا بيك فى عصابه اوبل ..
و شرف لينا نتعرف بحضرتك ..

أشكرك يا فندم .. الشرف لية :)

المشاركة الأصلية كتبت بواسطة midozot

مبروك عليك و ربنا يباركلك فيها ان شاء الله و يديلك خيرها و يكفيك شرها
و اهلا بيك يا باشا معانا ... ما شاء الله الناس هنا مفيش احسن من كده ..
الواحد كان جاى هنا مش عارف اى حاجة و هم ما شاء الله كفاءة يظبطوا أى حد
أخوك محمد عبود

الله يبارك فيك .. دة صحيح فعلا ..الناس هنا ما شاء الله متعاونة جدا .. وزى ما بيقولوا اختار الجار قبل الدار .. أنا اخترت المنتدى قبل العربية.

المشاركة الأصلية كتبت بواسطة ghoststab

مبررررووووكك و زاااودددد واحد كرساوى عندك و صلحه :10d5c8~1107::10d5c8~1107::10d5c8~1107:
اهلااا بيك يا باشا منوررررر العصابه

شكرا يا باشا .. خليى اكسترا تشيز بعد اذنك :)

السلام عليكم

معلش أتأخرت عليكوا فى الرد كان فى شوية حاجات كدة بضبطها فى العربية خلتنى أروح الساعة 12 بالليل اليوميت اللى فاتوا

1. الكاسيت مكانش راكب عشان صاحبها كان مركب كاسيت تانى و ادانى الأصلى البلو بونكت فى ايدى فا رحت ركبتة فى أدريان ب 15 جنية.
2. الشاشة اللى فى النص كانت مطفية .. أنا وانا بكشف على العربية الكهربائى قال لى محتاجة لمبتين الواحدة بعشرة جنية .. رحت عملتها عند واحد اسمة شرارة فى ميدان ابن سندر .. هو مهندس و شاطر و بيفهم بس قال لى اللمبة الواحدة ب 25 جنية قلت له انا سائل على اللمبة فى الحرفيين بعشرة جنية .. قال لى دى تلاقيها اللمبة من غير الدواية .. الحركة دى معجبتنيش بصراحة واتعلمت ان أنا بعد كدة اشترى الحاجة لنفسى و فى الاخر خد 55 جنية !! و مفاصلتش معاه.
3. اشتريت علامة أوبل اللى ورا من واحد اسمه الشاطر فى الحرفيين ب 75 جنية و كلمة لgls من واحد اسمة النجار فى شارع دمشق ب 20 جنية.
4. كان فى لمبة من بتوع النمرة اللى ورا مبتنورش .. الكهربائى اللى عمل لى الشاشة فكها و ركبها اشتغلت.
5. المراية اليمين كانت بتتحرك مع الهوا لما امشى بسرعة .. سألت عليها فى شارع دمشق لقيتها ب 190 جنية .. فى واحد هناك اسمه طلعت صلحها لى ب 50 جنية (ركب لها زور عشان تتكلم كويس) بس معجبتنيش أوى.. ممكن شويه كده و اشترى واحده ان شاء الله.
6. جبت جوان غطا التكاهات gm ب 40 جنية .. هغيرة لما أغير السيور و الفلاتر ان شاء الله.
7. جبت غطاء سير الكاتينة ب 130 جنية عشان فيه حتة صغيرة مكسورة (لفيت عليه لما دخت) من عند النجار برضة.
8. الجراب الجلد بتاع فرامل اليد متاكل .. جبتة من عند واحد فى الحرفيين اسمة أحمد المكاوى هو و بتاع الفتيس ب 40 جنية بس بعد كدة لقيت الأصلى عند النجار اللى فى دمشق ب 120 جنية الواحد .. ممكن أبقى أجيب الأصلى و اركبة ان شاء الله عشان بحب الحاجات الأصلى بصراحة.
9. غسلت العربية فى كار كير اللى فى وطنية اللى على الاوتوستراد ب 110 جنية .. بجد أسوأ بنزينة غسلت عندها فى حياتى .. اشتكيت العامل اللى غسل العربية من جوة للمشرف عشان غسل فرش الأبواب و أنا قلت له 4 مرات متغسلوش (كان فيه حد هنا على المنتدى قال انه بيطلع لما بيتغسل) و اشتكيت العامل اللى غسلها من برة للعميد مدير البنزينة و جبتة يشوفها بنفسه بجد العمال قمة الاستهتار .. بس الراجل مشكور قال لهم أنا هشوف العربية دى بنفسى و هى طالعة .. الواد اللى بيغسلها قال لى مش هو عمل معايا كده طيب أنا هخلص له الصابون اللى فى المكنة عليها !!..قلت له حرام عليك دى أمانة .. برضه غرقها.

كنت عاوز أنضف الرادياتير و أحط مياة خضرا بس كانوا خلصوا امبارح.

اسئلة:

1. الناس اللى أنا جبت منها قطع الغيار دى كويسة ولا ايه؟ لسة عاوز أجيب اللباد الداخلى بتاع الكبود .. النجار قالى مش عندى دلوقتى بس ممكن اجيبهولك ب 110.
2. أغير السيور و الفلاتر فين؟ أروح لعبد الله أوبل ده ولا ايه؟
3. عندى التكييف السخن مش شغال (أنا عارف انى عمرى ما هستعملة بس بحب كل حاجة فى العربية تكون شغالة) لما كشفت على العربية قالوا لى ان 99% من العربيات الأوبل بيلغوة عشان بيقلل أداء التكييف البارد .. ده صحيح ولا ايه و اعمله فين؟
4. بفكر أروح التوكيل يعمل لى فحص شامل على العربية .. اية رأيكوا و لو حد راح قبل كدة بكام؟

معلش طولت شوية :)