الخلاصه في العربيات دي " موضوع لوز "
بعد تفليه معظم الكلام علي بعض العربيات دي الخلاصه اللي توصلت اليها
و بسم الله الرحمن الرحيم و استعنا علي الشقا بالله
اول عربيه
الفيرنا : عربيه تلاقيها تاكسي
و تلاقيها ملاكي
و ممكن تلاقيها بتخمس في فرح و متأجره
و ممكن تكون عربيه شركه ما
بيسوقها شخص ما
طبعا شغال في الشركه الما
و اللي بقولك ده ثباتها وحش بعد 120
و اللي يقولك ثباتها وحش بعد 140
و اللي يقولك شكلها وحش
و اللي يقولك شكلها جامد و شبابي
علي اساس انه بيتكلم علي هوندا
و اللي يقولك حط جنوط
و الثبات هيبقي حلو ل 160
علي اساس انها فرقت من 120 ل 140 ل 160
و علي اساس اننا بنجيب السرعات دي بيها كل يوم
و اللي يقولك صاجها ورق
علي اساس انه بيقارنها بعربيه الماني
ما كل الحديث ورق يا عم الحاج
و اللي يقولك ده جرايه و السحب ممتاز
ملازم يكون السحب ممتاز
واللي يقول و اللي يعيد
و بصراحه انا كرهت العربيه دي
من كتر ما اتقال عليها
تاني عربيه
السيراتو : عربيه انتشرت انتشار رهيب في وقت قصير
و ربنا يبارك لملاكها طبعا
لانها عربيه ممتازه بس
يعيبها بعض الاشياء هقولها بعدين
و طبعا نسمع كل يوم عن اسعار جديده النهارده بكذا و بعده بكذا
و المعارض شغاله نهب الله ينور
عشان الاقبال اللي عليها ده
و اللي يقول فيها حدفه شمال
و اللي يقول عفشتها ناشفه
ما هي لازم تكون ناشفه
يعني مش شايف الجنط اللي راكب فيها
و بعدين هو اداء العفشه كده اذا كان عاجب
و كل شويه واحد يشوف حادثه يقوم مصورها
علي اساس ان مفيش غيرها بتعمل حوادث و تخيش
و اللي يقول شوفتها تاكسي و الله حرام
و الصراحه مش خلال تجربتي في سواقتها
سوقتها في زفه اخت واحد صاحبي
العربيه فيها عيب واحد
الخامات الداخليه زي التابلوه و فرض الابواب مش قد كده
بس التقفيل فل يا معلم
و مره تانيه ربنا يبارك لملاكها
و يكفيهم شر حسد الحاسدين و قر القرارين
تالت عربيه
اللانسر : عربيه تلاقاها موجوده في كل حته
تحت البيت موجوده
جنبك في الاشاره موجوده
عند عم عبده البقال موجوده
في الحرفيين تلاقاها برضه موجوده
ده غير اسعارها الاستهباليه و الاستعباطيه من التوكيل
يعني ايه عربيه 1300 سي سي
شكلها ما اتغيرش من 10 سنه باين
و تكون باكتر من 100000 جندي
ليه ؟ بتتكلم مثلا و لا مبتعطلش
و الصراحه انا سوقتها ال 1300 سي سي الاوتوماتيك
السحب مش حلو خالص
و يا حلاوه لما تشغل التكييف
بتبقي عسل
و لا الشكل اللي اسمه شارك
مش هاين عليهم يعملوها 1600
زي بقيه العربيات الطبيعيه
و اللي يقولك دي سبورت
عشان عتب و سبويلر
ايه وجه الاسبورت في كده ؟
الصراحه انا اتخنقت من العربيه دي
عشان مفيش تميز لملاكها خالص
رابع عربيه
اللانوس : عربيه بقالها 12 سنه ماشيه
و في منها كح تراب خلاص
و متغيرش شكلها
و كمان مش هاين عليهم يعملواها فيس لفت
تعد عليه 12 سنه تانين و لا حاجه
و توكيل شيفروليه اللذيذ
مهنش عليه يغير حاجه غير الشبكه و العلامه
و الله انا سعيد و فرحان
و عامله زي الفيرنا
اخده نفس المسيره بالظبط
و لما تيجي تقارن بينهم
تلاقي واحد يقولك
الفيرنا احسن
تقوله ليه ؟
يقولك عشان 16 صباب
و هو مش فاهم يعني ايه صباب اساسا
و لا حتي عارف وظيفته ايه ؟
انا برضه اتخنقت من العربيه دي
خامس عربيه
الاسبيرانزا : كله يقول لا و الف لا صيني معفنه
و هو عمره ما ركبها عشان يحكم عليها
و اللي يقولك سحبها وحش
ما هو لازم يكون وحش
عربيه صاجها محمل و تقيل
علي مكنه 1600 سي سي
لازم تحرق علي الغيارات
عشان العربيه تشد معاك
و السحب يكون عدل
و اللي يقولك بتتقلب لوحدها
و اللي يقولك بابها بيطير لوحده
و اللي يقولك بتتقشر من الشمش
ما هو لازم تقشر
مش سعادتك راكنها في الشمس لغايه ما بقت نص سوا
لازم البويه تقشر
و اللي يقولك بتطلع اصوات
و اللي يقولك العفشه ناشفه
يا جدعان العفشه الرياضيه كده ل
ازم تكون ناشفه
و خصوصا مع الجنوط الاسبور
و اللي يقولك بتزيق من تحت
علي اساس انها باب حمام مش عربيه
يا جدعان الصيني مش وحش بس
عايز معامله رقيقه و متابعه مستمره بس
و اهي شغاله تاكسي
و متقولش بم
و لا تلت التلاته بكام عادي جدا
و برضه اتخنقت منها اكيد يعني
و اتمني ان يكون الموضوع عجبكم
و يا ريت اي جوز جنيهات تحت التراب اممممم .... قصدي تحت الحساب عشان اخوكم مزنوق نيهاهاهاهاهاهاهاهاهاهاهاه اهاهاهاهاهاهاهاهاهاهاهاها هاهاهاهاهاهاها