للاخ الفاضل مهندس طارق..استفسار عن الاسعار؟

السلام عليكم بشمهندس طارق
و الله وحشني كتير ....

من فضلك يا بشمهندس ممكن اعرف سعر المساعد الامامي يمين و ايضا المقص الامامي يمين
و كمان المساعد الاصلي بيكون عليه لوجو اللانسر ولا لأ عشان اعرف افرق بينهم
برضه انواع المقصات عشان اعرف الفرق بين الاصلي و الغير اصلي
سؤال هامشي كده يا بشمهندس بخصوص تيل الفرامل سعره كام عندكم في التوكيل دلوقتي لاني لسه مغير التيل في اسكندرية و بكل اسف بيصفر لكن بعد فترة من المشي فمش عارف ممكن يكون اضحك عليا و حطوا نوع مضروب و لا ايه

اسف للازعاج يا بشمهندس طارق و منتظر رد حضرتك بشغف شديد


محمد فهمي

للتذكرة فقط يا بشمهندس طارق - انا عارف ان يوم الجمعة هو اجازة حضرتك - منتظر الرد بشغف


محمد فهمي

اهلا يا استاذ محمد واحشني والله بس كده يا راجل متروحش مقابلة امبارح (ما انا كمان ما روحتش بس انا قاهري انما انت اسكندراني يعني المفروض ملكش حجة) عموما باذن الله نتقابل في مقابلة ابريل عيد ميلاد المنتدى التالت زي السنة اللي فاتت

عربيتك 1300 مش كده يعني كاوتش 14 مش 15 لأن العفشة مختلفة

المساعد الأمامي الواحد سعره 870 جنيه + 10%
انا جبت مساعد اصلي وصورته

http://www14.0zz0.com/2010/02/21/07/909060384.jpg

وهو معلهوش علامة ميتسوبيشي ولونه اسود ومحفور عليه كلمات
S_B_SHI SHOWA APAN 090617 وكذلك عليه استيكر ابيض مكتوب عليه رقم الصنف MR519614 ورقم آخر 090622



المقص الأمامي سعره 735 جنيه + 10%

بخصوص التيل سعره 385 جنيه + 10% وممكن التيل الأصلي يصفر وده بيكون محتاج سوستة تيل

ربنا يباركلك يا بشمهندس طارق و دي مش غريبة عليك طبعا
مقابلة اول امبارح بكل اسف كان عندي شغل و زي ما حضرتك عارف ان بشتغل اسبوع شغل و اسبوع اجازة و بكل اسف انا عارف من شهر فات اني مش حقدر احضر و بلغت الشنوري انه لو امكانية لتأجيل المقابلة انما طبعا الموعد كا مناسب للاغلبية و حقيقي و الله كنت في منتهي الحزن انما اكل العيش بقي حنعمل ايه و بالرغم من ان يوم الجمعة ده بالنسبة لي بيبقي يوم تجمع للعائلة و بيعرضني لعقوبات اسرية قاسية خاصة من امي الا اني بتصرف في حالة المقابلة لما بتكون في اسكندرية زي السنة اللي فاتت كده و زوغت منهم و حضرت في الربع الاخير من المقابلة
- بخصوص اسعار المساعد و المقص انا بشكر حضرتك كتير جدا لاني اضطريت اركب مساعد يمين امامي و مقص يمين امامي و كذلك تيل فرامل عند توكيل مجدي شاهين في اسكندرية و كان سعر المساعد 950 جنيه و المقص اليمين 750 و التيل 315 و تغيير الزيت و الفلتر 300 جنيه و الاجمالي كان 2325 و بعد تدخل مجدي شاهين شخصيا تم التخفيض الي 2000 جنيه فكنت خايف لا يكونوا بيشتغلوني في الاسعار بالرغم من علاقتي بالمهندس مجدي شاهين انما تقريبا الاسعار واحدة لكن و الله انا نفسي اجي لسيادتك في توكيل قليوب لاني علي كلام الاخوة هنا و سيادتك حاسس ان امكانياته اشد من مجدي شاهين - ربنا يسهل و اقدر اجي اعمل عندكم صيانة قريب ان شاء الله
لكن بصراحة حسيت بفرق كبير في العفشة بعد تركيب المساعد و المقص انما التيل يا بشمهندس من تاني يوم و هو بيصفر خصوصا بعد فترة من السير يعني تقريبا لما بيسخن و حبقي اروحلهم قريب ان شاء الله عشان يشوفوا صرفة فيه
مرة تانية اشكر حضرتك كتير مع وعد بلقاء قريب ان شاء الله

محمد فهمي