انا أشتريت عربية سيراتو 2008 اتوماتيك الشكل القديم من التوكيل فى أغسطس 2008. و بعد لما رخصت العربية حست بصوت دبدبة و تخبيط فى الجزء الأمامى الأيمن فقلت يمكن الهواء مش مضوط عديت على محطة ينزين و زبطت الهواء 100% و لكن الصوت لسة موجود. كلمت التوكيل و سألت أحد المهندسين اللى قال دة طبيعى فى الأول وبعد 1000 كم كل شئ يبقى تمام و العربية عربيتنا فى اى وقت ياباشا. حاجة جميلة و معاملة رائعة و تبشر بخير, كملت ال 1000 كم و و الصوت لسة زي ماهو بيبقى التخبيط جامد الصبح أول لما أمشى و يبتدى يخف شوية بشوية لكن مابيروحش خالص. ورحت مركز القطامية و قابلت المهندس و قال " العربية سليم 100% و ما فيهاش أى حاجة و هو دة صوت عفشة الكيا و لازم تعرف انك شارى عربية كورى مش يابانى". ودى كانت أول صدمة و قلبت الدنيا و بعت لكوريا و كلمت الصيانة و قالوا تعالى عندنا فى أبو رواش و أحنا نشوف و رحت و قعدت مستنى ساعتين و طلع لى واحد و قال نفس الكلام و حاولت أشرح لة ان الصوت بيبان أوضح مع الحركة الأولى ومش يعد ساعة سواقة من التجمع الخامس لأبو رواش. فكان ردة سيب العربية و احنا نجربها الصبح. و فعلا سبت العربية و بعد يومين كلمنونى و قالوا الخبير الكورى جربها و قال كلة تمام كانت محتاجة تربيط عفشة و كلة تمام دلوقت. و رحت المشوار تانى و خدت العربية و روحت, وبعد يومين رجع الصوت زى ما كان. كلمتهم تانى و هنا بدأ الرد الشهير العربية تمام و انت اللى بيتهيألك. ساعتها قررت ان اشتكى لجهاز حماية المستهلك و بعت لكوريا و فاكر كمان انى كتبت عن الموضوع دة فى المنتدى هنا, و هنا كلمنى المهندس خالد فاروق و بعد عدة محاولات الراجل وافق مشكورا انة يعدى على بيتى الصبح فى التجمع و يركب العربية معايا و يشوف, و فعلا بعد اقل من خمسين متر سمع الصوت و قرر انة ياخد العربية على مركز القطامية و يغير المساعدين و الشدادت و الصوت قل جدا و ان كان لسة موجود. مجهود يشكر علية و يحسب لة, لكن انا لى هنا وقفة, الأول قالوا مفيش حاجة دة صوت الكيا و بيتهيألك و بعدين طلع الكلام حقيقى و غيروا المساعدين و خلافة يعنى كان انكار لمجرد الأنكار لتغطية الفشل فى التعرف على المشكلة, و اسهل الطرق اهانة العميل و اتهامة بأنة بيتهيأله و انة بيحاول ان يسئ لسمعة العربية الغلبانة و انة خيالة مريض.
لكن المشكلة انة بعد أسبوع بدء الصوت يرجع زى الأول و حاولت معاهم و فشلت و قررت ساعتها ان أتعايش مع المشكلة و أغير العربية فى أول فرصة.
المهم فى صيانة 15000 قلت لمهندس ورشة روكسى و قال كلة تمام تبيط عفشة. بعد كام يوم بدأت العربية تسقف على المطالع و مش عيب بنزين و كمان بدء صوت يروح و يجى مع اعوجاجات الطريق العادية و بدأت احسن بخشون بتسمع فى الدريكسيون و تحت رجلى مع دواسة الفرامل و كمان العربية بدأت تحدف شمال و يمين مع الفرامل مع الطرق اللى مش ناعمة قوى. ورحت للصيانة فى روكسى تانى و الرد المعتاد تربيط عفشة و كلة تمام, و سألت المهندس انت لسة مربط العفشة من أسبوعين فرد يمكن انت بتمشى فى اماكن وحشة و الطرق فى مصر مليان مطبات. خدت العربية ومشيت يومين و الصوت رجع تانى الدبدبة الأولانية و كمان صوت الخشونة بدء يزيد و بقى عامل زى صوت لرولمان بللى خشن و قرب يفرط و رحت تانى لروكسى و كان رد المهندس محمد مفيش حاجة و بيتهيألك و سألتة يعنى أية بيتهيألى فقال يعنى الصوت دة فى راس حضرتك بس و مالهوش وجود غير عندك لوحدك.
هنا بقى انا قررت انى اشارك الجميع فى هذا الموضوع و معفة أعراض مرض التهيؤات اللى انتشر فى ملاك السيراتو يمكن لما نتكلم مع بعض نلاقى علاج لحالتنا و لا نصعب على دكتور نفسانى يعالجنا من اللى احنا فية.
المفضلات