-
الذهاب لجدة بدون جواز
السلام عليكم يا أحبتى
كان عندى سؤال بخصوص العمرة
أنا إن شاء الله رايح أعمل عمرة شهر مارس الحالى وكنت بافكر أروح زيارة لجدة للتسوق والشراء بس فيه ناس قالولى لازم لما تروح يكون معاك جواز السفر بتاعك وطبعا ده شىء صعب جدا لأن مشرفين رحلات العمرة بيلموا الجوازات كلها وبيفضلوا محتفظين بيها لغاية آخر يوم فى العمرة حسب التعليمات بتاعتهم .
فما خطورة إنى أروح جدة من غير جواز سفر وهل هناك مشكلة فى ذلك ؟
أرجو من اللى عنده أى معلومة يعرفهالى وله جزيل الشكر .
شكرا لكم جميعا
-
انت ونصيبك بس فيه نقط تفتيش على طريق مكة - جدة ، وأحياناً كتير بيسألوا على الجواز
-
المشكلة الاكبر هاتبقه في رجوعك لمكة هتضر تدخل من طرق جانبية بطريقة غير رسمية وطبعا مش هتعرف لوحدك لازم يكون معاك سواق من البلد
-
انا شخصيا روحت وجيت كذا مرة بكارنيهات الشركة ومرة كان معانا المشرف ومفيش حد كلمنا ولا مرة انت ونصيبك
-
انا عملت زيك كده بردو بس انا عاملة مشكلة مع مشرف الرحلة وخدت الباسبور ونزلت جدة قعدة يومين وغيرة ميعاد السفر بتاعي ورجعت لوحدي بس طبعا بعد ما كنت عملة العمرة وروحت المدينة ومن المدينة طلعة علي جدة
-
انا كنت مقيم بجدة ونصيحة الاسواق فى مكة احسن من جدة بس مش قريب من الحرم روح منطقة اسمها العزيزية فيها اسواق عملاقة وباسعار كويسة
وبالنسبة للجواز فهو مهم وفى نقطة تفتيش بين مكة وجدة اسمها الشميسى ولو البوليس مسكك مشكلة لحد ما تثبت بقى انك داخل بطريقة شرعية ومش متخلف عن العمرة
-
مامتي لسه جاية من جدة وقالت نفس الكلام
بس كنت معتقدة انها من قلة الخروج مقدرتش تتعرف على البلد كويس
وفعلا بتقول مكة احسن من جدة من ناحية التسوق
-
أنا عملتها مرة ، والعربية الي رحت فيها مكنش معاه رخص ، وطبعاً آخد طرق جانبية عشان ميعديش على الكمين
والعربية الي رجعت فيها هرب من عسكري مرور
يعني كان مشوار زي العسل ، بس الحمد لله ربنا ستر
-
جدة دى اكبر مقلب شربته فى حياتى مدينة مملة وكيئبة ولا تطاق عشت فيها فترة واخترتها عن باقى مدن المملكة لما حبيت اشتغل هناك لانها قريبة من مكة فكنت كل اسبوع فى عمرة الحمد لله وحجيت بسهولة
واخترتها كمان لان اسمها ( عروس البحر الاحمر ) ههههههه ولانى من سكان عروس البحر المتوسط قلت اهو هاتفكرنى باسكندرية الجميلة لكن للاسف شتان فرق السما من الارض واللى عاش فى المدينتين هايقدر يفهم كلامى وانا حضرت السيول الاخيرة فيها بس كنت وقتها فى منى فى الحج ولما رجعت شوفت مأساة شوية مطر بينزلوا فى ساعتين دمروها بينزلوا عندنا فى اسكندرية تقريبا كل اسبوع اضعافهم
ميزتها الوحيدة قربها من مكة 75 كم تقريبا وانك بتلبس لبس الاحرام من بيتك
-
استعبط على مشرف الرحلة و قل له انك عيان اخر حاجة و محتاج تروح المستشفى (ما ينفعش تخش المستشفى من غير جواز و لا بطاقة مقيم) ..... و روح جدة و ارجع رجع له الجواز تاني ..... بسيطة !
Content Relevant URLs by
vBSEO 3.6.0 PL2