الحمدلله الأوبل كورسا(القاضي المخسوف)اتدششت وأنا أحب قضا ربي

**DRmohamed hamed** · 17-05-2007 08:52 PM

فاكريني,أنا دكتور العيون اللي قرفتكو اخر قرف وأنا بنقي العربية أول السنة دي لحاد اما سبعاوي قاللي قصة القاضي المخسوف حمار ورسيت على أوبل كورسا من اسكندرية .الحمدلله ولا أرضى الا بقضاء الله وأنا رايح السادات امبارح الكاوتش اليمين فرقع والعربية جرفت الى الرمل الفاصل بين الريح واللي جاي وأول ما دخلت الرمل لقيت في وشي حجر كبير وطزت واتقلبت مرة ووقفت على ظهرها وربنا نجاني ومن معي برحمته ومنه وسعة عفوه ودلوقتي أنا عايز وقفة رجالة معايا عشان أشوف هاعمل في العربية ايه وفين؟
لسه الكلام ده امبارح والنهارده الميكانيكي قال ان الموتور والفتيس والشاسيه باظوا ومحتاجة نص وكان اللي كسحها امبارح عرض علينا يشتريها على حالها وبسعر أقل من تمنها فرق بسيط ؟الكلام ده ايه رأيكوا فيه؟
أرائكوا ومين اللي هايقف معايا لوهانروح الوكيل أو الحرفيين؟
أنا قاعد على الجهاز مستني ردودكو الليلة دي
ولو تسامحوني عن قلة مشاركاتي فده بسبب الامتحانات
وشكرا

**جندى مجند** · 17-05-2007 09:19 PM

قدر الله و ما شاء فعل ... أجرك الله فى مصيبتك و أخلفك خير منها ...
أنا لو مكانك (و دة مش نصيحة لكن مجرد رأيى الشخصى) حبيعها عشان لو قعدت معايا حأبقى متضايق منها كل ما أشوفها و عمرها ما حترجع لحالتها الأصلية و رونق الزيرو راح منها ... فلو جاى فيها سعر أقل من تمنها بفرق بسيط زى ما الراجل بيقول أنا حأبيعها

سؤال: هو الكاوتش كان ضغطه زيادة جامد؟ أنا مستغرب انه انفجر و هو لسة جديد ...

**Dr Ahmed** · 17-05-2007 09:31 PM

بيع يا أخى لو متأكد فعلا ان الحاجات اللى قلت عليها محتاجة تتغير..
وحمدا لله على سلامتك...

وأجمل حاجة رضائك بالقضاء ، ودا من فروض الايمان الاساسية ولازم ربنا هيخلف لك خير (أنا عند ظن عبدى بى)

**hazem_khidr** · 17-05-2007 11:37 PM

ربنا يعينك يا محمد و ادعي دايما و قول سبحان الله اني كنت من الظالمين. و كمان قول و افوض امري الي الله ان الله بصير بالعباد و كمان قول حسبنا الله و نعم الوكيل
اما بخصوص العربيه لو اللي حياخدها زي ما انت بتقول قالك حيقلل من تمنها حاجه بسيطه يبقي تبيعها احسنلك بكتير
بص لو حينزل من تمنها 20000 جنيه انت الكسبان و الحمد لله انك طلعت منها بالسلامه.
يا اما حل تاني انك تنزل بورسعيد و تتفق مع تاجر يجيبلك واحده اختها من هناك بس يقطعهالك بحرفنه و تنزلها هنا و تنقل رقم الشاسيه عليها و الموتور بيجي معاه مخالصه جمارك و يبقي كده ما خسرتش كتير و متهيالي الباشمهندس عبد الله عنده فكره بالموضوع دا علشان كان فيه ناس عملاه من 10 سنين في عربيه 505

**DRmohamed hamed** · 17-05-2007 11:48 PM

لأني كنت رايح اسكندرية قبليها بيومين مع حمولة وكنت مزود زي الأرقام الغريبة اللي مكتوبة في غطا التانك وكل ما اللي بينفخ يستغرب من الرقم أوريهوله (38 الكاوتش الخلفي عند حمولة 5أفراد) والمهم رحت ورجعت من اسكندرية على الضغط ده والحمولة دي ومسافات أبعد بكتيير وسرعات أعلى بكتير وماحصلشي حاجة بس لما رحت السادات كان معايا واحد بس ونسيت أهوي الكاوتش وكنت مطمن لأني ماشي بيها من فترات قبل كده على الضغط العالي ده وما حصلشي حاجة.
الحمدلله

**modux** · 20-05-2007 10:50 AM

rbna ye3awad 3leeek

w la elah ela allah

**ابوحميد** · 28-06-2007 11:52 AM

ربنا معاك ويعوض عليك
فى مثل بيقول اللى ييجى فى الريش بقشيش (يعنى مادام مجاتش فى جسمك اعتبرها زكاة)
الحمد لله انك بخير
نصيحة لك
متحاولش تصلحها مادام الراجل عرض عليك سعر مناسب بيع علطول
لو صلحتها وبقت 100 100 كل شوية لما تبصلها تفتكر الحادثة وفى الاخر حتنفسن وتضايق