زى ما أنتوا عارفين انى اشتريت سيراتو خليجى من فترة و عاملت حوالى 4500 كيلو و الحمد لله العربية تمام و كنت بركن العربية فى ارض فاضية خلف العمارة و البواب ابن التيت المفروض كان بيخلى باله منها و كنت بدفع شهرية مقابل الركنة فى الأرض الفاضية و طبعا كنت ماشى بنصايحكم اشتريت غطاء و كنت كل يوم بغطى العربية و ده كان بيحميها لحد يوم الأحد كانت العربية مش نظيفة تماما قولت مش هاغطيها علشان البيه البواب يأخد باله و يغسلها ما غسلهاش و رجعت يوم الأثنين و قولت أسيبها من غير غطاء يمكن يشوفها و يخلى عند أهله دم لحد ما نزلت الثلاثاء صباحا نزلت لقيت برضه العربيه مش نظيفة قولت حسبى الله و نعم الوكيل قربت من العربية لاقيت ازاز باب السواق متفشفش و واقع كله جوه العربية و طبعا كانت محاولة السرقة الحرامى كان فاكر فيها حاجة و كل اللى فيها 5 جنيه فضة بس و طبعا خدهم
ادور على أم البواب مش لاقيه لحد ما عرفت انه سافر الصعيد بقاله يومين استعوضت ربنا و قولت أبدا مشوار العذاب روحت شركت التأمين فى المهندسين و صوروا العربية و قالوا روح صلحها و هات فاتورة طبعا قولت أروح على كيا فى أبو رواش و طبعا توهت و كان فى حادثة و كان يوم مهببب المهم وصلت و كان كل همى أصلح العربية و أسلم على الأستاذ خالد فاروق و أشوفه وجها لوجه لأنى أحترمته و كان له دور أنى اختار العربية و ده طبعا من خلال المنتدى أن
المهم قابلت مهندس أسمه سلطان و الراجل كان محترم جدا شاف العربية و قالى الازاز هيتكلف 550 أنا اتصدمت طبعا و سألنى سؤال هى العربية خليجى و لا وكيل فرديت بكل فرح و هبل خليجى قالى تزيد 30% سالته ليه قالى هو الخليجى كده و ماعرفش يدينى سبب مقنع
و أنا و الله العظيم كنت محتاج كل قرش لمرورى بضائقة ماكنتش عارف أرد فى الأخر قولتله ماشى قاللى لسه فى مصنعية و خلافه قولت و ماله نزلت فى الأستراحة و بصراحة كانت تمام و الناس خلصوا العربية فى ساعتين زمن و دقعت 880 جنيه زى الشاطر و بصراحة ما روحتش سلمت على المهندس خالد لانى كنت حزين و مضايق بطريقة صعبة
خلاصة الموضوع
1- أركن عربيتك فى جراج مقفول بسور و يكون فى حراسة 24 ساعة.و أوعى تستسهل و تكسل تمشى شوية علشان الجراج بعيد حبتين
2- اشترى غطاء للعربية و اتعب شوية و غطيها لو هتركن فترة كبيرة و ده حماية لحاجتين من الحرامى و العيال اللى بيرسموا خرايط على العربيات و ده لان العربية شكلها مبهر جدا و كله متغاظ منها
3-أوعى تسيب شىء أى شىء فى العربية و طبعا الرخصة يعنى العربية من جوه فاضية و الشنطة فيها الغطاء و الطفاية بس
سؤالى الأخير ليكم
لماذا 30% أنا كنت حاجز العربية و قعدوا يمطلونى فى المواعيد كل شوية و صبرت 3 شهور و فى الاخر سحبت الفلوس و اشتريت خليجى يبقى ده عقابى كل مرة 30% هذا ظلم بين الا اذا عرف السبب
أسف لانى اطلت عليك كثيرا