-
لحظــة شـــر
يومى كان مشحون أكثر من العادة من بدايته
وفى آخر اليوم خارج من عيادة ورايح عيادتى التانية فى بنها والطريق واقف والسيارات طابور واقف ، وفجأة ألاقى موتوسيكل صاروخى ينطلق من الجهة اليسرى ويضرب المراية بعنف ، ولمن لا يعلم المراية دى لسه جايب لها قاعدة جديدة من فترة بسيطة ، يعنى لسه بتوجع ... المراية اتقلبت لكن الحمد لله متكسرتش وطار الموتوتوسيكل وعليه إثنين شباب ملتحين دون أدنى إهتمام أو إعتذار..
بصراحة إنا نافوخى ضرب نار
من الضربة ومن اللامبالاة
المهم شوية والزحمة فكت ولقيت نفسى بطير على أمل إنى ألحقهم
ولحظهم السئ كانوا فى طريق عيادتى
سبقتهم وأنا أكاد ألمس أرجلهم بجانب العربية ، لكن هذا لم يشف غضبى
سرت أمامهم وبينى وبينهم أمتار بسيطة بسرعة متوسطة وأنا وهم على يسار الطريق ، وقبل ملف شمال بمترين إديت إشارة شمال ودوست دوسة خفيفة على اللفرامل كانت كافية إن نور الستوب ينوّر ، وعملت إنى داخل الملف وطبعا إفتكروا إنهم خلاص هيخبطوا فيا ، ورغم إنى مجرد هوّشت إنى رايح شمال واستمريت فى طريقى إلا إن رد فعلهم كان مبالغ فيه ... الراجل مفرملش ولا إستمر ، دا عدا للطريق المخالف وبقا وشه فى وش اللى جاى!!!
.........................................
يانهار زى بعضه!!!
لولا لطف ربنا كنت هموتهم!!!!!
ربنا لطف ومكانش حد جاى قصاده لكن لو كان جاى توكتوك كانوا لبسوا فى بعض بلا أدنى شك....
..........................................
بقى أنا أعمل كده؟
وفإخوة أحسبهم على خير .. وحتى لو كانوا مسيئين أو غلطوا فى حقى أعمل فيهم كده؟؟؟
طب لو كانوا عملوا حادثة وللا خبطوا حد وللا لا قدر الله ماتوا كان هيبقى موقفى إيه قدام ربنا؟
ياجماعة أنا بكتب لكم اللى حسيت بيه علشان محدش ينساق وراء غضبه بالذات الناس الى بتفكر كويس علشان ساعتها ممكن يصبوا غضبهم بطريقة عنيفة جدا من غير ما يقصدوا...
المسامح فعلا كريم ، والكلام دا ليا قبل غيرى...
طظ فى المراية وطظ فى الإنتصار فى الغضب ، مش دى القوة دا الضعف! وبعده الندم!
أستغفر الله العظيم ويارب يسامحونى على الرعب اللى تسببت فيه ليهم.
-
دكنور احمد انت راجل محترم والله
وفعلا لازم الواحد يمسك نفسه
انت فكرتي من فتره صغيرة كنت باخد ملف يوتيرن عندنا في المنصورة
وعادي خالص باخده كتير
وكان امامي سيارة برضه هتاخد الملف وانا وراه
ومفيش عربيات جايه في الطريق المعاكس يعني هتاخده براحتك وعالطول
المهم لسه داخل والعربيه التانية امامي اذ بسواق تاكسي محترم في الجهة العكسية وقف في لفة الملف بالظبط
فالسيارة التي قبلي وقفت وراه وبالتالي انا وراهم فوقفت
المهم واحد بتاع موتوسيكل جاي من بعيد وقاعد يزمر اكنه اسعاف او مطافي المهم والله رحت مدي العربية مارشيدير وراجه شويه علشان يعدي بدل ما يخبط العربيه
لقيته بعد ما عدى بيقولي انت مبتفهمشي انت مش عارف ايه
بص
انا رحت دايس بنزين ووراه والله ثم والله لأخر لحظة كنت هخبطه بجمب العربيه ولكن تراجعت في اخر لحظات لعلمي ما سوف يلحق به من اذى ولكن فعلا يعني رجعتله وبعدين يقولي انت مبتفهمشي كمان
وكل ده ومش مشكلتي انا
الحمد لله الشيطان ساعات بيلاقي طريق له في الحاجات دي كويس قوي
اللهم ما احفظنا واحفظ شرورنا عن الناس وعن انفسنا
-
يارب احفظ طريقنا و ابعدنا عن لحظات الشر فى الطريق
-
باين عليك راجل طيب
وحصل خير ياباشا الدنيا مدرسه
-
حصل خير الحمد لله
لما شيطان الغضب بيتمكن من الانسان بيدفعه ممكن لتصرفات اكتر جنونا
بس لو اي حد منهم رفع ايده علامه اعتذار كان كل الغضب اللي جواك انتهي يعني انا بيحصل معايا حاجات علي الطريق كتير و اكيد برضة بيعمل حاجات تغضب ناس كتير بس فعلا لما حد بيخرج ايدة من العربيه باعتذار كل حاجة بتخلص
لسة عامل في واحد كدة برضة بموتوسيكل علي كوبري اكتوبر و كنت هلبسة في عربيه علشان الغضب عماني بس الحمد لله ربنا لطف بيه و انا روحت متنكد خالص
في الاخر اذكر نفسي و اياكم
بسم الله الرحمن الرحيم
(و الكاظمين الغيظ - و العافين عن الناس - و الله يحب المحسنين )
صدق الله العظيم
-
انا انهارده برضه كنت هتخانق
مع واحد راكب ميكروباس سوزوكي
جاي من ورايا ومي اشاره وعايز يدخل قدامي
وانا موتي وسمي اللي يعمل الحركه ده
بقوله يعني انت مش شايف ان انت هتطلع علي العربيه
يقولي مانا عايز انزل الناس شغل مخك
قلتله اشغل مخي !!! طيب وحياة امك مانت داخل قدامي
انا هاديء ومابحبش المشاكل بس في ناس بتنرفزني لدرجة الجنون
مش عارف اعمل ايه
انا خايف في مره انزل اتخانق اعور حد ولا اعمله عاهه ولا اتعور انا وربنا هيحاسبنا علي كده
-
الحمد لله ربنا ستر
لا حول ولا قوة الا بالله
-
الحمد لله جت سليمه وفعلا اتقى شر الحليم اذا غضب
-
معلش يا دكتور
هتتلاقي من البلاوي دي كتير
-
الحمد لله جت سليمة
الواحد بتيجى عليه لحظات بيفقد فيها اعصابه بس ربنا بيستر
Content Relevant URLs by
vBSEO 3.6.0 PL2