انطباعى عن نيسانى الجديده
السلام عليكم الساده اعضاء المنتدى
اخيرا قمت بشراء وترخيص النيسان صنى المانيوال واحب ان اشكر القائمين على هذا الموقع لانه يعد مرجع جيد لاى شخص يود معرفة الانطباعات المختلفة للناس عن كل ما يتعلق بالسيارات ويساعد فى اتخاذ القرار المناسب لكل شخص
كما اود ان اشكر السادة الاعضاء الكرام الذين لم يبخلوا بتجاربهم واراءهم الشخصية عن السيارات التى يملكونها او قاموا بقيادتها واخص بالشكر الباشمهندس خالد (سبعاوى) التى تعد مشاركاته قمة فى المتعة و الفائدة
اما انطباعى الشخصى للسيارة فدة حيكون انطباع اولى انا عملت 200كم فقط واكيد مع الوقت حقدر احكم احسن بس انا كنت مركز جدا مع العيوب التى تم الكتابه عنها من الاعضاء والتى تتلخص فى الاتى :
- عفشة ناشفة وارتفاع السيارة عن الارض صغير
- عزل داخلى غير جيد
- مساحة داخليه ضيقه
- استهلاك عالى للبنزين
- تقفيل مصرى
اولا :العفشة ممتاز مشيت بيها فى شوارع كنج مريوط المكسرة محستش باى حاجة وارتفاعها عن الارض حلو جدا و لم تحتك باى مطب رغم وجود 5 اشخاص بها من الاوزان الثقيله
ثانيا :عزل جيد جدا بالنسبه للسيارات فى فئتها (الى انا ركبتها ) طبعا مجربتش كل السيارات فى فئتها بس واللة ركبت لانسر بومه العزل فيها مش احسن من الصنى خالص يمكن زى بعض
ثالثا :المساحة الداخلية لا تتناسب مع شكلها الخارجى يعنى انا معايا السوزوكى سويفت مش اضيق من الصنى مع ان شكلها اصغر يعنى هو دة ممكن يكون عيب فعلا بس انا مش مسببلى مشكلة لانى باضبط كرسى السائق للامام فالمساحة فى الخلف بتكون كويسة قوى
رابعا :استهلاك البنزين لا استطيع الحكم علية الان بس من المشوار الى عملته لحد الكنج عندى احساس انه معدل استهلاك كويس وميفرقش كتير عن السويفت الى هى 1300CC
خامسا :تقفيل ممتاز وااله احسن من كل السيارات الى فى فئتها ولم الاحظ اى عيوب فى صاج ولا تابلوة ولاكراسى فعلا تقفيل نيسان والى مش مصدقنى مش حقولة يروح يبص على الصينى الى تلاقى الطنابير بتاعت العجل زى متكون مصدية وهى لسة زيرو بس يروح يبص على الاوبترا ويشوف التابلوة بتاعها و درج الفيوزات ولا علامة شيفورلية الى على الشنطة وقارنوها بعلامة نيسان ولا تابلوة نيسان.. وادعوكم الى قراءة موضوع المهندس سبعاوى ( تقفيل مصرى ......ام الاجنبى)http://www.nilemotors.net/Nile/106154-a.html
الله ياجماعة دة مش تحيز للسيارة دة انطباع حقيقى ولو لقيت اى حاجة سيئه مع الاستعمال سانقلها لكم بامانة