الموضوع: إحكي لنا عن موقف تعطلت فيه عربيتك واتصرفت إزاي (إسأل مجرب)

كنت مأجر عربيه كام يوم علشان فرح حد قريبى فى بنها والبلد اللى هو منها بينها وبين بنها حوالى 15 كم , اول يوم عدى طبيعى وتانى يوم بليل العربيه بعد ما ركنتها اجى ادخل فيها المفتاح مش عايز يدخل , احاول يمين شمال حلف ما يدخل فيها وكأنه مش بتاعها

المهم سيبتها وثالث يوم ده كان الفرح قمت من الصبح احاول ادخل فيها المفتاح مش راضيه , كان معانا واحد صاحبنا ميكانيكى بس مفيش عده يشتغل بيها علشان البلد كلها مفيهاش ميكانيكى والعربيه اوتو والفتيس مش هينفع يتمور غير لما المفتاح يدخل وبالتالى مش هينفع نزقها

فكينا بمفكات بدائيه الزور بتاع الدركسيون ووصلنا اننا ندور العربيه بالسلوك والحمد لله , بس تبقى مشكله ان الدركسيون مسوجر , وكان الحل اننا جبنا أجنه وشاكوش ونزلنا تكسير فى الافيز اللى ماسك عمود الدركسيون لحد ما طلعنا الكونتاكت كله وفكينا المسوجر بتاع الدركسيون ومشيت على كدا ( الفيلم ده بالادوات البدائيه دى أخد بتاع 4 ساعات )

خرجت بيها على الطريق والدركسيون من غير وش والسلوك مريحه على رجلى واذا بمشكله جديده ان لمبه الحراره بتنور ( مفيهاش عداد ) قعدت اجرى بيها بسرعه علشان تبرد لحد ما وصلت بنها لحد الكوافير وبعدين وقفت لقيت دخان وشغلانه سوده وعرفت انها جابت اخرها ومينفعش امشى بيها كدا تانى

اتضح ان بعد الوصله الجهنميه اللى عملناها ان المروحه فصلت فجبنا حته سلك ووصلنا المروحه دايركت علشان اكمل الزفه ولكن للأسف كان الناس هتمشى فأضطررت اكمل مع واحد صاحبى وابقى ارجع للعربيه بعد الفرح , والحمد لله نص الزفه اتسحب رخصها علشان كانت فى لجنه رخمه جدا فى بنها ولو كنت دخلت عليهم بحفله السلوك دى ورخصه مش بأسمى وكمان منتهيه كنت هبات فى القسم لا محاله

الكوميدى بقا ان بعد الفرح نزلت بيها القاهره علشان اشوفلها حل وفضلت ماشى بيها يومين كالاتى , افتح العربيه وبعدين افتح الكبوت وبعدين اوصل سلك المروحه على البطاريه , وبعدين اركب العربيه وبعدين المس السلوك لحد العربيه ما تدور وبعدين اربطهم ببعض واركب غطا كلاكس الدركسيون وامشى ولما اقف افك السلوك فالعربيه تبطل وبعدين انزل افتح الكبوت وافصل سلك المروحه :)

وبالمناسبه طلع ريش الكونتاكت اتنحلت وعلشان كدا المفتاح مكنش بيدخل واتقفل التابلوه وركبت افيز جديد وصلحت الكونتاكت وصاحب العربيه معرفش اللى حصل غير فى قعده هزار بعد الفرح بيجى شهر :)

عندى مواقف اعطال كتير بس لما افتكر هبقى اشارك تانى

لسة الاسبوع اللي فات

انا العربية عندي بقالها فترة ملاحظ ان الغيارات تقيلة وساعات بتتقل فجأه ابطل وادر ترجع كويسه المهم انا مسايسها لغاية ماشوف واحد كويس

صحيت الصبح لقيت مكرفون بينادي علي جنازة واحده من جيرانا المهم نزلت عزيت واحنا رايحين الجامع اخدت ستات كبار للجامع علشان صلاة الجنازة

خلصنا الصلاة وطالعين علي المقابر علشان الدفن وفي الطريق هوب الغيارات مش تقلت دي حجرت ابطل و ادور ولا الهوا ومعايا ناس وكان فيهم قرايب درجة اولي للست المتوفية يرحمها الله والاسعاف فرقت عننا كتير انا عرقت وبقت حالتي هباب مش عايز اتغاشم علي الغيارات وكمان عايز الناس تحضر الدفن

المهم سايست العربية و مشيت علي التاني مسافة طويلة لغاية المقابر

المشكلة وانا راجع العربية رجعت تاني كويسة

لكن انا مرجعتش علي البيت روحت علي الميكانيكي علطول غيرنا زيت الفتيس بزيت موبيل 90 (انا كنت حاطط زيت 140) وقالي نشوف هتظبت ولا لأ ربنا يستر العربية بقالها 4 ايام و كويسه لحد دلوقتي

اللي واحد اتعلمه متسيبش مشكلة في العربية لأنك مش عارف هتحتاجها امتي