رحت مركز صيانة فيات اللى فى طريق المطار وياريتنى مارحت

النهارده كنت فى القاهره وبعد ماخلصت اجتماع قولت انزل مدينة نصر اجيب حاجه وانا راجع قولت اما اطلع الكوبرى ( بدل مانزل من تحت واخد طريق السويس ) وانزل الناحيه التانيه وادخل على مركز صيانة فيات اللى فى طريق المطار ورحت فعلا وياريتنى مارحت
اولا انا اول مادخلت لقيت عربيات الفاروميو 156 مفكوكه والشغل على ودنه
قولت حلو كده بونتو مش هاتبقى عويصه عليهم دول شغالين فى مكن بوكسر وتوين بتاع الفا يعنى
جالى واحد شاب حليوه ظريف لطيف بس مش خفيف وقالى فيها ايه قولتله بتنتش والار بى ام عالى وبتاكل بنزين
الراجل 3 ثوانى ولقيت عداد الار بى ام نزل فطلعت اجرب لقيت مفيش سحب
طب ايه يا عم قاللى نشوف قام فاكك العمه وفك خرطومين وركبهم تانى وجينا نزود بنزين لقيناها بتقطع طب اطلع جرب لقيتها عامله زى الجمل طب كده ينفع ياعم الحاج
رجعنا وفك فيشة حساس الشكمان على اساس انه السبب وطلع ابن ناس وماكانش السبب
وبردو بتقطع وتنتش
وع الحال ده بقالنا كتير على راى تامر حسنى
وفى الاخر قاللى ممكن طرمبه بنزين
قولتله يعنى الطرمبه هاتشتغل كويس اما كانت خراطيم الهوا راكبه غلط وهاتبوظ اما توصلها صح انا اللى اعرفه ان الطرمبه لو فيها حاجه والنبى لو ايه ما هاتقوم تانى وبعدين اشمعنا يعنى باظت دلوقت
فراح قاللى يمكن انا بقول يمكن ده احتمال وانا اصلا بقى كنت طول اليوم فى اجتماع من اللى بيمص قدرة البنى ادم على التركيز والفهم والشوف وكل حاجه فرايحله خلصان فقولتله طيب لما حضرتك بتقوللى يمكن المفروض انا وانت بقى ندور على ميكانيكى يقولنا فيها ايه
ايه ياعم امال انا جايلك ليه وبدات اغيب عليه بقى بس قولت على ايه هى ديتها مشوار يوم من اوله للحرفيين الليله دى هاتتظبط
كان فى اخ فاضل محترم هنا قاللى فى موضوع كنت بسال فيه عن المكان ده بلالالالاش تروح دول مابيفهموش وانا ماسمعتش كلامه
ومن شويه فى اخ معاه سيينا تقريبا بيسال فى اوماترا قالوله الكشف على الموتور150 تقريبا وعلى حالة العربيه كلها 350
طب اما اكشف ب 350 طب هاصلح بكام ولا اكونش راكب بونتو موديل السنه وانا مش واخد بالى
ايش حال ان ماكانتش بتجرى على الارض بقالها 15 سنه
انا مش مستخسر فى العربيه لانها اصلا بتتصين فى التوكيل ومعايا ورقها من سنه ماجت على الزيرو لحد السنه اللى قبل اللى فاتت بس انا مش هاصرف عليها اللى بقبضه كله دنا حتى مش عارف احطلها بنزين 80 لانها رشاش واحد يعنى هاتتسد يبقى خد عندك بهدله بقى وهى مش ناقصه
اعمل ايه انا دلوقتى لا انا عاوز اوديها لحد مستواه مش ولابد يجربلى فيها ويدفعنى اللى ورايا واللى قدامى والعيب زى ماهو وحله بسيط ولا هاقدر على صيانة توكيل وحرام عليا ابهدلها لانى اصلا شاريها عشان حالتها
فهل من مشورة

الحمد لله انها جت على قد كده وان مش حصل حاجة فى العربية بسبب الناس دى
زى ما حضرتك قولت، الاعضاء هنا حذروك من المركز ده ودى فايدة الاعضاء اننا نفيد بعض وننقل تجاربنا لبعض.

انا فعلا قالولى كده فى التوكيل ، بجد مش عارف يعنى أدفع 120 علشان يحطوا العربية على جهاز الكشف بس (أنا أساسا أشتغلت علية قبل كده بس هى النقطة فى الجهاز نفسة يكون متحمل علية بيانات العربية يعنى مش مُعضلة ولا حاجه)

وحتى الآن صوت العربية مُرتفع ، وبإذن الله هروح يوم الأتنين الحرفيين أدور على أى ميكانيكى بيشتغل فى السيينا وأمرى لله

ده مركز حراااااااميه انا للاسف العربيه عطلت مني في المطار سير الكاتينه اتقطع فرحت ليهم عشان الصنايعي يخرج بس للعربيه خمسين جنيه وعشان يركب سير الكاتينه 180 جنيه وللاسف غيرتهم وبعد كده قاللي عايزه طقم صباب قولت ماشي بكام قاللي 1500 جنيه قولت له تمشي طيب كده يومين لحد ما اجيب فلوس وكده قاللي ياباشا تمشي عادي اسبوع لتنين لو حبيت وقد كان العربيه وانا ماشي بيها وقفت فجأهوالموتور قفش والحمد لله غيرت وش سلندر وبساتم وقدر الله وماشاء فعل

فعلا الناس هناك بهايم انا رحتلهم عشان العربية كانت بتنتش دفعوني 450 جنيه والعيب ماتصلحش وقالولي العيب من قاعدة المضرب غيره والعربية حتتعدل وبعد ما اشتريته ب 250 جنيه رحت لميكانيكي تاني طلع العيب من بوجيه كان سنه مقفول عدله ب 10 جنيه

اقتباس:

---

ده مركز حراااااااميه انا للاسف العربيه عطلت مني في المطار سير الكاتينه اتقطع فرحت ليهم عشان الصنايعي يخرج بس للعربيه خمسين جنيه وعشان يركب سير الكاتينه 180 جنيه وللاسف غيرتهم وبعد كده قاللي عايزه طقم صباب قولت ماشي بكام قاللي 1500 جنيه قولت له تمشي طيب كده يومين لحد ما اجيب فلوس وكده قاللي ياباشا تمشي عادي اسبوع لتنين لو حبيت وقد كان العربيه وانا ماشي بيها وقفت فجأهوالموتور قفش والحمد لله غيرت وش سلندر وبساتم وقدر الله وماشاء فعل

---

اقتباس:

---

فعلا الناس هناك بهايم انا رحتلهم عشان العربية كانت بتنتش دفعوني 450 جنيه والعيب ماتصلحش وقالولي العيب من قاعدة المضرب غيره والعربية حتتعدل وبعد ما اشتريته ب 250 جنيه رحت لميكانيكي تاني طلع العيب من بوجيه كان سنه مقفول عدله ب 10 جنيه

---

حلووووووووو اوى الكلام ده عشان اللى مايعرفش يعرف ويخللى باله
دلوقتى بقى عاوزين نحط نقول على الناس اللى بتعرف تتعامل مع البونتو والسيينا
انا هانزل الحرفيين وربنا يسهل واول ماهقع على واحد هاجى اقولكم عملت ايه
بس لو حد يعرف اسعار الشركة الهندسيه اللى كانت توكيل الفيات القديم يبقى كتر خيره لانى على السمع كده همه احسن ناس فاهمين فى العربيات دى وشغالين فيها من ايام مانزلت زيرو