يا فرحة ما تمت عالبلوبيرد
السلام عليكم
انا من زمان مهتم جدا بالبلوبيرد سيلفي من يوم ما شفتها في اوتوماك 2009.
مش حاوصفها لأني متأكد ان معظم الناس هنا سمعوا عنها.
اللي كان محيرني ليه العربية دي مش ماشية في مصر. يعني من يوم ما نزلت (يونيو 2009) و حتى الآن ماشفتهاش ماشية في الشارع غير مرة واحدة و كنت لولا الملامة هاوقف الراجل و اسأله عنها لولا ان كان معاه عيلة.
فكان السؤال اللي مش لاقي له اجابة, ليه العربية دي ما بتبيعش مع انها رائعة في كل حاجة. يعني الأداء المميز لنيسان في عربية عائلية من الدرجة الأولى.و اذا كان الموضوع انها صيني طيب بس دي Made in Nissan يا جماعة. طيب ما فيه عربيات صيني صيني و لا كان حد سمع عنها قبل كده و بتبيع ب 150 و 160 الف زي البريليانس و الحاجات ال 4X4 الجديدة، و قابلني ياباشا بعد 5 سنين و فرجني ازاي الحال.
المهم من كام يوم سمعت عالراديو حملة اعلانية لشركة دايهاتسو عاملين تقسيط مباشر بفايدة 4.5% تقريبا للسيريون. قلت اهي دي ناس عايزة تبيع. مش كان نيسان مصر يعملوا كده كانت العربية تتحرك شوية.
المهم بابص في اهرام الجمعة اللي فاتت فوجئت في الصفحة الأولى لملحق السيارات
"اوتو ايجيبت تعرض السيلفي بتقسيط مباشر بدون فوايد"
قلت الله اكبر اخيرا الناس عملوا حاجة صح، يعني لو الواحد قسط 60 الف على 3 سنين مثلا هيوفر حوالي 15 الف من الفوايد كده تبقى 100%.
النهارده السبت ما كدبتش خبر و اتصلت ب 16666.
قال البيه(على رأي رأفت فهيم للي يعرفه):"العربية موديل 2009 بسعر 138 الف. تدفع النص و الباقي...................................... ........................................
على سنة
طيب بالذمة ده كلام؟ يعني لو الواحد يقدر يقسط 70 الف على سنة ما كان اشترى كاش.
اعتقد ان ده يجاوب على سؤال العربية مش بتبيع ليه.
التوكيل مالوش مزاج
مع تحياتي
د.عيد