اول امبارح كنت انا ووالدتي بنتمشي علي الكورنيش بعد يوم عمل مقرف وروحنا كام مشوار
وجينا عند ميامي كده واحنا ماشيين فقولتلها ايه رايك اشغل الراديو
وكنت بقالي فتره طويله مسمعتش الراديو
فجيبته علي الاف ام وبدات ادور
لحد ما لقيت محطه كده فيها شويه اغاني وبرنامج حواري
وبعد كده روحت لحد القلعه وقولت ناكل جيلاتي
ووقفت عند سور القلعه احب في مامتي كالعاده وناكل الجيلاتي (سامعني يا حاج احمد ابراهيم)
المهم الساعه كانت 2
وفجاه لقت المذيع بيقول نعلن عن تمثيليه يوميات نائب في الارياف
وبدات التمثيليه عن جرائم قتل غامضه
بيني وبينكم اتشديت اوي اني اسمعها لاخرها
فقولت لوالدتي هي التمثيليه دي بتقعد قد ايه
فقالتلي حوالي نص ساعه
قولتلها وماله ادينا بنسمعها ونص ساعه مش مشكله
خلصنا الجيلاتي والتمثيليه لسه مخلصتش بس الاحداث كانت تحفه
فقولت اتمشي شويه علي البحر لحد ما تخلص
فوصلت لحد استانلي وقولت يمكن تخلص
بس مخلصتش
فرجعت علي مهلي وماشي وكان الجو تحفه
وقولت يمكن تخلص
مخلصتش برضه
روحت لحد القلعه تاني
وقولت يمكن تخلص
برضه مخلصتش
فقولت اروح بقي واكيد حتخلص في السكه
دخلت نفق قنال السويس وشارع الرصافه وخلاص داخل علي البيت
فحسيت انها لسه مش حتخلص دلوقتي
روحت لافف وداخل شارع ابوقير وبعده سيدي جابر وبرضه مخلصتش
والساعه بقت 3 وشويه
المهم روحت وطالع جري علي البيت طلعت الراديو من وسط الكراكيب وجيبت المحطه ولقيتها
قولت هيييييييييييييييييييييييي ييييه اخيرا لقيتها
وفضلت لحد الساعه 3 ونص لحد ما خلصت بغلق القضيه ضد مجهول
طبعا دمي اتحرق
هههههههههههههههه
بس اتبسطتت جدا من حاجه
اني طول ما انا بسمعها
مفيش اعلانات
ولا اتصل ب0900
ولا حد بيرقص
ولا حد بيقلع
وقمه الاحترام
وقمه الاثاره
وتتشد جدا انك لازم تكمل الموضوع للاخر
وبجد انا نويت طول ما انا في العربيه اسمع الراديو
ويتحرق التليفزيون بقرفه وبقله ادبه وبالعري اللي فيه