رجالة اللانوس الجامدين, العربية عايزة صياااانة!
السلام عليكم ورحمة الله وبركاته,
بإختصار يا جماعة العربية بتاعت الوالد بس أنا تقريبا اللي بركبها معظم الوقت, المهم أنا حاسس إن العربية فيها حاجات كتير محتاجة صيانة, وانا الوالد عندي صيانة يعني تَغيير زيت وفلاتر وبس, و طقم السيور اتغير من كذا شهر كده.
المهم, نشوف بقى المشاكل.
1- أول مندور العربية, صفيير غبي قوي من السير, الله أعلم أنهي واحد, في أي جو سواء حر أو برد.
2- فيه صوت من الشكمان صوت كده مش عارف اوصفه بس هو غريب قوي زي رعشة كده وبيبان قوي في النقلا التانية في أولها.
3- العربية تسارعها وحش قوي في رأيي, يعني أنا كنت قرأت باين إن تسارعها في 14 ثانية, أنا حاولت كذا مرة معرفتش أجيب اقل من 18 ثانية.
4- العربية بعد ال 100 بأحس إنها خفيفة قوي مش عارف ليه, وبتجيب 140 بالعافية وساعتها بأحس العجل هيتفك. شكلها كده عايز ترصيص و تربيط عفشة ولا ايه ؟
5- العربية...ساعات...وده حصلتلي مرتين في الجو البرد, بعد مابتدور, والحقن يشتغل وبتاع, أحس إن العربية هبطت جامد قوي وكإن ال rpm نزل على 400 أو 300 مثلا وبأحس إنها عايزة تبطل ودوسة البنزين بتبقى مقطعة قوي.
6- المساعدين اللي قدام في المطبات الصغيرة الحديد ده ساعات برده بتخبط جامد, معرفش ده باطحات ولا ايه.
7- العربية في الملفات يمين شمال وممكن في المشي كمان لقدام بيطلع صوت تكتكة, كده محتاج كابالن أكيد, يا ترى اسعارهم ايه ؟
8- العربية مساعدينها أو عفشتها في المجمل خفيفة قوي أو طرية الله أعلم, بس في الحتت المكسرة العربية بتبقى عاملة زي المرجيحة يمين وشمال, معرفش هي طبيعتها كده ولا أنا عندي مشكلة ؟
في النهاية يا ريت تنصحوني أعمل صيانة شاملة في حتة كويسة ولا ايه ؟ عشان بصراحة وانا ماشي بالعربية بأبقى متضايق من الحاجات ده وعايز اعالجها.
بس بصراحة رغم العيوب ديه أنا بحترم العربية جدا عشان معملتش معايا حركة قلة وعطلت مني قبل كده في خلال ال 3 سنين وال 140 ألف كيلو اللي عملتهم.
مستني ردودكم يا رجالة.
