الموضوع: أشترى جديد ولا مستعمل؟؟؟؟؟

المشاركة الأصلية كتبت بواسطة husseinoo

انا من رأى
انك تتعلم مع مدرسة قيادة

ولازم تتأكد ان اللى بيعلمك فاهم ومية مية

وبعدين احسبها

لو الحصة كانت مثلا بـ 15 جنيه او حتى 20 جنيه على سبيل المثال

خلاص

تاخد مثلا 20 حصة او حتى 30 حصة

هاتدفع فيهم كام 500 جنيه او حتى 600

موش مهم

المهم انك تحس انك مية مية فى السواقة

ولو عايز اكثر

خد حصص اكثر موش مهم

يعنى الواحد يدفع له 600 جنيه ولا حاجة فى مقابل انه يتعلم صح لكن لازم تتأكد ان اللى بيعلمك راجل مية مية وبيفهم وينزل معاك تدريجى من الشوارع الهادئة الى الشوارع الزحمة وعلى الكبارى وتتعلم تركن كويس جدا

واول ما تحس انك خلاص عشرة على عشرة
اشترى جديد وريح دماغك

ولو كنت خايف لسه
استمر فى التدريب تانى
حتى ولو هاتدفع فى التعليم 1000 جنيه حصص مافيش مشاكل

وده مبلغ يخليك تسوق طيارة موش عربية

اعتقد ده افضل من انك تشترى سيارة قديمة وترخص العربية وتوجع دماغك وترجع تبيعها وتخسر فيها الف ولا الفين جنيه ويمكن اكثر

خلاص احسن لك تتعلم بـ 1000 جنيه وتاخد حصص مع واحد بيفهم وهايخليك عشرة على عشرة

مع اطيب التمنيات
اخوك حسين غزالة

>>> " التدريب " ... ؟؟؟ بيت القصيد ... مشكلة كبيرة مدارس تعليم القيادة فى مصر ... نصب وانتهازية ومافيش ضمير .. ممكن من الاخوة الاعضاء ترشيح عدد من مدارس تعليم القيادة فى القاهرة ( مصر الجديدة او مدينة نصر والمناطق المجاورة لها ) الى ممكن تعلم القيادة بشكل مهنى جيد و احترافى .. او اسماء مدربين مخضرميين وطرق الاتصال بيهم ...

يا جماعه يعني ايه لو لسه بيتعلم يجي مستعمل عشان يخبطها براحته؟ طب واللي هوه هيخبط فيه ده ممكن تكون عربيته غاليه ويتدبس هوه في تصليحها. وعلى فكره أنا رأيي ان اللي لسه بيتعلم مش بيخبط واللي بيخبطو ناس قدام في السواقه. ممكن نقول انه حظ المبتدئين.

أنا شايف الميزه الوحيده في المستعمل انه هيتمرمط شويه ويتعلم ميكانيكا وكهربا أو على الاقل هيعرف المصطلحات. هيفتح الكبوت كتير يعني. لكن فى الجديد ممكن ميفتحش الكبوت الا لما يغير ميه التبريد أو صابون المساحات.

لو تقدر على الجديد اشتري جديد وريح دماغك - هوه انت جايب العربيه تقضي بيها مشاويرك ولا تتعلم فيها ميكانيكا.