إشتريت فانوس شابورة (فوج) و ساح بعد 10 دقايق
يا جماعة أنا من يومين كده كنت عند الكهربائي كان بيعملي شوية حاجات في العربية
المهم العربية أنا شاريها و فيها فوجات , بس واحد شغال و التاني كان مكسور, فقلت بالمرة في وسط الشغل أغير المكسور
فسألته هل فيه حد قريب بيبيع فوانيس شابوره فوصفلي واحد قريب منه , رحتله سألته قاللي أيوه عندي وقام بعت واحد من عنده جابه تقريبا من مخزن جنبه , لما جه قعدت أتفرج عليه لقيت شكله مش بطال مع إن تقفيله كان مش قد كده
سألته سعره كام , مع العلم إنه فانوس واحد بس شمال , فقاللي 45 جنيه , بصراحه أنا إستغربت السعر لإني عارف إنه أغلى من كده , بس طبعا فرحت إنه رخيص حتى ماحولتش أفاصله و إشتريته و مشيت و رحت للكهربائي عشان يركبهولي
المهم بعد مامشيت من عند الكهربائي شوية و ركنت أجيب حاجه بابص على الفانوس لقيت فيه حاجه غريبة مكلكعة فيه من جوه , ركزت فيها لقيت إن الجزء اللي بيغطي اللمبه من جوه ساح من حرارتها و بقى عامل زي اللبان و وقع جوه علبة الفانوس البلاستيك , كل ده و أنا مكملتش ربع ساعه مشغله
بصراحه أنا صدمت في سوء جودة الفانوس , هو صحيح صيني بس مكنتش متخيل إنه زفت للدرجادي , والوقت كان إتأخر فمكانش ينفع أرجع تاني للكهربائي عشان يفكهولي و أرجعه
المهم دلوقتي السؤال : هل أسيبه كده و أستخدمه لغاية ما يجيب أخره , و لا بلاش أستخدمه و أفكه لإنه ممكن يبوظلي حاجه تانيه؟؟ ممكن يسيحلي كتاوت مثلا أو يسيح مكانه في الإكصدام زي ما سمعت
ياريت لو حد عنده فكرة أو تجربة مع فوجات زبالة كده برضه يقوللي أعمل إيه
مع العلم إني مش ناوي أرجعه لإن الراجل بعيد ده أولا و ثانيا إحتمال كبير مايرضاش ياخده و تبقى خناقه و وجع قلب على الفاضي
