ازاى اروح جمصه

**abd_el_7amid** · 22-02-2010 01:12 PM

السلام عليكم
والله كنت عايز اعرف اروح لجمصه من القاهرة ازاى بس يا ريت يكون صحرواى لان الزراعى ممل اوى ... وهياخد وقت اد ايه؟؟؟؟

**بحري** · 22-02-2010 02:07 PM

وعليكم السلام ورحمة الله وبركاته
مينغعش تروح جمصة صحراوي من القاهرة، إما بتروح زراعي أو عن طريق بورسعيد ودي لفة مش معقولة طبعا

**KSA2011** · 22-02-2010 02:12 PM

الى انا اعرفه الزراعى الى هتروح فيه على بنها وبعدين ميت غمر و هتدخل المنصوره علطول تكمل على كوبرى المنصوره وتنزل على الطريق الجديد الى يطلعك على الدولى هى فى اخر الطريق الجديد ده وبيتهيالى ده اقرب طريق ليك

**abdallah2010** · 22-02-2010 03:01 PM

لو مش عاجبك الزراعى
اطلع صحراوى لحد الإسماعيلية و منها لبورسعيد و بعدين خد الدولى لدمياط و كمل لحد جمصة

**ahmedsamir79** · 22-02-2010 03:43 PM

المشاركة الأصلية كتبت بواسطة abdallah2010

لو مش عاجبك الزراعى
اطلع صحراوى لحد الإسماعيلية و منها لبورسعيد و بعدين خد الدولى لدمياط و كمل لحد جمصة

بس كده كتييير قوي

**abdallah2010** · 23-02-2010 11:35 AM

عارف إنه كتير أوى
بس فى ناس بتبقى مزاجها تسوق

**ahmed2000** · 23-02-2010 06:43 PM

طيب كويس ان انتا فتحت موضوع انا عاوز اروح جمصة بس من طنطا ومعرفش طرق ولاحاجة فياريت تتدلوني

**KSA2011** · 23-02-2010 10:15 PM

تروح المحله يا باشا ومن المحله على المنصوره و منه على جمصه ههه

**محمد بازيد** · 14-03-2010 04:45 PM

الاخوة الافاضل اعضاء نايل موتورز

يسعدنى انى ارد عليكم فى موضوع الوصول لجمصه خاصة مع دخول الصيف وربنا يديم علينا الاجازات خاصة انى من المقييمين فى جمصة بصفة شبة يومية
أولا الطريق للقادم من القاهرة العامرة
بص ياسيدى جنابك تصلى الفجر وتبدا تتحرك وذلك لهدفين أولا الطريق فاضى والجو جميل ثانيا الكماين اللى على الطريق مش بتقف قبل الساعة 7 وحضرتك هتكون وصلت بالسلامة
نبدا بالطريق حضرتك من اى مكان فى القاهرة هتأخذ الطريق الزراعى بتاع الاسكندرية لغاية لما توصل كوبرى بنها وتنزل من علية يمين هتلاقى كلية التربية الرياضية بتاعة بنها على يمينك وحضرتك هتاخذ الطريق الى المنصورة وبراحتك على الطريق يعنى ممكن تمشى 100 حلوة بس خلى بالك من المطبات الصناعية حلو الكلام هتفضل ماشى مسافة بتاع 50 كيلو لغاية لما توصل كمين سندوب ودة كمين عادى مش بيوقف حد هتعدى الكمين وبعدة بحوالى 150 متر هتلاقى كوبرى اطلعة وافضل ماشى بس خلى بالك هتلاقى مبانى على اليمين بتاعة جامعة خلى بالك عندها مطبين جامدين وبعدهم بحوالى 1كم هتلاقى مطبات وانت فى طريقك عادى جدا هتلاقى كوبرى فى وشك اطلعه وانزل من علية هتلاقة كوبرى عرضى على الطريق خش من تحتة على الطريق اللى فى وشك على طول لا تروح يمين ولا شمال مسافة 49.5كم بس نصيحة خلى عنيك فى نص راسك ومحدش يسخنك علىالجرى الطريق حلو ومفيش لة امان الملفات بتاعة مميتة هتلاقى الطريق الدولى الساحلى فى وشك يمين دمياط وراس البر وبورسعيد وشمال اسكندرية وبلطيم ومرسى مطروح وتاخذ يوترن وتلاقى بوابة جمصة هتطلع واحد بندق للى واقف على البوابة وبعدين تدخل جمصة لو حاجز مفيش مشكلة لو مش حاجز ممكن تحجز فى نفس اليوم عادى جدا وجمصة مش كبيرة ان حد يتوة فيها واجازة سعيدة

ثانيا اللى قادم من طنطا والمحلة لو من طنطا هتاخذ الدائى بتاع طنطا لغاية المحلة وبعدين طريق المحلة المنصورة ومتطلعش الكوبرى بتاع المنصورة انت تلف من تحتة وتدخل الطريق بتاع جمصة
يارب اكون قدرة افدكم زى ماانا بتعلم من نايل موتورز واى حاجة انا فى الخدمة بجد والله اللى عايز يسال انا تحت امره .......... محمد حامد

ملحوظة الشرح دة حصرى لنايل موتورز اللى عايز ينقله اى مكن تانى بس بسرط يقول المصدر