الجزاااار تعبني

**Ahmed Samy** · 23-12-2007 09:08 PM

من غير ما أطول عليكو
و مش هاقول ان العجل "ضربني" و روق الجزار تمااام :d
المهم و احنا شغالين في الكتف لاقيت صبي الجزار شايل الجلد (منه لنفسة كده) و خارج من الجراج
- تعالى يابني رايح فين ؟؟؟
= خير يا دوك !!
- واخد الجلد و على فين ؟؟
= ها وديه العربية
- طب سيبه احنا ما بنديش الجلد للجزار
= نععععمممم!!!
- ايوة ده حرام و انت ماتاخدش من الدبيحة حاجة
الجزار: حرام ايه احنا طول عمرنا بناخد الجلد و لحمة كمان وانت ماتفقتش على كده وللا هتاكل حقنا و بعدين دا العرف و ...
- عرف ما عرف , قصر علشان انت مش هتاخد من الدبيحة شعرة , و الاتفاق,ز نتفق (احنا ما كناش اتفقنا -قولتله هاتمشي مرضي).
الجزار : نتفق بعد ما اشتغلنا ما احنا بقينا جواك خلاص وبعدين تقوللي حرام وما حرام ! ماحنا مسلمين وعارفين الحرام والحلال و ده (والله العظيم تلاته ماهو حرام).
-(تذكرت قوله تعالى: {وإٍٍٍِِِِِذا خاطبهم الجاهلون قالوا سلاما} و تمالكت أعصابي : لأ يا سيدي انا اللي جواك لأنك هاتمشي مرضي زي ماتفقنا .
الجزار : 200 جنيه و الجلد و اللي تشوفه بقى لحمة.
- تاااني !! لأ اطلب فلوس (اليوم ده مش هايعدي؟؟)
الجزار: انت محبكها ليه و ليه هتاكل علينا الجلد انت عايزه تعلقه ؟؟ مش هاتلاقي حد يدبغه و هايعفن عندك , احنا أولى.
- حراااام يا معلم , حراام افهم والله لو قعدت لبكرة تقاوح
واوي .... إو إو الإسعاف بتاع الجمعية اللي بتاخد الجلد منا كل سنة - ياااه كل سنة وانتو طيبين
اتفضل اخدت الوصل و ألف سلامة و إو إو ويييييييييييييييييييييييي
- هاه ياسيدي و ادا الجلد راح لنصيبه عايز كام فلوس
الجزار: 300 جنيه و لحمة
- يا دي النيلة ... انت مابتفهمش عربي ؟؟ لحمة لأ حرااااااام حراااااام , اطلب فلوس
= ماحنا عايزين ناكل لحمة برضه , اعتبرها صدقة
- في حد بيفاصل في الصدقة ؟؟ ده أجركو , حسابكوا مش صدقة ولا هبة
= ماشي يبقى 350 جنيه
- و تبقى مرضي ؟؟
=تمام
- اتفضل يا سيدي يللا نشتغل بقه علشان الليل ليل علينا
= ياللا يا برنس

(على فكرة ده ملخص الحوار اللي استمر بتاع تلت ساعة و رفع ضغطي)
منتظر تعليقاتكم

**Ahmed Hassan** · 23-12-2007 09:18 PM

انا مش عارف انته مستغرب ليه؟!! :)

احنا طول عمرنا بناخد الجلد = احنا طول عمرنا بنعمل حوادث و مبندفعش فلوس

نفس المبدأ و نفس المدرسه... لما نعمل الغلط و الامنطقي كتير يتحول لصح!!!

**حاتم سليم** · 23-12-2007 09:24 PM

عزيزى احمد بك سامى

كل سنه و انت و الجزار طيبين

يا ترى هل اخذت موبيل هذا الجزار العتره ؟؟
حتقولى ليه ؟؟
اقولك عشان تجيبه السنه اللى جايه
و توفر على نفسك المناهده

اهو تبقوا عارفين بعض ...

**yahyanaabil** · 23-12-2007 09:30 PM

على فكره كده احسنلك لان الجلد تمنه لوحده جوالى 200 جنيه فانته بيعه واتبرع بفلوسه لو عايز
بس السنه دى حصلت حاجه جديده معانا العجل هرب وطلع على البحر وقف الشارع وكانت حاجه مسخره ودمر الباب الصاج بتاع الجراج

**Nader** · 23-12-2007 09:37 PM

بص هو المبلغ اللي اخدة دة مش كتير ولا حاجة، يعني احنا السنة دي دفعنا للجزار 370 جنية، كنا متفقين على 300 جنية اما الباقي اكراميات للصبيان اللي معاة اللي قطعوا ووضبوا اللحم وقسموة ووزنوة و وو. فالسعر مناسب بالنسبة للدبح بالقاهرة.

اما ما فعلتة معة فهو عين العقل فلا يجب للجزار ان ياخذ اي شئ من الاضحية ولا على سبيل الصدقة كما امرنا حبيبنا المصطفى علية الصلاة والسلام.

الجزار اللي انا بتكلم علية دة بقالوا 3 سنين بيجيب لنا اضاحي ويدبحها عندة في محلة فاحنا بنتفق معاة الاول هو قال ممكن يدبح ب200 جنية وياحد الجلد بس طبعاً احنا رفضنا وتم الاتفاق على ال300 جنية، اما بالنسبة للدفع فاحنا مدفعناش ثمن العجل ولا الدبح غير بعد ما دبح ووضب اللحمة زي ما احنا عاوزين:)

**Karim_Monir** · 23-12-2007 10:51 PM

المشاركة الأصلية كتبت بواسطة yahyanaabil

على فكره كده احسنلك لان الجلد تمنه لوحده جوالى 200 جنيه فانته بيعه واتبرع بفلوسه لو عايز
بس السنه دى حصلت حاجه جديده معانا العجل هرب وطلع على البحر وقف الشارع وكانت حاجه مسخره ودمر الباب الصاج بتاع الجراج

ما ينفعش يبيعه حتى ولو هايتبرع بفلوسه
لازم يتبرع بيه نفسه وفي جوامع كتير بتعمل مواضيع اللم ده ويودوة الاسعاف لو الاسعاف ماعدتش عليك
ولو مالقتش اشتري 10 اكياس ملح ب 5 جنيه وغرق الجلد ملح طبعا من الناحية اللي فيه الدم
واوعى تحطه في الشمس لازم ضل بحد اقصى 3 او 4 ايام لحد ما تلاقى صرفه فيه
والله يفتح عليك انك ما رديتش تسيبهولوه لان اجر اضحيتك كان هايورح هباء منثور
حتى ولو حته لحم صغيرة
بس في خطأ تاني انت وقعت فيه وربنا يعفو عنك
انك قبل ما تقدم على اي عمل محدد وواضح لازم تتفق على الثمن وهو ده احد اسباب النهى عن التامين التجاري
لانك بتدفع قيمه انت مش عارف هاتاخد بيها ايه
وانا هنا مش في عرضه للتامين
لكن عرضه لانصح اي اخ قبل ما تتفق على اي عمل محدد وصريح زي
ذبح وتقسيم-لحام فردة كاوتش-تغيير طقم سرفيس-وغيره وغيره
لازم تتفق على الثمن الاول
اما الاعمال الغير الواضحه زي شوف مشكلة العربية بتقطع ليه -العربيه مش بتدور
دي اعمال مبهمه لكن اول ما يوضح العيب قولوة يتكلف كام خاصة المصنعيات

كل سنه وانتم طيبين

**Jato.33** · 24-12-2007 12:59 AM

يا نهار أبيض ده إحنا في شبرا ودافعين 450 جنية أول كلام
دحنا مغفلين بأه
عموماً ربنا يبارك
والأجر على قدر المشقة والفلوس كمان
وكل عجل وإنتوا طيبين
صورة المرحوم

**ecybrarian** · 24-12-2007 03:12 PM

انا دفعت 400 جنيه جزارة و50 اتوزعوا أثناء الدبح لله (علشان لحمة التوزيع رايحة لناس بالاسم) بص بصراحة الجزار عمل شغل 10 على عشرة لدرجة انه قطع اللحمة مكعبات..ده غير التنضيف..ده كان ناقص يعمل السمانة بفتيك..الحمد لله يا دكتور أحمد انها عدت على خير وربنا يتقبل منك ومنا جميعا..وبرافو عليك انك كنت مصر على تحري الدقة في الحلال والحرام

-

الموضوع: الجزاااار تعبني

LinkBack

أدوات الموضوع

عرض

الجزاااار تعبني - انشر الموضوع فى :

-

-

-

-

-

-

-

المواضيع المتشابهه

الفتيس للنوبرا 2 الاوتو تعبني

محتاج مساعدتكم بجد ياوحوش الفيات علشان أنا التفكير تعبني جداااااا

ضميري تعبني اوي و مش عارف ارتاح افيدوني من فضلكم

الكلمات الدلالية لهذا الموضوع

المفضلات

المفضلات

ضوابط المشاركة