عايز ابدل عربيتى المانيوال بواحدة اوتوماتيك - رجلى اشتكت من الدبرياج

السلام عليكم يا شباب
اخباركم ايه
بقالى كتير ما بدخلش على الجروب بتاعكوا و وحشنى والله
بس انتوا السبب
كنت برجعلكوا لما الاقى مشاكل و بتساعدونى احلها :S_thum1[1]: و مدخلش تانى
عموما كالعادة بردوا بسألكوا على اللى محتاجلوا
المرة دى بقى معنديش مشكلة محتاجة صيانة
محتاج اخلص من المانيوال - رجلى الشمال بتدعى عليا
انتوا سيد العارفين بشوارع مصر الرااااااااااااايقة و الطرق الفاااااااااااضية
و تقريبا مش بتحتاج تدوس دبرياج اكتر من 3 ساعات و انت مروح من الشغل يوميا (شغلى فى اكتوبر و بيتى فى حلوان)
و بصراحة قررت ابيع العربية و اشترى واحدة اوتوماتيك 2000 سى سى ايكوتيكCD - CDX
أو ابدلها مع حد يكون بيحب المانيوال علشان صيانتها اسهل طبعا
ادينى قلتلكوا على اللى بفكر فيه
قولولى رأيكم هل انا صح ولا غلط
و لو حد يحب يبدل معايا بالفكرة دى معنديش مانع و نخلى اى مركز صيانة يشوف العربيتين و نحدد الفرق فى السعر بما يرضى الله
انا عربيتى موديل 2002 فضى و عملتها صيانة كاملة بعد ما اشتريتها و غيرت عفشة امامى و كمبروسور تكييف و كاوتشات و رشيها نضافة ( مرضيوش يجددولى رخصة فى المرور علشان الدهانات كانت محروقة من الشمس بس كانت فابريكة بالكامل و رشيتها عند عبد الله اوبل)

بص نصيحة منى بيع الاول لان ببساطة محدش بيركب ال2000 اليكوتك هينزل ويركب 1600 منوال فرق كبير فى الامكنيات بص انت عايز فيها كام انا كان فى بتاع 6 اشخاص كلمونى على عربية نضيفة انا ممكن ابعتلك نمرهم او انت تقولى السعر وانا اكلمهم لونى مبحبش الشغلانة دية بس لو نضيفة خسارة هى عملة كام كيلو متر

بدل على خيرت الله. بس حدد اكثر من اختيار و مش لازم 2000 cc موديلات بعد 2000 علشان رسوم الترخيص.
حاول تبيع وتدخل فى عربية من بائع اخر لان العادى محدش بينزل من اوتوماتيك علشان يركب مانيول.

2000 واتوماتيك
دى تبقى حاجة تماااااااااااام
ربنا يوفقك

الأفضل بيع و امسك فلوس
لأن ساعة الشراء الفلوس ببتكلم

ياباشا ولا بتتكلم ولا حاجة مهو مفيش ولا عربية قدامي و الفلوس حاضرة و العربيات مفيش مش عارف اعمل اية ابعت اجيب واحدة من المانيا ولا اية :d

اقتباس:

---

المشاركة الأصلية كتبت بواسطة opelvectra

ياباشا ولا بتتكلم ولا حاجة مهو مفيش ولا عربية قدامي و الفلوس حاضرة و العربيات مفيش مش عارف اعمل اية ابعت اجيب واحدة من المانيا ولا اية :d

---

هو ده اللى مخوفنى من موضوع انى ابيع و بعدين ادور اشترى
لو ملقيتش هيبقى مقلب حكاية
و خصوصا انى صعب استغنى عن العربية فترة كبيرة لأنى بتحرك كتير بالعربية و لو أجرت عربية الفترة ما بين البيع و الشراء هدفع فلوس كتير لحد ما اشترى أو هبقى مستعجل و اشترى اى حاجة و خلاص

انا اتعلمت الأدب بسبب الحوار ده
انا بشترى و اعربن قبل ما ابيع

بس الفكترا ال2000 سي سي علي افا مين يشيل كتيرة جدا وبالزات بعد ما الضرائب زادت بقا في ناس كتير عايزة تخلص منها في مواقع جامده جدا هاتلاقي فيها عربيات فكترا كتييييييييير للبيع .. دور كويس وانت هتلاقي كتيييييييييير

غيرلها مكنة بمكنة 2000 أوتو
أو غير الفتيس

انا حابب عربيتى عشان 2000 مانيوال مش اتوماتيك

اقتباس:

---

المشاركة الأصلية كتبت بواسطة me3mary

السلام عليكم يا شباب
اخباركم ايه
بقالى كتير ما بدخلش على الجروب بتاعكوا و وحشنى والله
بس انتوا السبب
كنت برجعلكوا لما الاقى مشاكل و بتساعدونى احلها :s_thum1[1]: و مدخلش تانى
عموما كالعادة بردوا بسألكوا على اللى محتاجلوا
المرة دى بقى معنديش مشكلة محتاجة صيانة
محتاج اخلص من المانيوال - رجلى الشمال بتدعى عليا
انتوا سيد العارفين بشوارع مصر الرااااااااااااايقة و الطرق الفاااااااااااضية
و تقريبا مش بتحتاج تدوس دبرياج اكتر من 3 ساعات و انت مروح من الشغل يوميا (شغلى فى اكتوبر و بيتى فى حلوان)
و بصراحة قررت ابيع العربية و اشترى واحدة اوتوماتيك 2000 سى سى ايكوتيكcd - cdx
أو ابدلها مع حد يكون بيحب المانيوال علشان صيانتها اسهل طبعا
ادينى قلتلكوا على اللى بفكر فيه
قولولى رأيكم هل انا صح ولا غلط
و لو حد يحب يبدل معايا بالفكرة دى معنديش مانع و نخلى اى مركز صيانة يشوف العربيتين و نحدد الفرق فى السعر بما يرضى الله
انا عربيتى موديل 2002 فضى و عملتها صيانة كاملة بعد ما اشتريتها و غيرت عفشة امامى و كمبروسور تكييف و كاوتشات و رشيها نضافة ( مرضيوش يجددولى رخصة فى المرور علشان الدهانات كانت محروقة من الشمس بس كانت فابريكة بالكامل و رشيتها عند عبد الله اوبل)

---

أنا عايز أرش عربيتي و كنت عند عبدالله و اتكلمت معاه لكن لسه ماتفقناش فياليت تقولى بما انك رشيت عنده ، مستوى الرش كان عالي و لا متوسط ؟ اتكلف قد ايه ؟ نوع البوية ؟ و مشكور مقدما.

انا عايز ارش العربية نضافة بس عايز اسكنز او اى نوع المانى تانى
الكيلو بمشتملاته يعمل كام

اقتباس:

---

المشاركة الأصلية كتبت بواسطة tananybasha

انا عايز ارش العربية نضافة بس عايز اسكنز او اى نوع المانى تانى
الكيلو بمشتملاته يعمل كام

---

المسئول عن القصة دى عند عبد الله واحد شغال فى التوكيل اللى على الصحرواى و شغله كويس جدا

الدهانات اسمها ( تيبون ) بلجيكى مش المانى و دى اللى شغاليين بيها فى التوكيل بناء على كلامه
لكن سعر الكيلو كام بالظبط مش فاكر
و هى طالعة كويسة الحمد لله
لكن فعلا دهان الفبريكة ما يتعوضش ، الجديد ده بيتجرح بسرعة

اقتباس:

---

المشاركة الأصلية كتبت بواسطة daaark

بس الفكترا ال2000 سي سي علي افا مين يشيل كتيرة جدا وبالزات بعد ما الضرائب زادت بقا في ناس كتير عايزة تخلص منها في مواقع جامده جدا هاتلاقي فيها عربيات فكترا كتييييييييير للبيع .. دور كويس وانت هتلاقي كتيييييييييير

---

معاك بس أغلبها حالته تعبانة!

تحياتي.

اقتباس:

---

المشاركة الأصلية كتبت بواسطة mohamedgafar

معاك بس أغلبها حالته تعبانة!

تحياتي.

---

فعلا الحالة الشازة ليها زبونها وليها سعرها

اكيد مش هتجيب حمار الغفير جنب حمار العمده
والله انا شفت كنب و على عجل و مينفعش بنكله و مطلوب فيه فلوس

اقتباس:

---

المشاركة الأصلية كتبت بواسطة tananybasha

اكيد مش هتجيب حمار الغفير جنب حمار العمده
والله انا شفت كنب و على عجل و مينفعش بنكله و مطلوب فيه فلوس

---

عندك حق!

تحياتي.

مش كده و الله
انا شفت عربية النهارده فيكترا ايه فى الرخصه 96 لونها ازرق او اعتقد انه ازرق مش متأكد قوى من كتر التخبيط و اقلام البويا و الرش للحتت المخبوطه و اماكن الباروما
عربية اقل ما يقال عنها فضيحه سقف واقع هوايات مفيش مكسره شكمان مخرم فوانيس قدام و ورا تعيش انت و عايزه كاوتش و عفشة و مفيش عداد شغال صح و الساعه مكسورة و التكييف على كلامه عايز يتشحن لما فتحت الكابوت لقيت خراطيم ضاربة علبة الدركسيون جايبه زيت عايزه شغل ياما عشان ترجع تبقى عربية بس العلامه اللى ورا موجوده و بيقول المرايات شايلها فى البيت عشان متتسرقش
طالب كام بقى و هو حاطط رجل على رجل 44000 بصفتها الوحيده من نوعها فى مصر بالحالة الحقيرة دى لسه ماشية

اقتباس:

---

المشاركة الأصلية كتبت بواسطة tananybasha

مش كده و الله
انا شفت عربية النهارده فيكترا ايه فى الرخصه 96 لونها ازرق او اعتقد انه ازرق مش متأكد قوى من كتر التخبيط و اقلام البويا و الرش للحتت المخبوطه و اماكن الباروما
عربية اقل ما يقال عنها فضيحه سقف واقع هوايات مفيش مكسره شكمان مخرم فوانيس قدام و ورا تعيش انت و عايزه كاوتش و عفشة و مفيش عداد شغال صح و الساعه مكسورة و التكييف على كلامه عايز يتشحن لما فتحت الكابوت لقيت خراطيم ضاربة علبة الدركسيون جايبه زيت عايزه شغل ياما عشان ترجع تبقى عربية بس العلامه اللى ورا موجوده و بيقول المرايات شايلها فى البيت عشان متتسرقش
طالب كام بقى و هو حاطط رجل على رجل 44000 بصفتها الوحيده من نوعها فى مصر بالحالة الحقيرة دى لسه ماشية

---

عندك حق وانا شفت أسوأ من كده كمان!

تحياتي.

غالبا و الله اعلم سمعت ان فية عربية فكترا 1600 ايكوتيك اتوماتيك
لو موجودة فعلا يبقى هتلاقى موتور ايكوتيك 1600 اتوماتيك و بكدة ممكن تشترى الموتور بفتيسة و تركبة يا معلم
طب لية ؟
اولا اساسيات العربية عارفها حتة حتة و مربيها على ايدك
الموتور و الفتيس سهل انهم يتقيموا و بكدة تبيع الموتور و الفتيس القديم و تدفع علية بالكتير الفين جنية و تجيب الموتور و الفتيس الاتوماتيك لعربيتك اللى هى عشرة معاك و عارفها و خابزها و عاجنها
دة راى الشخصى
لانى معايا فكترا 1996 الشكل القديم 2000 سى سى اتوماتيك
لو حبيت ابيعها و اشترى نفس العربية شوف بقة المصاريف
500 سمسرة بيع
500 سمسرة شراء
500 تسجيل فى الشهر العقارى
800 زيوت و فلاتر وبوجيهات و اتيال فرامل
500 دواسات و حركات
يعنى 2800 طب ما اروق العربية اللى معايا هيبقى اسهل
فكر كدة و ضربها فى دماغك

اسوء من كده مفيش