تجربتي الأولى مع غبور و صيانة ال 5000 كم .. انطباع سيئ
السلام عليكم
النهاردة الصبح روحت غبور فرع قليوب و انا بجد كنت مشتاق للتجربة عشان الكلام اللي بسمعه
الدخول كان زي الفل و سرعة في الاجراءات و جالي المهندس و قولتله على ملاحظاتي و كتبها و قاللي اتفضل في الاستراحة
انا دخلت الساعة 11 و قاللي ان شاء الله تستلم العربية الساعة 2 و بجد التزام تام بالميعاد و الاجمل اني استلمتها الساعة 1 و ربع يعني الصيانة خدت ساعتين و ربع بالظبط
غيرت زيت و فلتر و ربط العفشة وبس و كان عندي شوية اصوات تزييق خفيفة كده في الابواب قالولي ديه في مركز خدمة الهياكل و روحت هناك عملتها و انا واقف في ربع ساعة
تقييمي:
1/المميزات: المعاملة , الالتزام بالوقت
2/العيوب: الاستعجال شوية , الاهتمام بمشاكلي مش اوي , و اهم عيب بقى و هو سعر الصيانة يعني هو حط زيت شيل هيلكس سوبر ب 98 جنيه و فلتر ب 18 جنيه يعني المجموع 116 جنيه و الغريب انهم خدو 300 جنيه يعني 184 جنيه مصنعية !
بس انا قولتلهم فيه تزييق في العفشة و قولت اكيد اتظبط بس و انا مسافر سمعت صوت تزييق خفيف تاني في العفشة فاتجننت و معرفش اعمل ايه بس الاكيد اني مش هروحلهم تاني لانه مشوار
و قولتلهم بعد شد فرامل اليد و اسيب دواسة الفرامل العربية بتريح و يحصل صوت تزييق في فرامل اليد فبسهولة شدوهالي بس الصوت لسة موجود !
قولتلهم فيه تكتكة ناحية باب السائق في المطبات قالولي ديه من الباب و رشوا سبراي بس كده على مفصلات الابواب بس صوت التكتكة زي ما هو !
انا بعد ما احترمتهم في البداية و حسيت فعلا انهم ناس تمام و اكيد عندهم عمال كويسين اتضايقت جدا منهم و من اهمالهم للمشاكل اللي قولتها و انهم ياخدوا مصنعية اكتر من تمن قطع الغيار نفسها و مش عارف بقى اكمل معاهم مشوار الضمان و الحوار ده و لا اكمل مع صنايعي كويس يهتم بالعربية اكتر و فعلا خدت رقم صنايعي شغال عندهم فاتح ورشة برة و قعد يقوللي يا باشا الناس هنا بينصبوا و بياخدوا فلوس اكتر من حقهم
ياريت تفيدوني لاني احترت اوي بعد الصيانة دي مع انها صيانة خفيفة امال في الصيانات الجاية هيحصل ايه؟