75 ألف جنيه راحت فى الهواء تحت رعايه ختم النسر !!!
يمكن العنوان غريب بس الموقف اللى هقوله دلوقتى اغرب من اى موقف تانى شوفته فى حياتى , اغرب من اننا حتى يومنا هذا ماشيين بالبركه فى بلد النصب فيها اصبح ورا كل باب وتحت كل طوبه واغرب من اننا بنحاسب من بعض قوى خوفا من النصب ومع ذلك بيتضحك علينا بكلمتين حلوين واغرب من انى حتى افكر اكتبه بلغه عربيه فصحى
الموقف ببساطه ان ابن خالتى تاجر سيارات مستعمله داخل فى العشرين سنه خبره فى المجال ده واشترى عربيات اشكال والوان واتعامل مع ناس على كل شكل وحتى اتنصب عليه قبل كدا الا انه عمر ما حصل معاه موقف زى دا
البدايه كأى عمليه شراء عملها طول حياته واحد سمسار معرفه اتصل بيه ان فى عربيه قصاده كويسه فى القاهره بس هو معاه شغل كتير ومش هينفع يشوفها فلو صلاح ( ابن خالتى ) فاضى يروح هو يشوفها ويخلص فيها ليه ودى حاجه عاديه بين التجار فى حاله اذا كانت العربيه تبدو انها كويسه وخساره تروح لغريب يعنى
بالفعل فى يوم نزل صلاح من الاسماعيليه ( محل اقامته ) للقاهره علشان يشوف العربيه وقابل صاحب العربيه فى العنوان اللى قاله عليه ونزل الراجل واتفرجوا على العربيه ( لانسر بومه ) والسعر كان كويس وبعد الفصال تمت الصفقه على 75 ألف جنيه , الراجل كمان كان عنده النترا بس صلاح قالى برغم ان حالتها وسعرها كان حلو قوى الا ان الماديات معاه مكنتش هتكمل ياخدها هى كمان , المهم وصل الاتفاق الى عربون وصلاح هياخد العربيه بالرخصه بالتوكيل وهيقابل الراجل تانى يوم فى الشهر العقارى فى الاسماعيليه علشان يتم تسجيل العربيه وده لأن الراجل قاله ان هو اساسا رايح الاسماعيليه يقضى مصلحه
تانى يوم تمت المقابله وفى الشهر العقارى تم عمل التوكيل لصلاح وتمت الصفقه وخدو صورتين قصاد الشهر العقارى والناس تبادلت الاحضان والبوس وركب الراجل عربيته وسافر والعربيه رجعت على المكتب فى انتظار الشارى الجديد , اسبوع عدى على العربيه مرميه فى المكتب لحد ما ربنا كرمها ببيعه ويشاء القدر ان اللى هيشترى العربيه صاحب صلاح من الزقازيق وهو بالصدفه مكان اصدار التوكيل اللى الراجل باع بيه العربيه لصلاح وخد صاحب صلاح العربيه وطلع بيها يعملها توكيل جديد فى الزقازيق واذا بالموظف يقولهم مين امال اللى ماضيه على التوكيل من تحت دى !!!
فالناس كلها بصت له وقالت ببديهيه واحنا ايه عرفنا مش دى المديره بتاعتكم , الراجل قال المكتب هنا فى الزقازيق مدخلهوش موظفه من اكتر من سنتين والتوكيل ده مضروب
لأول وهله محدش كان مستوعب ايه اللى بيحصل وبعدين الموظف اثبت لهم الكلام بأن مسلسل التوكيل ده اساسا مش تبع الزقازيق ولا اى حد من اللى ماضيين عليه من الشهر العقارى برغم ان الختم ده ميفرقش عن ختم مكتب شهر عقارى الزقازيق حاجه ولأنهم لا يبدو عليهم النصب الراجل قالهم اخلعو من هنا بالتوكيل ده وخلى بالكم العربيه دى غالبا يا مسروقه يا معمول بيها مصيبه
دلوقتى العربيه موجوده وفيها رخصه بس محدش عارف هى منين ولا مين صاحبها ولا قصتها ايه اساسا , وطبعا اللى هيروح المرور يطلع لها شهاده بيانات او حتى يستعلم عنها هيتاخد لو العربيه متسجله سرقه وكان الحل الوحيد ان صلاح راح بيها القسم وبلغ عنها وعن القصه كلها ومحدش يعرف مين اللى باع العربيه ولا اساسا اذا كانت البيانات اللى فى التوكيل سليمه او حتى بطاقه الراجل سليمه ولا لا
العماره اللى تمت تحتها الصفقه مفيهاش بالمناسبه ولا شقه فاضيه والراجل ده محدش فى العماره يعرفه اساسا ولا فى حد فى العماره كلها معاه عربيه بومه او النترا ويظهر انه كان مستخبى فى المدخل , والبطاقه حتى الان لسه متعرفش قصتها بس بالطبع هى بطاقه مضروبه , والختم اللى اتعمل بيه التوكيل صحيح او يمكن مضروب زى الصحيح تمام ومحدش يعرف مصدره وربنا يعوض على صلاح فى ال 75 ألف جنيه
مين يتخيل وهو بيشترى عربيه ان صاحبها المتعاون المحترم المثقف البيه ده حرامى , ومين يتخيل ان واحد بالجراءه دى انه يروح لحد الشهر العقارى اللى جنب بيتى علشان ينصب عليا ومين حتى يتخيل ان التوكيل اللى فى ايده وختم النسر منور عليه مضروب
انا مش شايف صلاح غلطان ولا شايف الحرامى غلطان بس هو حق الحكومه اللى خلت شويه حبر فى بتاعه منقوشه تبقى مستند يحفظ حقوق الناس بدل ما يكون فيه دائره الكترونيه تربط مكاتب الشهر العقارى للكشف على صحه التوكيلات والواحد واقف مكانه
الخلاصه : اوعى واياك تسيب رخصه العربيه فيها وانت راكنها - واوعى يغرك شكل واحد بيه او كلامه المعسول - واوعى تصدق نسر عبيط قاعد على ورقه انه هيحميك من النصب - واوعى حتى تنام فى البلد دى وتغمض عينيك الاتنين وتفتكر انك فى امان
