الموضوع: أحسن طريقة لأستثمار الأموال

المشاركة الأصلية كتبت بواسطة فتح

انا حاولت اقارن بين الوديعه والانظمه الاخرى ماعرفتش اوصل لحاجه ابدا زى بالظبط انظمه خطوط التليفون هتلاقى كل الانظمه فى الاخر مقاربه لبعضها ولا انا نظريتى غلط

الفرق في الفائدة مابيكونش كبير (في حدود 1%) بين الوديعة وحساب التوفير، الفرق الوحيد إن حساب التوفير أموال سائلة تحت إيد المودع، بينما الوديعة أموال مجمدة لا يستطيع صاحبها التصرف فيها إلا بانقضاء مدة الوديعة (ثلاثية أو خماسية أو عشرية).

المشاركة الأصلية كتبت بواسطة فتح

يعنى ممكن حساب التوفير يطلع له فيزا ايضا ولا ايه وسحب وايداع من والى واى مبلغ فى اى وقت ولا ايه

مظبوط يافندم حسابات التوفير يمكن السحب والإيداع زي مانت عاوز وفيه بنوك بتستخرج لحساب التوفير فيزا أو كارت صرف آلي بس تسأل الأول في البنك.

المشاركة الأصلية كتبت بواسطة ahmed anwer

لازم حضرتك تقول تخصصك ايه و بتحب ايه و بتفكر تعمل ايه و إمكانياتك ايه ،،

عشان نقولك ايه اللي يناسبك و محتاج ايه

طبعا الحاجات اللي ذاكرها حضرتك ممتازة كاستثمار مضمون ،

بس دي يعني استثمار اخر العمر أو فلوس الزمن ،، لكن مش استثمار عشان تحقق ذاتك ،،

باستثناء الإختيار الأخير

ممكن اديك نصائح عامة :_

1- الرزق بيد الله ،، و ده طبعا السبب لحد المليون

2- ادرس المشروع اللي عايزه كويس من كافة الجوانب ، و دور علي أهل الخبرة فيه و اسألهم بس متطولش في الدراسة ،، عشان الوقت اهم ،

3- no risk no gain

اعمل حساب أسوأ النتائج و شوف خسارتك هتبقي ايه لو انتا متقبلها و تقدر تستحملها ،، اتكل علي الله

عشان متخوضش في حاجة مش قدها ،،

4- خليك صبور و اعمل فترة زمنية مش قصيرة لتقييم مشروعك و زي ما قال أخ في رد سابق لو قعدت أول سنة أو سنتين ،، اللي جاي علي قد اللي رايح ،، يبقي انتا كده علي الطريق

5- متعملش كل حاجة بنفسك عشان إنجازك هيبقي قد مجهودك ،، ده ممكن يكون في الأول بس ،، لكن كل ما العجلة تسير استعين بموظفين و مساعدين و موردين و غيره ،، و ربنا هيرزقك و يرزقهم ،،

في مثل صيني بيقول لو عايز تكسب كل الفلوس لوحدك مش هتكسب حاجة ،،

6- ممكن نقسم المشاريع لمشاريع تجارية ، و خدمية و صناعية ،،

التجارية ،، أقلهم مخاطرة و متوسطة المكسب ،، و اكثرهم احتياج لرأس مال

اقلهم مخاطرة لأن فلوسك في بضاعة بمعني حتي لو المشروع فشل تماما البضاعة موجودة لكن المكسب محدود بناء علي المنافسة و اكثرهم احتياج لراس مال كل ما كان عندك بضاعة اكثر بتكون اقوي

الخدمية ،، اكبرهم مخاطرة و اعلاهم مكسب و اقلهم احتياج لراس مال

اكثرهم مخاطرة لأن معندكش اي راس مال مثلا لو هتفتح شركة سوفت وير او خدمات او عيادة هتأجر مكان و تدفع اجور عمالة ساعة ماهتكسب هيبقي مكسبك 300% لأنك محتطش راس مال كبير و ساعة ماهتخسر مش هتعرف ترجع و لا نكلة

الصناعية ،، متوسطة المخاطرة ، و ضعيفة المكسب و متوسطة الحاجة لرأس المال

متوسطة المخاطرة لأن بيكون عندك اصول قابلة للتسييل و في نفس الوقت عندك مصاريف عالية دورية لو خسرت متعرفش ترجعها

ضعيفة المكسب لأنك اول يد ،، واحد تاني بياخد من وراك و ممكن يكسب اكتر ده غير مشاكل العمالة و الخامات متذبذبة الأسعار و تاني يد مالهوش دعوه

متوسطة الحاجة لرأس المال و ده طبعا حسب نوعية المشروع و شطارتك فيه


فأفضلهم طبعا الخدمي و لكن ده يحتاج خبرة او مهارة معينة و الأهم طرق تسويق

و اقلهم الصناعي و لا انصح بيه غير مرحلة تانية لمشروع خدمي أو تجاري ناجح ، عشان تضمن التسويق لأنك مينفعش تعمل مشروع صناعي بمصاريف تشغيله العالية و مشاكله ،، و انتا معندكش طرق لتسويقه

7- التميز في المشروع ،،

علي عكس ماناس كتير فاكرة مش عشان مشروع منتشر و ناس كتير عملاه يبقي مخاطرته اكبر ،

بالعكس لو في 1000 فرن عيش يبقي معني كده إن المشروع ده بيكسب و شغالو مش هيفرق لو بقوا 1001

لكن تتميز في الخدمة اللي بتقدمها ،،

بس طبعا لو مشروع فكرته جديدة تماما ، يوم بينجح بتبقي مكاسبه مضاعفة و في نفس الوقت مخاطرته اكبر لأنه مشروع ملهوش سوابق و محتاج وقت اطول عشان تعرف الناس بيه

8- مهما عملت لما تبدي مشروعك هيكون في أوجه قصور ،، عشان كده بقولك متخدش وقت كتير في الدراسة و طور و انتا شغال ،، لأنك هتكون جربت و شفت بنفسك ،، و هتاخد قرارتك اسرع

اسف للإطالة ،،

اتمني اكون افادتك ،،

مشاء الله عليييييييك بجد فعلا معلومات قيمة جدا انا خت الكلام ده كوبى وعمال بحفظ فيه واكتر حاجه عجبتنى المثل الصينى مشاء الله عليك

المشاركة الأصلية كتبت بواسطة bekatcho

حضرتك الشهادات فى اى وقت لو احتجت فلوسها تقدر تروح تفكها
انا لما البنك رفع ارباحة ل11.5 رحت فكيت كل الشهادات الى معايا وعملتها من تانى
وكمان بعمل قروض بضمان شهادة مثلا وبسددها من ارباح الشهادات ومش بكون خسران نهائى

بيكون مقابل مايسمى "جدول استرداد" بيشوفوا فات كام سنة ع الوديعة وأخدت كام فوائد وبيخصموا جزء من الفلوس حسب "جدول الاسترداد". موضوع القرض بضمان الوديعة صحيح، بس بيكون نسبة من الوديعة في حدود 90% من مبلغ الوديعة.