المشاركة الأصلية كتبت بواسطة dede_dodo88
و مع كامل احترامي لرأيك المحترم برضه, مش يمكن أنت اللي مفهوم الربا عندك فيه مشكلة!!..
يعني كأنك بتقول لما تربط وديعة في بنك أنت كده بتُقرض البنك لأنه مزنوق حبتين في فلوس فالبنك وافق أنه يردهالك تاني بفوائد فكده تعتبر حرام !!
هو صحيح أه أنت لما تيجي تحط فلوس في بنك ده بيعتبر كأنك بتُقرض البنك فلوس و هيدفعلك عليها فايدة, لكن زي ما البنك بيدفعلك فايدة هو كمان بياخد منك فايدة في المقابل و الفايدة دي أنت بتكون موافق عليها و ماضي كمان. يعني هي علاقة win-win في الأخر مفيش حد كسبان و مفيش حد خسران. لا أنت زلتني عشان أنا مزنوق, و لا أنا أستغليتك عشان أنت محتاج..
...........
المهم يعني, نرجع لموضوعنا و نبعد عن شرعية فوائد البنوك دلوقتي عشان الموضوع ما يبوظش.
هو في حاجة اسمها risk/return tradeoff فكل ما المخاطرة زادت كل ما أحتمالية الربح تزيد, زي مثلاً فوائد الودائع نسبتها قليلة لأن نسبة المخاطرة فيها قلية و البورصة ربحها بنسبة أعلى بس مخاطرة أكبر و هكذا...
فأنت لازم تكون عارف مدي قدرتك على تحمل المخاطرة في أي مبلغ أنت بتستثمره و على اساسه تختار نوع استثمارك ايه..
اعتقد ان العقارات من ضمن الحاجات اللي بتجيب عائد كبير لكن فيها مجازفة كبيرة لأنك متضمنش السوق ايه اتجاهاته بالأضافه لأي عوامل خارجية أو طبيعية زي الزلازل مثلاً ممكن تأثر برضه..
البورصة, محتاجة واحد فاهم كويس هو بيعمل ايه و بيحط فلوسه في انهي سهم أو سند, و طبعاً مخاطرتها أنك ممكن لا قدر الله تخسر كل حاجة في ثانية زي ما ممكن في الثانية اللي بعدها تكسب تاني.
Tb's -treasury bills- و دي زي أسهم حكومية مبتخسرش و عائدها بيكون كويس لكنها بتبتدي تقريباً من 25 ألف على ما أتذكر أو يمكن أكتر, يعني مثلاً أنا دلوقتي عايز أستثمر 300 ألف في أزون الخزانة دي فبدفع دلوقتي مثلاً 250 ألف و بعد 6 شهور يرجعولي 300 ألف.. و دي معظم البنوك مش بتروجلها إلا لو العميل سأل عليها بنفسه و غالباً بتبقى عملاء تقال و فاهمين..
في حاجة شفت كذا حد بيستثمر مبالغ فيها أسمها star capital finance هي تقريباً شركة أستثمار أموال بس هي مش شركة مصرية بس أعتقد ليها فرع في مصر, أنا معنديش معلومات عنها الصراحة لكن شفت ناس مش قليلة بيستثمروا فيها بس بيكون بالدولار..
لو مش عايز تلعب لعبة المخاطرة دي فخليك بقى في شهادات الأستثمار و العائد بتاعها برضه مش وحش يعني بنتكلم في حدود من 10 لـ 11%..