الموضوع: بحمد الله تعالى جبنا البلوبيرد سيلفي

الف مبروك وربنا يباركلك فيها

مبروك عليك,,,,
وعقبال ما تكمل بيها 325.000 كم
:)))

متشكر جدا لكل اللي تفضل بالتهنئة.
انا الحقيقة مشغول باستمرار لدرجة لا تساعدني على كتابة تقرير مفصل متكامل مرة واحدة.
و لكن انا حاكتبلكم اخبار العربية دي ان شاء الله اول بأول . كل ما الاقي حاجة تلفت نظري.
و يمكن بعدين نجمع و ننظم الكلام ده في تقرير متكامل. فأرجو تتحملوني.
للأسف المعرض لسه ما بعتش اوراق العربية بما فيها الكاتالوج، و بالتالي فيه حاجات لسة ما عرفتهاش.
اللي هاقوله المرة دي و المرات اللي جاية هيكون غالبا مقارنة بالصني. يعني فيها كذا مش في الصني، او ناقصها كذا كان في الصني. و ده لعدة اسباب.
أولا ده منتدي نيسان و الناس هتكون فاهمة تقارن بايه.
ثانيا انا فضلت سايق الصني 33 شهر فبالتأكيد تركت في اثر، كما اني لسة محتفظ بيها و لسة هاركبها تاني.
و احب هنا اقول كلمة صغيرة في وداع الأكسنت. الصراحة زعلت عليها انا و المدام، لأنها ما زعلتناش في حاجة خالص، و لأول مرة ابيع عربية فقط بغرض التغيير.
المهم بخصوص السيلفي دي انطباعاتي الأولى بخصوص الصالون و بعدين نبقى نتكلم عالسواقة.

• من الحاجات اللي مش فيها و افتقدتها: ال Shift Lock Override Button اللي هو الزرار الأحمر اللي قدام الفتيس في الصني اللي بيفك الفتيس من البارك و انت طافي العربية. و ده معناه انك لازم تركنها صف اول مظبوط و ما ينفعش صف تاني. بيقولوا التويوتا كده برضه.
• حاجة غريبة و زعلت المدام: المراية بتاعة الزينة Vanity Mirror محطوطة في الشماسة اللي قدام السواق مش اللي قدام الراكب. يمكن علشان السواق في اشارات المرور يقدر يظبط مكياجه.
• زرار الأوتو بتاع زجاج السواق اللي بيفتح و يقفل للآخر بضغطة واحدة في الصني هنا بيفتح بس و للقفل تخليك شادد لفوق.
• الظاهر مافيش ساعة في التابلوه و معتمدين على ساعة الكاسيت (قلتلكم لسة ما شفتش الكاتالوج)
• و مش باين ماركة الكاسيت بس فيه سي دي
• اماكن التخزين مختلفة شوية عن الصني و ان كانت كتيرة و حلوة برضة بس المكان اللي في الباب مش عارف بتسموه ايه اضيق من في الصني يعني ما عدتش اقدر احط فيه النظارة
• فيه مكان البياع قال لي انه للنظارة فوق المراية بس حاولت احط فيه النظارة ما دخلتش.
• الدرج اللي علي اليمين بين الكرسيين الأماميين عالي و دي حاجة حلوة علشان تقدر تركن عليه، و كمان متقسم مساحتين فوق بعض بينهم درج اوسط و دي حاجة جميلة
• المسند بتاع باب السواق واطي شوية و اماكن الزراير بعيدة شوية محتاجة الواحد يتعود عليها بس يمكن ده لأني رجعت الكرسي ورااااااااااااااا خالص بشكل مش متعود عليه في الصني، براااااح بقي ورايا حتى بعد ما رجعت الكرسي.
• حامل الأكواب و آه من حامل الأكواب، موجود مكانه ورا الفتيس مترتبين ورا بعض مش بجوار بعض و للأسف و انا باحاول افتحه و اقفله اول يوم انكسر مني حاحاول معاهم في التوكيل في صيانة الألف ان كان ممكن يتغير في الضمان. الحمد لله ان جت على قد كده
• فيه لمبة اضاءة في منتصف السقف بالإضافة الى لمبتين تانيين قدام فوق المراية

طبعا كل الكلام ده يعتبر كلام فاضي بالنسبة لإحساس المتعة اللي بيغمرك من لحظة ما تدخل العربية و تقفل الباب لحد ما تنزل منها. بس حبيت انقل الواقع بأمانة بقدر المستطاع.
مع تحياتي
د. عيد

الف مبروك وربنا يباركلك فيها