ما انا بقولك السوق بقى مستفز
امبارح واحد قاللى العربية دى مطلوبة اوى فى اسيوط كنا رايحين نشوف عربية لأخو مراتى فى بولاق
المهم مطولش عليك قول طول
قللى عايز كام قلتله 60000 قاللى قدامى اختها بس افتك و افرس منها و على 30000 قلتله و انا اشتريت قاللى هاتعمل بيها ايه قلتله اصلى هاجمع اللى فى مصر وو افتح توكيل خصوصى ملكش فيها
ورانى العربية قسماً بالله الشاسية ملوح و مفيش قايم مفيهوش شروخات و العربية مغيرة وش سلندر بس عايزة طقم شنبر بس و التكييف زى الفل عايز يتشحن و الباور انعم من اليابانى بس عايز زيت نضيف و العفشة عايزة عفشة و تبقى عربية و التابلوه عايز لمض و الفرش عايز كسوه و السقف عايز فرش و انت فاكه ابقى خد بالك من البارومه اللى فى القايم و دق الخبطتين تلاته اللى فى السقف و عايز طقمين فوانيس ورا و قدام فوانيس الجناب سليمه و عايزة فردتين كاوتش قدام و استنضف من اللى هيفضل فردتين لورا و طبعاً تاخدها تعملها سرفيس لأن طلمبة المية بعافية و الكاتينه بتاعت بلادها ( العربية عاملة 120000 كم ) و شوية جوانات و تلحم الشكمان عشان فيه خرم و العلبة اللى ورا دايبة و قفل الشنطة بيعلق و اظبط الأبواب
والله عربية الماظ اهه عايز ايه تانى ( بارومة بلادها ) اه ازاز ورا مكسور و ازاز قدام فيه شرخ واحد بس بطول الأزاز و مفيهاش مرايات لا جوه و لا بره
بس العربية فابريكا جوه و بره
قولتله اللى فيه القسمه عشان لسانى طويل و تفيت فى وشة و مشيت
المفضلات