سيارتي الفيات ... على قيد الحياة بقلب نابض من دايوو :)

عنوان غريب ؟ مش كدة !

يمكن دي اول مرة اكتب في قسم دايوو .. بس معرفش اراسل شركة دايوو منيني :)

فقلت اراسلكم انتوا !

سيارتي المتواضعة ... تم العثور عليها ... مفارقة الحياة .. في الشارع ..

حيث تعذر وصور الدم الي المخ .. .. اقصد البنزين الي المحرك .

و ذلك بسب قلب الماني فاشل ... او " طرمبة بنزين " من صنع بوش الالمانية !

حصل نفس الموقف في 2008 و غيرت الطرمبة بالكامل في التوكيل بسبب بنزين مغشوش .. و لبست 1350 جنيه مصري غير المصنعية و غير 4 ايام كاملين ضايعة !

تكرر الموقف يوم الاحد امبارح ... ودعيت على فيات وعلى بوش و على كل شيء ايطالي .. علشان عرفت اني حلبس نفس المبلغ تاني .

بس المرة دي .. استحدقت .. وروحت للمكيانيكي بتاعي ....

قك الطرمبة .. وقالي زي المرة الي فاتت بالظبط .. بس قالي الطرمبة مش بايظة .. دي عايزة قلب فقط !

اتصلت بالتوكيل .. قالولي القلب لا يباع ! قالي يعني حــــرام مثلا !

اتصلت بمحلات قطع غيار فيات ... قالولي القلب ب 600 جنيه مصري .. ومش اصلي كمان !

لكن عم شعبان الميكانيكي حبيبي !

كان ليه راي اخر !

الا وهو .. ان قلب سيارتي ... مشابه بنسبة 95% لقلب السيارة الي بقيت احبها فجاة!

الجولييت او الانوس ...

ضربتها في دماغي ... وبصراحة خفت علشان .. عارف ان كل سيارة ليها طرمبة معينة علشان الضغط الي خارج منها ..

على العموم قالي نجرب نفعت نفعت .. منفعتش .. اديك حاولت !

وفعلا روحت لمحل بتاع قطع غيار دايوو ..

و كان في نوعين من القلوب ... واحد كوري و واحد تايواني ..

طبعا قلت الكوري احسن .. بكام يا عم !ب 160 جنيه !

خدته ب 140 ! و انا ماش بزغرط ! ( كنت حلبس يا 1300 جنيه يا 600 جنيه ) .

خدته للميكانيكي تاني ... قارناه بالاصلي بتاع السيارة تقريبا هو هو بالملي و دخل في نفس مكانه و فيه نفس شكل و عدد الوصلات ..

وصلنا ... ركبنا ....

شغلت الكونتاكت ! و سمعت صور زئير الفار الايطالي بتاعي :) و ابتسامة عرضية بلهاء على وجهي !

" اكبس لحد ماتفصل يا باشمهندس " قالهالي الميكانكي !

كبست لحد مافصلت 7200 rpm و صوتها مثل الموسيقى في وداني بعد يومين من البهدلة مع التاكسي و المواصلات !

الحمد الله العربية ماشية زي الفل .. و كله الي دفععته بايد الراجل .. 190 جنيه مصري بدل من 1350 جنيه !

الواحد والله عرف قيمة السيارات الكورية في مصر الان :)

شكرا دايوو !

و اسف على الموضوع الي ملوش اي فائدة لكم :) بس حبيت اشارك :)

عربية مالتي ناشيونال !!!

طب انتا بعد كده ايه موقفك هتكتب في فيات

و لا هتكتب في دايوووو

بعد ما العربية بقت مهجنة

يعنى عمليه زرع قلب دايو كوري
الف مبروك

اقتباس:

---

المشاركة الأصلية كتبت بواسطة ahmed anwer

عربية مالتي ناشيونال !!!

طب انتا بعد كده ايه موقفك هتكتب في فيات

و لا هتكتب في دايوووو

بعد ما العربية بقت مهجنة

---

حكتب في فيات .. .انا كنت كاره العربية و هي بايظة ...

بس لما اشتغلت .. و مشيت في الشارع تاني .. نيست كل الكره و الاحاسيس المادية و حبيتها تاني :)

بس ان شاء الله لو ليا نصيب .. او فرصة قريبة .. سيارتي الجاية كورية 100% ان شاء الله :)

لا انت مفروض تكتب في فيات وفي دايو ... لان العربيه خليط دلوقتي ... ولو كتبت في فيات بس العربيه هتزعل منك .. وانا هوحي الطرمبه متشتغلش (:

مبروك نجاح العملية
و فعلا أنا رأيي أن العربيات الكوري أسلم حل اليومين دول

مبروك نجاح التجربه :verygood:

ألف مبروك لنجاح عملية زرع القلب لعربيتك

MMamdouh

الف مبروك علي العملية الناجحة والله انا حاسس بفرحتك من خلال السطور ربنا يفرحك كمان وكمان

بس اهم حاجة ربنا يباركلك في الميكانيكي المحترم ده

كويس والله يا كريم ان العربية نجحت
ههههههههه دلوقتى دايو هى اللى ممشياك
وكويس والله ان الميكانيكى ده فادك فى موضوع القلب

اقتباس:

---

المشاركة الأصلية كتبت بواسطة darehawk

بس اهم حاجة ربنا يباركلك في الميكانيكي المحترم ده

---

انت لفت نظرى لحاجة... هو مش اللى حصل دة يندرج تحت بند الفهلوة؟؟؟؟

يعنى لو الموقف دة محصلش وواحد دخل قال "ما نركب طلبة لانوس فى الفيات" كنا كلنا حنقولة "اجرى العب بعيد"... صح؟؟؟

يبقى الفهلوة فيها جانب كويس و جانب وحش.... مش كلها وحشة

الحلو هو انك تلاقى حل امن و منطقى و عملى لمشكلة انت بتواجهها... زى موقف الطلمبة دة... الراجل كان حيدفع مبلغ و قدرة فى طلمبة كاملة... و الميكانيكى الفهلوى (الفهلوة الكويسة مش التانية) قدر يوصل لحل من خلال فهمة لان الطلمبة بالكامل عبارة عن موتور كهربائى (قلب) و دة الجزء اللى فيه المشكلة مش الطلمبة على بعضها... و بعد مقارنة بين قلب الفيات و قلب الدايو لقى الاتنين واحد (و دة منطقى جدا لان غالبا الطلمبات فى العربيات المختلفة بيبقى فيها موتور من شركة معينة و باقى جسم الطلمبة هو اللى من صناعة الشركة اللى عملت العربية) و بالتالى قدر يوصل لحل ارخص بكتير لانة عارف ان قلب طلمبة الدايو ارخص و ينفع يركب فى نفس الوقت... يعنى الميكانيكى دة دماغ و راجل فاهم اوى ومتطلع و عارف بيعمل ايه

اما الوحش بقى فى الفهلوة... تخترع و تالف حاجات ملهاش علاقة باى حاجة فى الدنيا للوصول لحل للمشكلة... صحيح الهدف واحد زى الفهلوة الحلوة بس الوسيلة للوصول الى الغاية دى غلط خالص... و كل ما زاد البعد فى طريقة الحل كل ما كان قدر الفهلوة السيئة اكبر...

يعنى فيه واحد ممكن يفكر يستبدل الطلمبة كلها بطلمبة خارجبة...

http://www.flat4online.co.uk/catalog...roexternal.jpg

و فيه واحد فهلوى اكتر حيلغيها خالص و يركب واحدة ميكانيكية...

http://img.alibaba.com/photo/2585689...3100_87798.jpg

اما التالت بقى..... لا تعليق...

http://www.2kstores.com/general_store/images/01318.gif

MMamdouh

اقتباس:

---

انت لفت نظرى لحاجة... هو مش اللى حصل دة يندرج تحت بند الفهلوة؟؟؟؟

يعنى لو الموقف دة محصلش وواحد دخل قال "ما نركب طلبة لانوس فى الفيات" كنا كلنا حنقولة "اجرى العب بعيد"... صح؟؟؟

يبقى الفهلوة فيها جانب كويس و جانب وحش.... مش كلها وحشة

الحلو هو انك تلاقى حل امن و منطقى و عملى لمشكلة انت بتواجهها... زى موقف الطلمبة دة... الراجل كان حيدفع مبلغ و قدرة فى طلمبة كاملة... و الميكانيكى الفهلوى (الفهلوة الكويسة مش التانية) قدر يوصل لحل من خلال فهمة لان الطلمبة بالكامل عبارة عن موتور كهربائى (قلب) و دة الجزء اللى فيه المشكلة مش الطلمبة على بعضها... و بعد مقارنة بين قلب الفيات و قلب الدايو لقى الاتنين واحد (و دة منطقى جدا لان غالبا الطلمبات فى العربيات المختلفة بيبقى فيها موتور من شركة معينة و باقى جسم الطلمبة هو اللى من صناعة الشركة اللى عملت العربية) و بالتالى قدر يوصل لحل ارخص بكتير لانة عارف ان قلب طلمبة الدايو ارخص و ينفع يركب فى نفس الوقت... يعنى الميكانيكى دة دماغ و راجل فاهم اوى ومتطلع و عارف بيعمل ايه

اما الوحش بقى فى الفهلوة... تخترع و تالف حاجات ملهاش علاقة باى حاجة فى الدنيا للوصول لحل للمشكلة... صحيح الهدف واحد زى الفهلوة الحلوة بس الوسيلة للوصول الى الغاية دى غلط خالص... و كل ما زاد البعد فى طريقة الحل كل ما كان قدر الفهلوة السيئة اكبر...

---

كلام حضرتك مظبوط ميه في الميه وكمان فهلوة مع علمه انها بالتقريب هي هي بتاعة الفيات يعني صنايعي وبيشغل دماغه ومش مكسل زي الميكانيكي العادي انا لما اشتريت الفيورا كان زرار الانتتظار مش شغال روحت سالت عليه قالولي الاسباني ب 150 جنيه فقولت مش حعمله هو زرار ب 150 حاجة مش معقولة روحت لواحد كهربائي محترم من اللي بيشغلو دماغهم قالي انا حاخد زرار من اللي في التابلوه وخرمه بشنيور صغير وجاب زرار بجنيه ولزقه وركبه في التابلوه وشكله احسن من الاصلي الموضوع كله وعملي حاجات تانية كما اخد 15 جنيه يعني شال صفر ههههههههههه طبعا بقيت اجيله مخصوص مع العلم اني ساكن بعيد جدن عنه بس اجبرني على احترامه

مبروك عليك,,,وعقبال ما تقلبها كلها دايو
:)))

فى واحد قالى ان طرمبة البنزين فى العربيات الجديدة كلها قلبها واحد بيختلف الكافر الخارجى بس

مش عارف ده صح ولا لاء

ياريت تنقل الموضوع فى قسم الفيات علشان الاستفادة به هناك

الف مبروك على العزيمة والاصرار
ولا للاستغلال التوكيل

مبروك على نجاح العملية
انا كان لى تجربة تقريبا مشابهة بس الحمد لله ضحيت بالم والجنين علشان نجاح العملية
وبعت الفيات ورزقت باحلى مولود
دايو لانوس ربنا يباركلى فيها وعقبالك
ههههههههههههههههههههههههه هههههه

اقتباس:

---

المشاركة الأصلية كتبت بواسطة kodak_gti

فى واحد قالى ان طرمبة البنزين فى العربيات الجديدة كلها قلبها واحد بيختلف الكافر الخارجى بس

مش عارف ده صح ولا لاء

---

+1111111111111

شكراً لطرح التجربة ... و مبروك عليك

الف مبروك وربنا يسترها معاك

الله يبارك فيكم جميعا و متشكر على الردود .

الميكانيكي ده انا بتعامل معاه من 40 الف كيلو فاتوا :) راجل فاهم جدا في جميع انواع السيارات تقريبا و مكانه قريب من البيت هو وراء السلاب في شارع كابول ( شارع موازي لمكرم عبيد ) اساأل عى على اسطة شعبان هناك حيدلوك جنب قهوة اسمها السلام ( من اعفن القهاوي الي ممكن تعد فيها بس بضطر اعد لما اكون بصلح حاجة عنده ) :)

سبحااااااان الله يا جماعة انا معايا فيات باليو برده وحصل نفس الموضوع معايا بالظبط موضوع موتور طرمبة البنزين وطبعا لان انا في دمياط ومقدرتش اروح التوكيل لما العربية وقفت الميكانيكي برده قالي ان اقرب مقلب هوا بتاع الدايو وجابلي واحد استيراد ومن يومها الحمد لله ماشي بيها .. انا كمان بقلب نابض من دايو ... بس صدفة جاااااامدة 2 باليو ومع مين مع دايووووووو بردوووو

اقتباس:

---

المشاركة الأصلية كتبت بواسطة ahmadmidop

سبحااااااان الله يا جماعة انا معايا فيات باليو برده وحصل نفس الموضوع معايا بالظبط موضوع موتور طرمبة البنزين وطبعا لان انا في دمياط ومقدرتش اروح التوكيل لما العربية وقفت الميكانيكي برده قالي ان اقرب مقلب هوا بتاع الدايو وجابلي واحد استيراد ومن يومها الحمد لله ماشي بيها .. انا كمان بقلب نابض من دايو ... بس صدفة جاااااامدة 2 باليو ومع مين مع دايووووووو بردوووو

---

اهلا بيك ضمن مجموعه قلوب دايو :Oc_sun1[1]:

خونه بس فين الميكانيكي ده بالظبط عشان لو إحتجت حاجة في ال١٢٨ (أكيد لسه بدري على ما أفتكس في اللينيا)

الف مبروك يا باشا و برد حصل معايا نفس الموقف في عربية الوالد اللادا سمارة 2004 و فجأة الدنيا وقفت و تمشي متر و تقف 10 كلمنا التوكيل (اللي ورشة الميكانيكي احسن منو و الله) يقوم البيه المهندس المحترم اللي حولوني بيه يقلي اه دي طرمبة بنزين قلتلو جميل و الحل قالي هاتلي العربية و نشوفها موجودة ولا لأ يا عم العربية مبتمشيش و لو عرفت اجيبهالك مش هعرف اوح بيها لو مش موجودة و بكام يا عم طيب قالي لو موجودة هتبقى في حدود 1350 جنيه غير الضريبة و المصنعية بس
و اتحلت ب 150 جنيه ثمن موتور بوش الماني محترم و لسة بيرش بنزين لحد دلوقتي :)

اه يا باشا على فكرة انت كدة ساكن جنب مدرستي الحبيبة يعني ولاد منطقة واحد خصوصا ان عشت في المدرسة دي من kg لحد الثانوية

الف مبروك على نجاح العملية و مستنيين الباقى

ده اكبر رد على اللى بيشككوا فى امكانيات وقدرات الدايو المحبوبه والف الف مبروك

بس بصراحه
الف مليون شكر للميكانيكي الجامد بتاعك
لو واحد تعبان مكنش هيقدر يقولك المعلومة السحرية بتاعة التشابه بينها وبين بتاعة الدايو
والف مبروك لحضرتك طبعا

اقتباس:

---

المشاركة الأصلية كتبت بواسطة yoko

خونه بس فين الميكانيكي ده بالظبط عشان لو إحتجت حاجة في ال١٢٨ (أكيد لسه بدري على ما أفتكس في اللينيا)

---

اسطة شعبان , شارع كابول عند قهوة السلام , اســال عليه هناك هو في نفس البلوك .

-

واضح ان فيه عيب في فيات عامة في موضوع الطرمبة و نوع البنزين ..

3 باليو الى لان اعرفهم ..
2 جراند بونتو ..

واحشنييي ياراجل فينك

اقتباس:

---

المشاركة الأصلية كتبت بواسطة ahmadmidop

واحشنييي ياراجل فينك

---

اهه :) بدور على عربية جديدة :) ( مش جديدة اوي يعني )

يا اما حقلب الخاريو اوتوماتيك :)

تجربة رائعة , و الف مبروك و الحمد لله , و الميكانيكي فعلا يستاهل الاحترام
:) , و صح خد كوبي من الموضوع في قسم فيات , للافادة
:)