الموضوع إسمه غريب صحيح ، بس الهدف منه و في التوقيت دة مش غريب ، خصوصاً بعد كتر الكلام عن سحب عربيات تويوتا ، و كل شوية هنلاقي موضوع عن سحب موديل من ماركة معينة و تبدأ الناس تنقسم بين مهاجم و مدافع عن الماركة و الموديل .
يا ريت قبل ما نتكلم عن الموضوع اطلب من حضرتكم تلقوا نظرة على هذا الموقع و الخاص بال-recalls، و هتلاقو فيه قائمة بالعمليات إلي قامت بيها الشركات لموديلاتها على مر السنين ، و هتلاقو كمان قائمة الإستدعاءات ٢٠١٠ مخصوص على إعتبار انها العام الحالي . و فيها كمان شوية إحصائيات عن أكتر عمليات إستدعاء و أقل ماركت بيحصل فيها إستدعاء ، حاجات كدة يعني
Auto Recalls, Component Recalls, Recalls by Makes and Models
الفكرة بس يا جماعة إن تويوتا مش أول ولا أخر شركة يحصل عندها مشاكل ، كل الحكاية تضخيم إعلامي ، ناتج من إن المشكلة تسببت في وفيات ، و ناتج كمان من ضخمة عدد العربيات المطلوب سحبها ، و ناتج من إن فئات كتير من السيارات فيها العيب و مش موديل واحد (أكتر من ٨ ملايين عربية في حوالي ٩ موديلات ما بين صغيرة و كبيرة و شعبية و فخمة )
النقطة إلي فضله و حبب أتكلم فيها هي موضوع الإستدعاء في مصر ، هو بيحصل يا جماعة بس احنا معندناش إستيعاب للثقافة دي ، لأن احنا أصلاً مش بنصلح عربياتنا في التوكيل ، و عادةً الإستدعاء بيكون عن طريق التوكيل ،
يعني لم المصنع يكتشف مشكلة في العربية بينزل نشرة في التوكيلات بإن الموديل الفولاني بارقام مسلسل شاسيه من كذا إلى كذا دول يتصلح فيهم الجزء الفولاني، و طبعاً لو مش بنروح التوكيل ولا عمرنا هنسمع عن الكلام دة .
كمان التصليح ليه أنواع حسب نوع العيب ، مش كل أنواع الإستدعاء خطيرة و مش كلها بيصلحها التوكيل على حسابه هو ، أحيانا العميل بيتحمل التكلفة أو جزء منها و أحياناً مورد القطعة بيتحملها (يعني مثلاً لو نوع بطاريات بيستعمله التوكيل و طلع فيه عيب بيحمل تمن تغيير البطارية للمورد مش العميل ولا التوكيل )
أمثلة على recalls حصلت في مصر و أنا عارفها بحكم اني إتعاملت مع التوكيلات دي ، و أكيد منكن ناس اتعملت مع توكيلات و عندهم قصص مشابهة :
١- تغيير البطارية في الميجان على حساب التوكيل عشان نزل عليها recall في شحنة معينة
٢- تغيير علبة الدركسيون برضه في شحنة معينة من ميجان عشان كان فيها مشكلة صناعة
٣- تغيير سوفتوير بتاع الفتيس في بعد شاسيهات ميجان ،
4- و نفس الحكاية حصلت في اوبل فيكترا عشان سوفتوير الفتيس الايزيترونيك
٥- recall في حزام أمان ال-BMW 3 series ، E90 ، و برضه إتصلح في التوكيل تلقائي
٦- recall في سنتر لوك الفئة التالتة E90 و برضه صلحوه مجاناً
في بقى recall جميل جداً و عمرنا ما سمعنا ولا هنسمع عنه في مصر ، BMW أمريكا نزلت recall على كاوتش ال-١٦ بوسة بتاع الفئة التالتة عشان بعد فترة شكل الكاوتش الخارجي بيتغير و بيخليه يعمل صوت مع الطريق ، و دي حاجة بتضايق الناس هناك ، و دة نزل في sho3nah وحدة من الكاوتش إلي نزل في تاريخ معين في الموديل دة (بريدجستون runflat Turanza في فترة من نص ٢٠٠٦ تقريباً إلى نص ٢٠٠٧ مش فاكر بالضبط )، و كان الحال كالآتي إن صاحب السياره لو كنت فيها من الشحنة دي أمامه 3 حلول :
١- لو مشي بالكوتش أقل من ٢٠ ألف كيلو يرجعه و يتغير ليه عند أقرب موزع بريدجستون مجاناً
٢- لو تخطى المسافة دي يغيره برضه عند أقرب موزع بريدجستون و يدفع نص تمن الجديد
3- لو كان أكتر من ٤٠ ألف يبقى كدة كدة إستهلك الكاوتش و مش مستاهل يتغير
و طبعاً التغيير على حساب بريدجستون و لو رفض يرجع للتوكيل يشتكي و هما يتصرفوا . انما هنا في مصر محدش سمع عن القصة دي مع إن احنا بينزل عندنا نفس الموديل ، و حتى لو حد سمع محدش هيعرف يعمل حاجة في موضوع زي كدة ، عشان مفيش حد بينظمة العلاقة بين الوكلاء و بعد ، بس يمكن دلوقتي جهاز حماية المستهلك يعرف يعمل حاجات زي كدة ، بس امتى ... لما يكون عندنا ثقافة ال-recalls
المفضلات