حزام الامان وسره الباتع

النهاردة حبيت اتكلم على حاجة بنحس بيها كلنا وبالذات فى فصل الصيف وهى حزام الامان, يا سادة ما هى فائدة حزام الامان ؟؟؟؟
فائدة الحزام عند الانطلاق بسرعات عالية فالحزام يثبت الراكب فى مقعده عن طريق نقاط ثلاثية فاذا لا قدر الله حدث حادث او استدعت الامور فرملة شديدة فلا يحدث اى انكفاء للراكب او دخول فى الزجاج الامامى مثلا, ولكن فى المحروسة الحزام وسيلة لتأديب الناس وتهليب الفلوس من جيوبهم فى صورة قانونية وهى عدم ارتداء حزام الامان داخل المدن ولا اعرف السر ونفسى اعرف السر, ايه الى هيخلينى البس حزام امان وانا ماشى على سرعة قصوى 50 كم/س , عن نفسى مش قادر افهم ويا ريت حد يفهمنا ايه سر حزام الامان داخل المدن ؟!!!

قد يكون الحزام ملوش لزمة داخل المدينة أحياناً بس مش كل الحالات كدة ... بعض الشوارع داخل المدن بتبقى فاضية و بتشجع على الجرى ... أنا عن نفسى اتعودت جداً على حزام الأمان و بقيت بأحس لو أنا مش حاطه ان فى حاجة غلط و بقت حركة روتينية أول ما أركب السيارة انى أرتديه

كنت في الامارات بلبسه دايما علشان المخالفات بس هنا في مصر جوه البلد ما بستعملوش لكن علي الطريق بستعمله علشان الحوادث فقط

انا اتعودت برضة البسة يا جنيدى بحركة لا ارادية ولكن لماذا؟؟
هذا هو السؤال انا عايز الموضوع يبقا ارادى مش عشان المخالفات والحكومة, يعنى عايز اقنع عقلى علشان ميقرفنيش كل شوية...

محدش يعرف امتى ممكن حد يستعمل البوز بز معاه و يضطر ان يدوس فرامل على الاخر و سواء جو البلد و لا بره محدش يضمن الحوادث، انا كل اسبوع باشوف على الكورنيش حادثة او اتنين و بيبقى المنظر بيقول ان اللى كان سايق اما شراب او مبيعرفش يسوق اصلا.
و بصراحة انا بقيت احط الحزام من ساعة ما كنت راكب فى عربية 127 مع واحد قريبى و ناس بتهزر خلوه داخل فى الجزيرة اللى وسط الشارع و انا دخلت فى التابلوه و اخت 5 غرز و الحمد لله انها جت على قد كده.
حط الحزام احسن بغض النظر عن المخلفات ، و ده راى بعد التجربة و اسال مجرب

رأيى هما خلوها جوه و بره البلد علشان هم مش هيعرفوا يحددوا حدود المدن يعنى ممكن واحد يبقى ماشى على الدائرى و يقول انا ماشى جوه البلد و واحد تانى يقول ان الدائرى يعتبر طريق سريع فكده هم مش هيعرفوا يحكموا الموضوع بس الصراحة هو امن كتير و انا خلاص اتعودت عليه

حزام الأمان يضمن لك السلامة ويجنبك الكثير من مخاطر الحوادث ، وصمم حزام الأمان ليحد من حركة الركاب داخل المركبة بأقصى سرعة ممكنة أثناء وقوع الحوادث ، واستخدامك لأحزمة الأمان وتشجيعك لغيرك دليل اهتمامك وحرصك بمن حولك ، وإذا أدركت ما يحدث عند وقوع الحوادث وما يتعرض له السائق والركاب من مخاطر فإنك ستعلم أن لإهمال حزام الأمان خطورة تؤدي إلى الوفاة أحيانا أو لإصابات كثيرة وبليغة ، ولاتنسى أن تعود أطفالك على لبس حزام الأمان مع وضعهم في المقاعد الخلفية لأنهم أكثر تعرضا لمخاطر الحوادث من غيرهم نظراً لخفة وزنهم وصغر حجمهم ----وحتى لو سرعة السيارة 20-ك-م او 30-ك-م--

مش عارف أقول لكم أد أيه حزام الأمان ده مهم جداً .. ولى حكاية مع موضوع الحزام حوالى سنة 1995 كنت مسافر مع والدى وأختى .. ووالدى هو السايق وأختى جنبه .. واحنا فى الطريق طلبت منهم لبس الحزام .. أختى أمثلت ولبست الحزام ووالدى رفض .. وأحنا ماشين عربة نقل بجرار ماشية معانا ووالدى بيحاول يتفداها وهو على سرعة 130 .. والنقل حالف أنى أبويا ميعدوهش ووالدى جاب ال 140 وده سابقنا ويجي يمين وشمال وهب دخلنا فى الجزيرة الوسطى ... طبعاً مش هاقول أضرار العربية كانت أيه .. لكن الحزام نفع جداً مع أختى وكل اللى صابها أغماءة من الخضة .. لكن مع والدى الأمر كان صعب جداً حيث أنه دخل بصدره على الدريكسيون ... ومبانش فيه أى حاجة فى ساعتها (والدى كان شديد جسمانياً) ..لكن أثره جه بعد فترة بمشاكل فى القلب ومات بسبب قلبه .
وأنا متعود من بعد الموقف ده أنى ألبس الحزام سواء مسافر أو فى المدينة ..
وتقبلوا تحياتى ...

رحم الله السيد الوالد-يا استاذ محمد--وفعلا حضرتك عندك حق فى كل ما ذكرت