مشكلة فى جين 2 موديل 2008 ومحتاج مساعدتكم (طقم دبرياج)

بسم الله الرحمن الرحيم

العربية جين 2 موديل 2008
عاملة 19000 كيلو

العربية كنت مسافر بيها وعلى الطريق الصحراوى السحب قل اوى ومبقتش عارف اعدى 110 كيلو وكل لما ادوس على البنزين بالجامد شوية كأنى دوست على الدبرياج يعلى الار بى ام وتبدأ السرعة لو زادت شوية ترجع تقل تانى معئنى ببقى دايس بنزين حلو

المهم وقفت على جمب فى الطريقة وحاولت اطلع بيها تانى مبقتش بتطلع وبقت بغير الغيارات من غير حتى ماحتاج للدبرياج المهم عرفت ان اسطوانة الدبرياج اتكسرت كده وكان فى ريحة شياط

المهم عربية نص نقل قطرت العربية لحد البيت وانا من برة القاهرة بعد وقفة 3 ساعات على الطريق الساعة 2 بالليل لحد 5 الفجر فى عز التلج

دلوقتى انا عايز اصلح المشكلة دى فعايز استشيركم

انا فى بلدى فى طقم دبرياج كورى بـ 250 و 300 ج
وقبل كده سمعت ان واحد جاب طقم يابانى بـ 400 ج من محل مكة فى شارع دمشق
والتوكيل الطقم هناك بـ 1200 و 250 مصنعية

انا بصراحة اول مشكلة تقابلنى فى ميكانيكة العربية بس كان فى قبلها خبطتين فى الصاج

انا دلوقتى محتار اصلحها فى التوكيل ويأخدوا المبلغ الكبير ده ! وطقم دبرياج ماليزى كنت بحس انه مش ناعم مش عارف ليه وهل تركيب طقم التوكيل فعلا هو اللى بيظبط مع العربية افضل حاجة ولا هما غاليين بس لمجرد انهم توكيل وكده (طبعا الحل ده عايز ونش يودى العربية التوكيل)

ولا اوديها لمكانيكى شاطر هو يعملها ولا ممكن يلخبط الدنيا فيها ولو هوديها لميكانيكى اركب طقم الدبرياج الكورى ؟ ولا فى ناس عندها نوعيات نضيفة والطقم بتاع الدبرياج ده فى كل العربيات واحد معقولة ؟؟

ولو حد معاه ارقام تيلفون لناس عندها طقم دبرياج محترم يقولى اكلمهم استفسر

كمان حصل معايا ان العربية مبقتش بتدور بعد ماوقفت على الطريق حوالى 3ساعات مشغل الانتظار والانوار فهل معقول يكون ده بسبب البطارية ضعفت مثلا ! ولا ممكن طقم الدبرياج لما اتكسر او باظ يكون أثر فى حاجة تانية علما ان العربية كانت بتدور عادى جدا اول لما عطلت ومع الوقت الانوار ضعفت والعربية مبقتش بتدور والبطارية باقيلها سنة و4 اشهر بالظبط

ولو محتاج اغير البطارية هى فى حدود كام وهى جافة فعلا ؟؟ والانواع اللى المفروض اشتريها

ومعلش على الاسئلة الكتيرة بس انا لسة معنديش خبرات يعنى فى الميكانيكا والعربية كانت ماشية مش بتقول لاء بصراحة

بس الحمدالله على كل شىء

برجاء عدم الكتابه باللون الاحمر , حيثت انه مخصص للمداخلات الاداريه فقط , تم تغيير اللون

مشرف القسم

مفيش حد راضى يساعدنى الظاهر

حبيبي بالنسبه لموضوع البطاريه ده ان شاء الله عادي وبسيط بمجرد ماتدور العربيه هتشحن تاني وان ماكانش لاقدر الله وباظت هتلاقي في نوع في السوق كوري مستورد ومش داخل فيه اي خامات مصريه انا جبته لعربيتي موديل 2008 بعد استعمال سنه وشهرين اسم البطاريه
ارورا صناعه كوري ب 390 جنيه

اما بالنسبه لموضوع قطعة الغيار انا لو مكانك هجيب الياباني زي ماأحد الاعضاء تكرم وركبه وقال انه ممتاز ولو مش هتفرق معاك يبقى عليك وعلى التوكيل

وده موضوع العضو الكريم اللي غير الطقم

http://www.nilemotors.net/Nile/126372-a.html

واسأله على رقم الميكانيكي على الخاص او في البشمهندس مصطفى في اخر شارع فيصل
دول ناس شغاله في التوكيل اساسا

وده رقمه لو عاوز منه اي استفسار او مساعده

0108239801

طب الضمان اخباره ايه؟؟؟

متشكر يا استاذ تويتى بس هو ايه اللى يخلى العربية ماتدورش اساسا لما اسطوانة الدبرياج تبوظ العربية كانت دايرة وبدأت كل حاجة تضعف خلال 3 ساعات فهل فى اسباب ممكن تكون بسبب كسر الاسطوانة بتاع الدبرياج تكون كابل اتقطع او اى حاجة واصلة للبطارية وبمجرد ماتتحل المشكلة البطارية ترجع تشحن تانى وياريت اللى عنده ردود او اى اضافات لاستفساراتى فوق يضيفها عشان محتاج اراء الناس عشان اتصرف صح

اسطوانه تبوظ عند 19 الف كيلو ... غريب الموضوع ده .

حضرتك بتحمل اوزان كبيره او بتجر حاجه بالعربيه ؟

استفسار اخير" مهم " ...امتا اخر مره روحت تعمل صيانه فى التوكيل ... و هل العربيه لسه فى الضمان ؟

اقتباس:

---

المشاركة الأصلية كتبت بواسطة biankonary

متشكر يا استاذ تويتى بس هو ايه اللى يخلى العربية ماتدورش اساسا لما اسطوانة الدبرياج تبوظ العربية كانت دايرة وبدأت كل حاجة تضعف خلال 3 ساعات فهل فى اسباب ممكن تكون بسبب كسر الاسطوانة بتاع الدبرياج تكون كابل اتقطع او اى حاجة واصلة للبطارية وبمجرد ماتتحل المشكلة البطارية ترجع تشحن تانى وياريت اللى عنده ردود او اى اضافات لاستفساراتى فوق يضيفها عشان محتاج اراء الناس عشان اتصرف صح

---

اكيد البطاريه كانت ضعيفه من الاساس و فضيت لما سبت الانوار شغاله فتره لان البطاريه ملهاش علاقه باسطوانه الدبراج ...

ولا بشيل اوزان ولا بجر حاجة ده انا مدلع العربية اخر حاجة وبعمل الصيانة بصفة دورية واخر مرة فى الصيانة قولت ان فى رعشة خفيفة وانا بعمل صيانة الـ 15 الف والناس هناك قالت هتتظبط مع تربيط العفشة وبتاع ومفيش حاجة اتظبطت واقنعونى ان مفيش مشاكل معئنى كنت اسس ان مش ده الوضع الطبيعى او نعومة الدبرياج الاصلية بس فى الاخر اهو بعد 4 الاف كيلو من الصيانة باظ وبجد كل اللى اقدر اقوله حسبى الله ونعم الوكيل فى التوكيل والناس اللى مش بتشتغل بضمير هناك لانى بجد قرفت من التوكيل ده

بس انا دلوقتى فى الحلول وقدر الله وماشاء فعل لو ميكانيكى شاطر هو اللى ركب الدبرياج اليابانى ده هيبقى كويس ؟؟ ولا ممكن يسببلى مشاكل فى العربية بعد كده

ونفسى اعرف هو طقم الدبرياج فى كل العربيات واحد ؟

ان شاء الله تتصلح على خير
بس انا شايف انه ده عيب صناعة مش استخدام ومش المفروض تدفع ولا مليم.
ده لو فعلاً استخدامك للعربية طبيعي زاي ما بيتقول.
ان شاء الله تتصلح على خير
تقبل تحياتي

اقتباس:

---

المشاركة الأصلية كتبت بواسطة eng. Rafy samy

ان شاء الله تتصلح على خير
بس انا شايف انه ده عيب صناعة مش استخدام ومش المفروض تدفع ولا مليم.
ده لو فعلاً استخدامك للعربية طبيعي زاي ما بيتقول.
ان شاء الله تتصلح على خير
تقبل تحياتي

---

+10000

وليه تصلحها برا؟ مش العربية في الضمان؟

اقتباس:

---

المشاركة الأصلية كتبت بواسطة أبومريم

وليه تصلحها برا؟ مش العربية في الضمان؟

---

+111 :shyy:
ربنا يوفق

اقتباس:

---

المشاركة الأصلية كتبت بواسطة biankonary

ولا بشيل اوزان ولا بجر حاجة ده انا مدلع العربية اخر حاجة وبعمل الصيانة بصفة دورية واخر مرة فى الصيانة قولت ان فى رعشة خفيفة وانا بعمل صيانة الـ 15 الف والناس هناك قالت هتتظبط مع تربيط العفشة وبتاع ومفيش حاجة اتظبطت واقنعونى ان مفيش مشاكل معئنى كنت اسس ان مش ده الوضع الطبيعى او نعومة الدبرياج الاصلية بس فى الاخر اهو بعد 4 الاف كيلو من الصيانة باظ وبجد كل اللى اقدر اقوله حسبى الله ونعم الوكيل فى التوكيل والناس اللى مش بتشتغل بضمير هناك لانى بجد قرفت من التوكيل ده

بس انا دلوقتى فى الحلول وقدر الله وماشاء فعل لو ميكانيكى شاطر هو اللى ركب الدبرياج اليابانى ده هيبقى كويس ؟؟ ولا ممكن يسببلى مشاكل فى العربية بعد كده

ونفسى اعرف هو طقم الدبرياج فى كل العربيات واحد ؟

---

لا ميكانيكى شاطر و ولا غيره ...... عليك و على التوكيل يا باشا .

طلاما " صياناتك الدوريه " فى التوكيل و الاسطوانه باظت لوحدها " بدون عيب استخدام " يبقى الضمان يتكفل بالموضوع .

بس و انتا رايح لازم تاخد معاك ورق الصيانه و طبعا تحجز قبلها .

يعنى الضمان شامل المشكلة دى ؟ لانى اعرف ان الضمان للموتور والفتيس تقريبا وكمان فى واحد باظت عنده وراح اشترى الطقم من نفسه

طيب ماتتصل بالتوكيل و قولهم على المشكله بالظبط و شوف حيقولو ايه ؟

اقتباس:

---

المشاركة الأصلية كتبت بواسطة biankonary

يعنى الضمان شامل المشكلة دى ؟ لانى اعرف ان الضمان للموتور والفتيس تقريبا وكمان فى واحد باظت عنده وراح اشترى الطقم من نفسه

---

الضمان شامل العربية كلها ومادام مش عيب استخدام يبقى من حقك

صلحها فالضمان يا باشا من غير تفكير

خلى بالك الطقم الأصلى المانى وليس ماليزى .

عليك وعلى التوكيل ما دامت العربيه في الضمان. بس خلي بالك إنه هيدفعك ثمن الاسطوانة لأنها من المستهلكات لكن بقية الطاقم على التوكيل. وربنا يصلح لك الحال ويهديهم لك في التوكيل. أنا أصل عارفهم

عليك وعلى التوكيل وأعتقد إن كل حاجة عليهم قطع الغيار والمصنعية لو فعلا زي ما بتقول المشكلة مش منك انت ولو مفيش استجابة منهم ربنا يخليلنا جهاز حماية المستهلك ان شاء الله يجبولك حقك غير كدا انتا ممكن لو عملت الموضوع دا برا التوكيل يتلككو ويطلعوا العربية من الضمان
وربنا يوفق وإن شاء الله متحتجش حماية المستهلك لأن الناس في التوكيل بقوا متفهمين كتير عن الاول

لو الريجلاش بتاع اسطوانة الدبرياش مش مظبوط ممكن فعلا الاسطوانه تخلص بسرعه وهوا دا اللي حصل معاك ومن حقك تتغير على الضمان لانها 19 الف كيلو بس الا لو انتا بتسوق ورجلك دايسه على الدبرياج

اخي الكريم لاشكر على واجب

وحقك في الضمان ولكن اعمل اللي عليك وماتصلحش بره

وانا لما رديت عليك ماكنش في بالي موضوع الضمان ده خالص

خد موقف ايجابي مع التوكيل ولو ماوافقش على حماية المستهلك وهدد التوكيل بده قبل ماتعمله بكل زوقو احترام

تحياتي وابقى طمني