السلام عليكم و رحمه الله و بركاته
ديه اول مشاركه لى فى المنتدى الحميل ده و حبيت اول مشاركه تكون عن قصه بحثى عن العربيه المناسبه يمكن تفيد اى حد من الاعضاء و برضه اضافات الناس اكيد هتعلمنى
اولا انا معايا لانسر اتوماتيك 1600 كامله موديل 2008 و حصلى بسببها مشاكل كتير المهم انى ببيع دلوقتى للأنى كرهتها و اتعقدت منها و فى رحله بحثى عن السياره اللى تليها
ثانيا انا بسافر فى رحلات صيد كتير و من متطلبات العربيه انها تشيل الايس بوكس بتاعى و العده و برضه انا عندى اسره فيها 3 اطفال فالعربيه لازم تكون واسعه عموما انا عملت الاتى.. كتبت احتياجاتى فى العربيه فى شكل نقاط كالتالى
1-السعر لا يزيد عن 120000
2-سهوله اعاده البيع
3-سعر المستعمل ثابت فى السوق صعودا و هبوطا
4-تكفى ل 3 اطفال و زوجه و انا طبعا
5-تكييف قوى
6-باور
7-سنتر
8-موتور حقن
9-حجم العربيه يكون مناسب لقوه الموتور و هى فيها ركاب بالكامل
10-شنطه تشيل ايس بوكس 70 لتر
11-اتوماتيك طبعا
12-زجاج كهرباء
13-ايرباج للسائق على الاقل
14-قفل اطفال
15-توكيل قوى له وزنه
لاحظوا انى مذكرتش قطع الغيار للأنى هأمن فامش هتفرق معايا و مش عايز فرش جلد للأنى ممكن اركبه فى اى حته و معاه حساس خلفى اللى مبقتش اعرف اركن من غيره و برضه مش فارقه فى نوع الكاسيت للأنى ممكن اركب واحد و طبعا الحاجات ديه هتفرق معايا فى السعر
برضه مش فارقه معايا كورى و لا اوروبى و لا الجن الازرق لأن لى شروط لازم تنطبق على العربيه و خلاص
المهم بعد بحث بأسعار السيارات لقيت ان اكثر عربيات تنطبق عليها شروطى هى
1-اسبرانزا تيجو
2-كيا سيراتو
3-شيفروليه ابترا
4-شيفروليه كروز
5-هيونداى النترا
6-تويوتا افانزا
تقييمى الشخصى:
اسبرانزا تيجو:
فكرت فى ال 4*4 مانوال كامله و الكل شكر فيها عدا انها بتسحب بنزين كتير شويتين و شفتها كدا مره... عربيه واسعه و تشيل بس لسه مش باين هتكون حماله قاسيه و لا لأ و بعدين مفهاش دلع كده
كيا سيراتو:
فيها كل اللى كان نفسى فيه و شايف انها هتعمل سوق زى الالنترا اذا مكانش زى اللانسر و كمان كلها دلع (كان نفسى فى تحكم فى الدركسيون من زمان) بس هى المفروض كان يبقى فيها كروز كنترول كماله الدلع(البنى ادم ده طماع بشكل)
ابترا – النترا - افانزا:
برضه زى الفل بس الدلع اللى فى السيراتو يكسب
كروز:
عيبها الوحيد بالنسبه لى انها من جوه مش حلوه و ديه مسأله ازواق بقه
انا راى ان مفيش عربيه سيئه او جيده على الاطلاق .... انا عملت قائمه بمتطلباتى و بحثت لحد ما لقيت العربيه المناسبه لى و بالنسبه لى السيراتو هى اللى تنفعنى
عموما يا جماعه لو فى حد شايف ان فى عربيه تانيه تنطبق عليها الشروط اللى فوق يقول لى ابص عليها و يا رب اكون افدتكم
و انا نويت ان شاء الله اجيب سيراتو خليجى لأنه هيدينى كماليات اكثر بنفس سعر الوكيل... ادعولى بس ابيع اللانسر و الم المقدمه و البنك يدينى القرض .... يا رب
تم النقل للمقارنات
___________
مشرف قسم الكيا
المفضلات