الموضوع: إستشارة زيتية يا حضرات بس رجاء الرد بسرعة ( لخبراء الشاهين )

الموضوع ينقسم الى شقين

1- موضوع تناقص الزيت له سببين لا ثالث لهما:

السبب الأول ان الموتور يكون بيسرب زيت من اى جوان ، وعادة دة بحصل من جوان وش السلندر بالدرجة الأولى ، وممكن بدرجة اقل من جوان غطاء التاكيهات وجوان الكارتير، وده يمكن اكتشافه بسهولة بعد غسيل المحرك غسلة كويسة تنظفه تماما من اعلى ومن اسفل ومتابعة اى تسربات (تسرب الزيت يكون فى شكل زيت سائل على جوانب المحرك وليس فى شكل غلالة زيتية رقيقة مغطاة بالغبار التى يطلق عليها الميكانيكية(تعريق زيت) حيث ان تعريق الزيت لا يمثل تسرب حقيقى

لو الموتور مش بيسرب زيت يبقى ببساطة الشنابر متآكلة او كاوتش الصباب متآكل ويهرب الزيت الى حيز الحريق، تآكل الشنابر يمكن الكشف عليه عن طريق فك خرطوم الفايظ وضغط البنزين وملاحظة حروج بخار زيت من الخرطوم، لو ان كمية بخار الزيت تبدو مثل كمية الدخان التى تخرج من انف مدخن شيشة لحظة الزفير فهذا معناه ان الشنابر او الشميز او كلاهما متآكل والسيارة تحتاج لنصف عمرة او عمرة كاملة، ، اما لو كمية البخار مع الكبس الشديد تشبه الغبار الذى يتطاير عن سطح املس مترب لو نفخناه بالفم ، او مافيش بخار خالص فده معناه ان الشنابر كويسة، وطبعا هناك درجات بين الحالتين تساوى درجات من حالة المحرك، لو الزيت ما زال ينقص برغم عدم وجود تسريب وعدم وجود بخار زيت من خرطوم الفايض يبقى العيب محصور فى كاوتش الصباب وفى هذة الحالة ستحتاج إما كاوتش صباب او طقم صباب كامل

2-بالنسبة لموضوع الزيت:

الزيت احادى الدرجة سيء جدا لمحركك لو كان المحرك سليم وبحالته، لانه فى هذة الحالة يضع احمال اضافية على المحرك ويبطئ تسخين السيارة شتاء ويصعب الحركة بالسيارة وهى باردة ويساهم فى سرعة تآكل اجزاء المحرك نظرا لبطئ وصوله الى الأجزاء المتحركة حتى يسخن وتقل لزوجته الى الحد المناسب،

لكن لو كان محركك بياكل زيت بسبب ان المحرك خفييف يبقى الزيت احادى الدرجة هو الحل الأمثل لحين اجراء العمرة، لأن لزوجته العالية تملأ خلوصات المحرك الواسعة وتساعد على عدم التدهور السريع للمحرك، انا بستعمل زيت احادى الدرجة شل X100 بدرجة لزوجةSAE 50 للسيارة الريجاتا لأن محركها خفيف شوية، لكن طبعا لم اكن استعمله نهائيا فى الشاهين وكنت دايما بستعمل توتال كوارتز 5000 متعدد الدرجات


بالنسبة للزيت اللى فى عربيتك، إكشف على فايظ الزيت كما شرحت لك اعلاه وكذلك على كبس المحرك فى المحطة، لو محركك حالته افضل من 75% غير الزيت ده فورا بزيت متعدد الدرات ويفضل تغيير الفلتر ، اما لو محرك اقل من 75% سيب الزيت ده لحد ما ياخد وقته وممكن تستمر على الزيت احادى الدرجة لحين اجراء عمرة ، بس فى هذة الحالة انا ارشح لك شل x100

لكن فى جميع الاحول خلى حد ينزل لك كيلو الزيت الزيادة