الموضوع: البيكانتو احسن ولا الهيونداي الاي 10

انا نزلت حجزت بيكانتوا وبعدين لقي في مواقع اجنبيه بيقولوا ان الهيونداي احسن انا حابب البيكانتوا بس الاي 10 خايف ماجيبهاش واندم ممكن بعد كده انتوا ايه رايكوا وعايز اسأل برضه اي الالوان اللي نزلت في الخليجي ومانزلتش في المصري؟

بجد مكنتش عايز ارد بس الموضوع مستفز جدا لان فيه كم كبير جدا من الفتاوى

كلام صاحب الموضوع صح كل اللى قيموا العربيتين قالوا ال i10 افضل

بس اللى انا متأكد منه مليون فى ال 100 ان ال i10 اوسع من البيكانتو و دى بتتعرف بالتجربة اقعد فى الاتنين و احكم

الميزة الوحيدة فى البيكانتو عن ال i10 ان كراسيها طريه اكتر و تديك شعور بالراحه

انا امتلك i10

و لسه سايق امبارح بيكانتو الشكل القديم بس عامله اكتر من 101,000 كم و عفشتها كويسه بس حسيت انها طريه حاجه بسيطه عن ال i10... بس مقدرش احكم و اقارن الاتنين لان البيكانتو عفشتها خفت مع الاستهلاك ده او يمكن بسبب ان الكراسى طريه حسيت بكده بس مع الحفر و النقر شعرت بنفس نشوفية العفشة اللى فى ال i10.. الملحوظ اوى فى البيكانتو تزييق و تخبيط فى التابلوه من المنتصف و من الهوايات.. و مشوار دواسة الدبرياج لا يتعدى 7 سم بالتالى غير مريح فى الطلعة على الغيار الاول بس يمكن العربية مغيره دبرياج او اكيد

فراملها اضعف من ال i10 و مكانش فيها باور و كانت عذاب, انا عرقت و مكنتش طايق نفسى و عرفت اهمية الباور حتى و لو فى توكتوك

أما من ناحيه الارتفاع عن الارض الاتنين عاليين عن الارض و الحمد لله ال i10 عمرها ما حكت معايا فى اى مطب حتى و العربية محمله على الاخر.. لكن الناس بتتخدع بأن اكصدامها من قدام اقرب للارض حوالى 1 او 2 سم من البيكانتو.. فبيقولوا البيكانتو اعلى شوف من بطن العربية من عند الكرتيرة و الشكمان مين فيهم ليه خلوص اكبر و احكم لان الحكم مش بالشكل

انا جربت البيكانتو فى السواقة جوا البلد و مسوقتهاش على طريق سريع علشان حكمى يبقى اشمل من كده

لكن من الاخر فعلا العربيتين قريبين من بعض لان هيونداى و كيا واحد.. و انا بصراحه اعجبت بهدوء مكنة البيكانتو اللى عامله اكتر من 101 ألف كم هى ممكن يكون صوتها اعلى من ال i10 عندى بس بشكل يصعب ملاحظته و كمان مفيش اهتزازات فى البيكانتو زى ما انا كنت متخيل

من الاخر شوف العربية اللى انت مقتنع بيها اكتر و توكل على الله

العامل النفسى هام فى الاختيار علشان متندمش و اهم حاجه تكون مقتنع بعربيتك و حاببها, انا كنت معجب جدا بالبيكانتو و ال i10 بس ال i10 كانت شدانى اكتر شويه لان شكلها من قدام كان عاجبنى و بالذات لانى قريت تقارير انها افضل من البيكانتو و عفشتها افضل

شوف اللى عاجبك فيهم و هاته و متسمعش كلام دى هندى و دى كورى.. البيكانتو كورى و فى ناس هنا اشترتها و عندها مشاكل فى الكبالن دى ممكن تكون عيب صناعه بس فى نفس الوقت انا مسمعتش حد اشتكى من i10 الحمد لله رغم انها هندى بل بالعكس العربية قريت ان مكونات العفشة فيها المانى و بصراحه اثبتت كفاءة انا كلت بيها بلاعات و حفر و كام مطب و مش مربط عفشة و ماشيه 13,100 كم زى الفل ما شاء الله

كمان انت عندك اختيار تالت السوزوكى سيلاريو فيها كماليات اكتر و وسائل امان كتيره بس فى المقابل مكنة 3 سلندر يعنى سحب اقل من الاتنين لكن استهلاك بنزين افضل منهم.. و زى ما قلت هعيد تانى العربيتين ممتازين بس شوف انت ميال لايه؟ بس كده علشان العملية متبقاش اى كلام و اللى بيقول حاجه يقول جربها ولا فتى