عرض للطباعة
العربية كان بقالها يومين مركونة و نزلت الصبح جيت اديها اول تكة اللى بتشغل الكاسيت ما اشتغلش، رحت مكمل و العربية مارديتش تدور غير بعد محاولتين و بصعوبه و فضلت ترج شوية، المهم لما وصلت الشغل بطلت و دورت 3 مرات لقيت كله عادى، انا ان شاء الله هفوت اكشف على البطارية بس ياريت تقولولى رأيكم علشان محدش يشتغلنى، البطارية 55 نسر فارتا سائلة و بقالها 14 شهر.
ممكن تكون نسيت حاجه شغاله زى نور الصالون او نور الشنطة معلق
عموما اكشف على مياه البطاريه ممكن تكون ناقصه
لو عايز تعرف البطاريه بايظة و الا لأ افتح كل الأغطيه و خللى حد تانى يدور العربيه لو لاقيت فقاعات فى احد العيون (بلغة الصنايعيه البطاريه بتغلى) يبقى لازم تتغير
بلاش تخلى الكهربائى يعمل قفله لحظيه على البطاريه عشان يكشف عليه لان ده بيدمر الواح الرصاص و بيقصف عمر البطاريه حتى ولو كان لمده صغيره جدا
ممكن البطارية بتهييس او فيه قطاش عايز يتنضف او يتربط كويس
MMamdouh
طب لو وصلت لتغيير، أجيب 55 ولا 70؟
هي غالبا بطارية
بس حد يعرف اسعار البطاريات دلوقت انا سمعت انها غليت اوي يا ريت لو حد يعرف يقولنا
انا كنت جايب فارتا 60 او 62 او حاجة كدة... 70 كبيرة اوى و حتبقى غالية جدا
MMamdouh
والله اسعار البطاريات بقالها فتره بتغلى كل اسبوع بقت زى الطماطم مجنونه
70 طبعا احسن بس 60 شغاله وانت و ميزانيتك
طب يا اخوانى من دلوقت للساعة 5 ممكن ترشحولى اماكن ثقة بين مصر الجديدة و المقطم و ما بينهما للكشف على البطارية و تغييرها لو احتاجت للتغيير؟
فى محل بطاريات كويس فى المقطم جنب كوك دور على طول ...
عنده فارتا ألمانى جافة ونسر فارتا عادية
ونوع جديد كورى مستورد ممتاز Hyundai Enercell جافة برضو ....
الـ 55 أمبير منها بحوالى 500 جنيه بالقديمة
وأى خدمة
معلش يا أخوان، شدوا حيلكم شوية فى المعلومات، أخوكم قلقان
صباح الخير يا جماعة الخير، معلش انا صدعتكم بحكاية البطارية دى بس معلش بقى.
المهم، امبارح دارت عادى و أنا ماشى من الشغل و لفيت لفة كبيرة من الساعة 5 لغاية الساعة 10 رحت لبتاع البطاريات، كشف شحن لقاه كويس بس معندوش ميه نزود البطارية، رحت لواحد تانى و قاس الشحن لقاه كويس 14.07 و 3 عيون ناقصين ميه بسيط، راح مزود و لما دورت طلعت من البطارية ريحة تشرق زى حاجة حمضية مع العلم ان لما فتحنا العيون كانت بتطلع بخار بسيط، الراجل قالى جرب كام يوم و شوف و النهاردة الصبح دارت عادى، فياترى ايه رأيكم، أعمل حسابى انى ممكن احتاج بطارية جديدة و لا الموضوع طبيعى لما اركن العربية يومين فى برد المقطم فيحصل كده؟
ميه البطارية عنصر اساسى فى عمل البطارية و طالما كانت ناقصة يبقى اداء البطاريه حيقل و ضيف على كدة الجو البارد يبقى ممكن جدا البطاريه تخررف و دة اللى حصل معاك
جرب كدة الكام يوم اللى جايين و شوف ايه النظام و انت بتدور الصبح بدرى و الجو بارد... لو كل مرة بتدور معاك عادى يبقى مفيش مشاكل
MMamdouh
الرائحه طبيعى لان البطاريه ملينه حمض كبريتيك
لكن حضرتك ما قلتلناش فيه فوران او غليان او فققيع من احد عيون البطاريه؟ هو ده الفيصل فى الموضوع
اقتباس:
المشاركة الأصلية كتبت بواسطة ahmedezzat78
بصراحة مشفتش فى الضلمة، بس كان فيه بخار و العامل قالى طبيعى علشان، بس محستش بأى فوران او صوت فى البطارية