الموضوع: أرجينتا والا بولونيز؟

بسم الله الرحمن الرحيم
الارجنتا

المشاركة الأصلية كتبت بواسطة khmonir

الأخوة الأفاضل

أنا بدور على عربية في حدود 16000
وكنت في البداية بدور في الـ 128 والـ 127 لأن مكنتش عارف إن ممكن ألاقي حاجة كويسة وكبيرة بالسعر ده
وبعدين لقيت إعلانات لبولونيز بالسعر ده موديلات من 86 لحد 90
ثم وجدت عروض للسيارة الأرجينتا ولكن موديل 81 وتقريباً في نفس السعر

والآن أنا في حيرة أختار البولونيز لموديلاتها الأحدث
أم أختار الأرجينتا لأنها السيارة الأفضل؟

أرجو المشورة

أخي الفاضل
أنصحك نصيحة لله
لو في قدامك عربية أرجنتا بـ 16000 جنيه ماتخدهااااااااااااااااش علشان هتتعبك لأنها هيبقى فيها شغل كتيير لأني قبل ما أجيب البولونيز دورت كتير على أرجنتا مالقتش حاجة كويسة يعتمد عليها والكل ضارب في العالي 18000 جنيه وفيها شغل وإللي معاه أرجنتا فبريكة على أبوها.. مش هيبيعها بالسعر ده.. وأعتقد مش هايبعها خالص.. لأنها عربية جميلة وقيمتها أكثر من ثمنها الحالي.

أقدر أكلمك على البولونيز ولا فخر أنها عربية شديدة التحمل وده عن تجبرة ممكن الـ 16000 جنيه يجيبوا عربية كويسة ولو فيها مصاريف هتبقى بسيطة جداً لا تتعدي الـ 400 أو 500 جنيه، بس جبها من واحد يكون أمين، أنا امتلكت الـ 127، و128 ولم أرتاح لهم أبداً وذلك للضعف الشديد للبودي أما العربية البولونيز إحنا هنا بنسميها (المدرعة الملاكي) وممكن لو عايز تعرف تفاصيل أكثر أدخل على قسم الفيات هتلاقي موضوع أسمه البولونيز المظلومة.
من الآخر أكثر عربية في بلدنا تستحمل المطبتات والمناطق الوعرة وتسد أمام سائقين الميكروباص والأتوبيسات الرخمين إللي ممكن يريحوا عليك ويغلسوا علشان يعدوا منك، وبرده مش هيعرفوا يعدوا من العربية دي نظراً لأنها محاطة بكاوتش في الأجناب محمل حديد من الداخل واقصدامات كاوتش محملة وده ممكن يخوف كتير من العربيات إللي حواليك نظراً لأنهم بيعتبروا البولونيز عربية مصفحة ده غير أن الصاج بتاعها السميك إللي ماشفتش زيه في موديلات أخرى، ده غير أن الصالون بتاعها واسع ومريح جداً وممكن تركب فيها 7 أفراد مش هتقول لأ، عفشة تظبطها وتنساها سنين، ممكن يركب ليها موتور 132 الـ 1600 أو الـ 131 الـ 1600 الألماني وساعتها هيبقى معاك وحش كاسر على الطريق تسافر بيها السلوم وتيجي، سيبك من إللي يقول لك (دي عربية ثقيلة والدركسيون عايز إثنين يشدوه) أنت مش هتعرف مميزات هذه السيارة إلا أما تجرب قيادتها فعلاً دون ان يشتتك أحد برأيه المبنى عن جهل
وده أقل ما يقال على البولونيز
أرجو أكون أفدت
وربنا يوفقك وابقى طمنا عملت إيه

المشاركة الأصلية كتبت بواسطة khmonir

الأخوة الأفاضل

أشكركم على الرد

أخي asaeed
أنا فعلاُ في الأول كنت بفكر في البولونيز ، لكن لما ظهرت قدامي الأرجنتا بدأت أفكر فيها ، والعربية دي مش الوحيدة ، فيه واحدة موديل 81 فابريكة جوة بـ 20000 وصاحبها قال لي إنها محتاجة 500 بس تصليح في الكرونة علشان فيها ونة ، وده اللي قلقني منها لأني مش عارف تصليح الكرونة ده بسيط والا لأ ، وملقتش ما يفيد في ده

أنا عارف إنها مش أقوى من البولونيز لكن هي مريحة وشكلها جميل ، علشان كده أنا احترت
واللي فهمته من كلامك إن ليها الأولوية لو حالتها حلوة لأن اعتراضك إن الـ 16000 ميجيبوش أرجينتا حلوة ، لكن لو لقيت واحدة ممتازة قريب من السعر ده أجيبها والا برضه أخليني في البولونيز

منتظر ردك

بص يا باشا
البولونيز عربية حلوة وجميلة جداً، ولكن الأرجنتا لو حالتها حلوة وعلى أبوها من حيث الدواخل والشاسيه ومايكنش إتغير فيها حاجة كما ذكرت من قبل فهي تكون في المركز الأول ثم البولونيز في المركز الثاني
بس زي ما قلت أهم حاجة الحالة وبرده الـ 16000 مش هيجيبو أرجنتا حلوة، وزي ما أنت ذكرت كان في واحدة قدامك بـ 20000 جنيه وكان فيها شغل.
بس لي ملحوظة الكرونة عمرها ما تعيب عربية ممكن تتشال وتركب واحدة تاني والمبلغ مش هيزيد عن 1400 جنيه تقريباً، ودليل على كلامي أن في شاهين موديلات التسعينات والـ 2000 بيبقى فيها ونة في الكرونة وبيغيروها عادي
وربنا معاك لأن اختيار العربية ده شيء صعب