الموضوع: الميكروباصات وعمايلها !!!!بجد مفيش امل

المشاركة الأصلية كتبت بواسطة gmakram

فى يوم الصبح وانا بوصل والدتى الشغل قبل مطلع على شغلى وكانت الساعه 8 الصبح والشوارع رايقه فى منطقه فى مصر الجديده اسمها ميدان السبع عمرات وانا ماشى براحتى على اليمين تاكسى وقف قدامى يركب زبون محبتش اطلع منه قلت استناه وفجأه اسمع طاااخ وابص فى المرايه الاقى ميكروبص,من صوت الخبطه او من الخضه مش عارف اتهيقلى انى هنزل الاقى الشنطه على الكنبه عندى نزلت لاقيت الشنطه اتفعصت فعصه محترمه اتحرق دمى خصوصا ان العربيه يادوب 6شهور بتكلم مع الواد اللى سايق الميكروبص كان دمى محروق اوى بقوله انت اعمى مبتشفش بيقوللى انت اللى دست فرامل فجأه قلتله يعنى خابطنى من ورا وبتتكلم طبعا ده كله ووالدتى معايا قلتلها انزلى انتى روحى شغلك وانا هتصرف,مفيش دقيقه لاقيت بتاع 3 او 4 ميكروبصات وقفوا علشان يجاملوا صاحبهم بقى وانا بقيت واقف وسطهم لوحدى واللى يقوللى في ايه ياعم خد عربيتك وامشى بجد بلطجيه بطريقه غريبه انا قلت للواد انا مش عايز منك حاجه بس نطلع على القسم نعمل محضر علشان التأمين قاللى حاضر بس نحضن العربيات علشان الطريق واقف,قام منزل الناس اللى كانت معاه وانا قمت ركبت وحضنت شويه قام ابن ال... اخد الميكروبص وطلع جرى وصحابه واقفنلى حوالين العربيه علشان يحجزوا عليا,انا بصراحه الدم جرى فى عروقى قلت يانا يا هو النهرده,خدت العربيه وطلعت وراه,جريت وراه من ميدان السبع عمارات لحد ميدان سانت فاتيما فى مصر الجديده برضو,غرز فى يمين فى شمال وايه بقى مقولكوش فيلم اجنبى قلت مش هسيبه لحد لما خلاص طالع من شماله وهكسر عليه علشان اوقفه قام كسر يمين عايز يطلع منى قام الباب اللى عنده ورا اللى بيركب منه الزباين دخل فى عربيه مركونه بهدلها خالص والباب اتفعص واتكسر ووقع خالص ووقف هو قمت كسرت قدامه ووقفت وبجد فى اللحظه دى قلت انا هربيه هو بقى مش يسكت لحد هنا لا ده لما شافنى جبته قام عايز يجرى ويسيب الميكروبص ساب الدريكسيون وحاول ينزل من الباب اليمين بس كان مزنوق كان عايز ينزل يجرى ويسيب الميكروبص وطبعا لما قام من قدام الدريكسيون قامت عربيته ريحت على الباب اللى قدام يمين عندى جرخته البويه بتاعتى اتشالت انا بقيت مولع من جوايا قمت نزلت قلتله بتجرى منى يابن ال واديتهمله وقمت لفيتله وهو جوا الميكروبص دخلتله من الباب اللى ورا ومرحمتوش تلطيش وبالبوكسات والبونيات بهدلته محاشنيش عنه غير عساكر كانوا فى الشارع ساعتها شالونى من عليه وسألونى فى ايه يا فندم قلتلهم حصل كذا كذا طلعولى رخصه ابن الكلب ده,فتشوه ولا معاه بطاقه ولا رخصه معهوش غير رخصه الميكروبص ومش بأسمه متفهمش بقى كان سارقه ولا شغال عليه ولا ايه,المهم طبعا العساكر ادونى الرخصه وقالولى اطلع على القسم وهيمشى وراك مشيت وهو ماشى ورايا وعلى موصلنا القسم بقى بقيت انا ماشى وورايا بتاع 5 ميكروبصات صحابه بقى جايين يقفوا معاه,ركنا قدام القسم مقولكوش بقى على المعامله اللى عاملوهالى صحابه,ياباشا واحنا تحت امرك وحقك علينا واللى تأمر بيه ويبوسوا رأسى ورجلى وبلاش يدخل القسم ولا معاه رخصه ولا بطاقه هيتبهدل قمت قلتله منك لله وسيبته مشى,عايز اقوللكم يومها رحت شغلى القميص عليه دم منه ورغم كدا ندمت انى معملتلوش محضر,
الخلاصه سواقين الميكروبصات فئه من الناس مينفعش التعاطف معاها بأى حال من الاحوال ومنتهى الصح معاهم انك تبهدلهم وتأخد حقك منهم علشان هما مش بيتربوا

تقبلوا مرورى وتحياتى جميعا

انت استفزيتني لاقصى الحدود. انا و الله زعلان منك جدا جدا!!!!!!!!! و انت سبب ان و الاد ال... دول بيعملوا اللي هما عايزينه يعني شويتين معلش على شويتين حقك علينا يضيعوا حقك و حق الناس كلها اللي هوا حيعلم عليهم بعديك لما هوا و صحابه عرفوا دلوقتي ان معلش حتخليهم يعملوا اللي هما عاوزينه. الموقف ده حصل معايا بالضبط بس اب ال.. جري و معرفتش اجيبه و لاقيت عربية اتاري باديهم رقم الميكروباص يعمموا عليه يقولولي ايه احنا مش دوريه للمنطقه دي احنا بس معديين. اروح القسم بعديها فورا و اديهم بيانات الميكروباص و رقمه و تفاصيله علشان يعمموا عليه او يجيبوه بصوللي زي ما اكزن اهبل و قلولي احنا مش بنعمل الا المحضر و ده كل اللي في ايدينا نعمله!!!! يعني انا بس نفسي اعرف فين الشرطه و الحكومه. فين الجهة التنفيذيه في مصر؟! مين المسؤوول عن ايه! انا راسي حتنفجر!!

المشاركة الأصلية كتبت بواسطة GMakram

انا مبنكرش انى ندمت بعدها انى معملتلوش المحضر بصراحه وعلى فكره انا مسبتوش علشان شويتيت المعلش وحقك علينا لاء خالص,انا بس سرحت للحظه فى اللى كان ممكن يحصل فيه لما يدخل القسم,الموضوع مكنش هيبقى على قد المحضر وبس ده كان هيتعمل فيه بلاوى خصوصا ان كلكم عرفين انهم فى الاقسام مفتريين وانا محبتش انى اتسبب فى الأذى ده لأنسان علشان كدا سبته لكن انا مبيجبش معايا حقك عليا والافلام دى وفى النهايه برضو انا بكررها انى ندمت انى معملتش المحضر بس اللى حصل بقى
تقبل تحياتى وروق يا عم وبلاش انت استفذتنى والكلام الكبير ده انا قلت انا عملت مصيبه ولا ايه :)

معلهش انا بعتذر ! احنا اخوات و انت ملكش ذنب بس انا فعلا دماغي حتطرشق من النظام في مصر. لأن انا عمري معملت حادثه كنت متسبب بيها في حياتي من عشر سنين بس برضه عربيتي باقت كنبه بسبب كلمة معلش! حقك عليا لو اتكلمت بأسلوب معجبكش, احنا اخوان!

النترا مع جامبو
ههههههههههههههههههههههههه
ولسة احنا شوفنا حاجة
انا كنت مرة مسافر الكلية وراكب ميكروباص التيوتا الجديد دة
تخيلو بقى السواق كان بيشد مع ايه؟
قطر القاهرة اسكندرية الاحمر
والله كان بيشد معاة عشان انا على الطرق الزراعى والقطر وهوة ماشى بيبقى باين لكل اللى ماشيين على السكة وفضل يشد معاة لحد القطر مااختفى والطريق اتزحم
ولا تعليق

المشاركة الأصلية كتبت بواسطة momo_sunny

النترا مع جامبو
ههههههههههههههههههههههههه
ولسة احنا شوفنا حاجة
انا كنت مرة مسافر الكلية وراكب ميكروباص التيوتا الجديد دة
تخيلو بقى السواق كان بيشد مع ايه؟
قطر القاهرة اسكندرية الاحمر
والله كان بيشد معاة عشان انا على الطرق الزراعى والقطر وهوة ماشى بيبقى باين لكل اللى ماشيين على السكة وفضل يشد معاة لحد القطر مااختفى والطريق اتزحم
ولا تعليق

ده باين على السواق انه بيشم كله مغشوشه!