الرخصة الدولية لتاني مرة بالتفصيل
السلام عليكم ورحمة الله وبركاته
كنت طلعت الرخصة الدولية السنة اللي فاتت وهي مدتها سنة ولا تجدد.لازم تطلع غيرها كل سنة.
المهم رخصتي الدولية كانت إنتهت من شهرين وإستغليت إني كنت فاضي من يومين ورحت طلعت واحدة جديدة وإليكم التفاصيل من جديد مع العلم إنها نفس الخطوات اللي ذكرتها في الموضوع ده:
http://www.nilemotors.net/Nile/42558-a.html
1-رحت الإدارة العامة للمرور اللي جنب رابعة العدوية الساعة 9 الصبح.طلعت الدور التاني إدارة البحث الجنائي وتسأل على مكتب الرخصة الدولية.مجرد إنك تديله رخصتك الخاصة والبطاقة وهيديك ورقة إسمها صحة بيانات مجانا وإنت واقف ويقولك تمضيها من المكتب اللي جمبه وبس.
2-تطلع على مكتب نادي السيارات الموجود في نص شارع طلعت حرب مابين جروبي وميدان التحرير الدور التالت (لو سألت أي حد هيدلك بسهولة) هتلاقي مكتب إسمه الرخصة الدولية أول متقوله السلام عليكم هيقولك جبت ورقة صحة البانات:).
3-المهم اديته ورقة صحة البيانات والرخصة الخاصة وصورة الرخصة وصورتين شخصيتين و50 جنيه مع إن الرسوم هي 43 جنيه فقط لكن هو مدانيش الباقي مقابل إنه سلمني الرخصة وأنا واقف بدل ما أرجع الساعة 1:30 أستلمها.
نرجع تاني وأقول الملاحظات المهمة:
-مواعيد العمل في نادي السيارات من الساعة 9 للساعة 1 لتقديم الطلبات.ومن 1 إلى 3 لإستلام الرخص.
-ممكن أي حد يقدملك الورق ويستلم الرخصة في النادي بشرط يكون معاه أصل الأوراق كلها والجواز بتاعك.بس أعتقد إن ورقة صحة البيانات اللي من المرور لازم تكون إنت بشخصك أو توكيل منك(مش متأكد من المعلومة).
-مفيش أي زحمة هناك خالص.وكمان فيه أماكن إنتظار لو معندكش حاجة تعملها في خلال وقت الإنتظار.
-لو رحت بدري (على 9 أو 10) 90% هتاخد رخصتك بعد ساعة أو نص ساعة يعني مش هتستنى لحد الساعة 1.زي مقولتلكم أنا دفعت 50 جنيه ومخدتش الباقي مقابل إني إستلمتها وأنا واقف.
-الرخصة الدولية غير مسموح إستخدامها في مصر نهائي ولا تغني عن الرخصة الخاصة.
-النقطة ديه ناس كتير جدا إتكلمت فيها والأكيد بتاعها هو إن الرخصة الدولية تستخدم في البلاد المشتركة فيها لما يكون معاك تأشيرة زيارة أو سياحة فقط وتكون العربية مأجرة.لكن لو معاك إقامة أو العربية ملكك ممنوع إنك تستخدمها نهائي.