محتاج نصيحتكوا اعمل ايه فى صاحبى ده
يا جماعه بجد انا سعيد جدا انى فى المنتدى ده و معاكو لان بجد فى ناس هنا محترمه اوى و بترد ردود بتفيد الواحد فعلا
و كنت عاوز اخد رايكوا فى حاجه انا ليا واحد صاحبى غريب شويه بيقفش بسرعه و من اى حاجه و بيحب يهزر على اى حد بتريقه و ما حدش يعمل كده معاه و اجاركوا الله لما بيبقى قافش باه من حد مننا و مصدرلنا الوش الجبس بجد بيبوظ الخروجه عنده قدره هائله على الوش الجبس ده و انه يقفلك و يخليك ساعتها مش عاوز حتى تتحايل عليه لو مش عاوز ينزل مثلا و ساعات بيبقى مش مصدر الوش ده و بيبقى كويس
بس عنده عيب رهيب كمان انه لازم يمشى رايه على الكل سواء كان بحاجه نعملها او راى فى مناقشه عادى لازم يكون رايه هو الصح و لو حد مش عاجبه رايه تبقى ليلته سودا و ممكن يقفش و يقلب عليه و طبعا مش فى كل الاوقات رايه لازم يمشى عادى يعنى هو مش عاوز يفهم كده و عليه هزار بالايد رخم اخر تلات اربع حاجات انا اصلا بتجنب اهزر معاه بالايد
احنا 8 اصحاب هو عامل مشاكل مع 5 لحد دلوقتى و منهم انا و بجد كلنا ما بقناش مستحملين التصرفات دى بس هنعمل صاحبنا و لازم نستحمله
يعنى انا مره فضل قافش منى و مصدرلى الوش الجبس ده لمده اسبوع عشان مره يوم خميس كلنا متجمعين و عمالين نتفق نروح فين و المهم بعد ما اتفقنا لقيت واحد بيقول انا عربيتى بايظه و التانى بيقول انه مكسل يجيبها من الجراج و انا كنت طلعان عينى مشاوير بعد الشغل اليوم ده فقلتله هات عربيتك انت عشان انا بجد مش قادر اسوق مع العلم اننا مش بنشوف عربيته دى خالص و لا بنركبها و مش بيخرج بيها الا لو خارج مع صاحبيته بس لكن احنا مين دول اللى نركب عربيته المهم انا غلطت و قلتله نخرج بيها لقيته قاللى استحاله ده لو حتى ما خرجناش مش هجيبها و اضطريت انى نخرج بعربيتى و صاحبى التانى جاب عربيته من الجراج و فضل قافش اسبوع بعدها عشان ازاى اقوله هات عربيتك
و عمل مشكله مع واحد صاحبنا عشان عاوزه يخرج من الجراج اللى هو راكن فيه لان هو اللى جابله المكان ده عشان هو هيسيب الجراج بتاعه و عاوز يركن مكانه هو ده يعقل يا جماعه يعنى انت عملتلى حاجه و تشكر عليها اجى بعد فتره اقولك لا انا رجعت فى كلامى
و اخر حاجه حصلت و دى اللى كانت لا تطاق باه يوم الخميس اللى فات قاعدين فى كافيه فواحنا قايمين ماشيين بنحاسب و هو ماسك الشيت فى ايده فبقولهم حد يحاسب و اما نطلع بره نتحاسب فمحدش رد عليا فقمت ناتش الشيت من ايده و قولتلهم انا هحاسب انا
فاما طلعنا بره كنا متفقين نروح ناكل قاللك لا انا عاوز اروح يابنى يهديك يرضيك قال هاتوا الاكل و كله تحت البيت عندى (طبعا هو مش جاى بعربيته ) فواحد صاحبى قاله لا مش بحب كده و فكك و بتاع من الافش ده المهم لقيته سكت و راحوا يركبوا عربيه صاحبى و انا وواحد صاحبى ركنا ركبنا عربيتى و نتجه على المكان اللى هناكل منه فوجئت بيهم جاييين من غيره و عمالين يشتموا فيه ايه اللى حصل يا جماعه قالوا انه صمم يمشى و قالهم هاخد تاكسى و اروح طب يابنى احنا مش هنتاخر كلها نص ساعه لا عاوز اروح طب هنجيب الاكل و نروح نبقى ناكله هناك قال لا ما تجيبوش اك فصاحبى قاله خلاص عاوز تروح روح انت حر و طلع زعلان منى قال ايه عشان نتشت الورقه بتاعه الحساب من ايده و زعلان من صاحبى عشان اما قاله عاوز اروح ما قالوش حاضر
طبعا تانى يوم ماعبرش حد فينا و باعتله مسج بمناسبه مولد النبى ما عبرنيش و واحد صاحبى بس ما كانش معانا كلمه قاله لا مش عاوز انزل
معلش انا طولت عليكوا بس حبيت احكيلكوا عليه بالتفصيل عشان يبقى حكمكوا صح بجد احنا تعبنا من قفشه و الوش الجبس اللى بيصدرهلنا بمناسبه و من غير مناسبه و اه لو حد عارض رايه فياريت تقولولى نعمل معاه ايه و ياريت بسرعه لاحسن المفروض فى قعده معاه بكره هنتكلم معاه فى المواضيع دى كلها فعاوز اعرف اقوله ايه و اتعامل معاه ازاى مع العلم انه جدع جدا و بجد مش عاوز اخسره بس لو يبطل الهبل اللى بيعمله ده و اسف للاطاله بس ماليش حد غير اعضاء المنتدى هنا اخد رايهم و ياريت لو حد يعرفه اوعى يقوله انى عملت الموضوع ده انا مش ناقص هههههههه
