يبجو 405 بس شوية مشاكل

امبارح اول مرة اسوق اليبجو 405 ( 2004 ) لى بعض الملاحظات ياريت الاخوان يساعدنى فى حلها :
1- الدريكسون تقيل ( فى الركنة مشكلة )
2- صوت الموتور عالى جدا
3- مؤشر الحرارة مابين 70-90 ( بس انا مش عارف هو دى الطبيعى اما لا )
4- العريبة فى السحب قوية ما شاء الله و لكن حاسس ان استهلاكها جامد برضة
5- فى اصوات هدب و رزع فى المشى و الحقيقة مش احدد ( جهلى و أول مرة فى البيجو ) دى بلية وقواعد موتور اما ايه بالضبط
6- العداد بتاع الرحلات مش شغال ادوس على الزار اللى بيصفر مش شغال
على العموم ان عاملت صيانة ( زيت موتور و فلتر + مراجعة على دورة التبريد بالكامل ) بس عايز نصيحة كل الافاضل بالمنتدى لانى مش عايز اكره العربية وانا لسه جابيها من اسبوع بس

أولاً الف مبروك على العربية وربنا يديك خيرها ويكفيك شرها
واهلا بيك معانا في عصابة بيجو

1- الدريكسون تقيل ( فى الركنة مشكلة )

* الدريكسيون هاف باور مش باور كامل بس مش ازمة خالص راجع بس زيت الباور طلمبة الباور والعلبة ممكن تكون محتاجة شوية صيانة.

2- صوت الموتور عالى جدا

* عالي جدا دي مبالغ فيها الا لو في مشكلة في العربية عندك
سؤال انت كان معاك عربية نوعها ايه قبلها ؟ ... لأن لو يابان أو كوري أكيد صوت الموتور أقل بكتير من البيجو والاوروبي عموما

3- مؤشر الحرارة مابين 70-90 ( بس انا مش عارف هو دى الطبيعى اما لا )

* الـ 90 - 95 هو الطبيعي بتاع العربية وكدة عند الحرارة ممتازة ماشاء الله

4- العريبة فى السحب قوية ما شاء الله و لكن حاسس ان استهلاكها جامد برضة

* شوف العربية بتعمل معاك كام في الصفيحة ولاحظ انها كاربراتير

5- فى اصوات هدب و رزع فى المشى و الحقيقة مش احدد ( جهلى و أول مرة فى البيجو ) دى بلية وقواعد موتور اما ايه بالضبط

* لازم تراجع على العفشة بالكامل وتغير اي حاجة ممكن تتغير بجديد وماتهملش فيها
ولاحظ ان عفشة العربية معمرة جدا وتفوت في الحديد بتجبر الواحد انه يمشي في اي حته بقلب جامد

6- العداد بتاع الرحلات مش شغال ادوس على الزار اللى بيصفر مش شغال
على العموم ان عاملت صيانة ( زيت موتور و فلتر + مراجعة على دورة التبريد بالكامل ) بس عايز نصيحة كل الافاضل بالمنتدى لانى مش عايز اكره العربية وانا لسه جابيها من اسبوع بس[/color]

* تكره مين صدقني انت مقبل على قصة حب مع العربية دي بس انت شد حيلك وظبت الحاجات الصغيرة دي واستمتع بالعربية

ولو محتاج اي حاجة كلنا في الخدمة

الله يطمئن قلبك يا مهندس احمد و شكراً ياباشا على ردك الجميل
الحقيقة انى كان معى يابانى قبل العربية دى وانا مش عايز افضل اقارن بينهم فى موضوع النعومة بس انا حاسس لادريكسون عاملة زى عربيتى 128 زمان ان شاء الله اكشف على حضرتك وصينى به بس بعد اذنك انا بأسال على واحد باع عشفة كويس و امين و طبعا فاهم فى البيجو و كمان ميكانيكى معلم يضبط موضوع علبة الدريكسون و صوت الموتور شوية
و متشكر جداً يا زعيم

يا باشا احنا كلنا اخوة ومافيش اي حاجة

انا باتعامل مع واحد في الهرم عند مسرح الزعيم
مش عارف هايكون بعيد عليك ولا عادي

هو ميكانيكي بيجو وكان شغال في التوكيل والورشة ميكانيكا وعفشة ومتخصص بيجو وليه في 405 اوي
اسمه ياسر - هاتدخل من الشارع الي على ناصيته الشبراوي لحد ما تلاقي حتة واسعة يمين وشمال ... تدخل يمين هو اخر ورشة على الشمال
وإن شاء الله يظبطلك العربية.

ربنا يكرمك انا ساكن فى شارع السودان هو قريب مش بعيد اوى و انا عارف الحتة دى بس اروح كده من حجز ولولا اكلمه بالتليفون عشان ليكون زحمة . و الله يظهر قصة الحب هتبدى و لا ايه

الف مبروك ياباشا وربنا يعطيك خيرها ويكفيك شرها
من الواضح ان العربية اللى معاك عاوزة شوية ضبط وكلها مشاكل سهلة بس البليجو بالذات عاوز متخصص فاهم فيه
بالنسبة للصوت بتاع الماتور انا عندى العربية ملهاش صوت نهائيا لأنها فيها لباد سليم وكمان الشكمان بتاعى فيه علبة البيئة اللى بتكتم الصوت نهائيا والعلبة ديه مش موجوده فى سيارات وجيه باشا اباظا
ممكن تراجع على ضبط الماتور ولباد الكبوت والشكمان بالكامل
العداد ده امرة سهل بس هيتفك اى واحد بتاع عدادات يعملهولك
العفشة لازم تراجع عليها
بص من الأخر العربية دية لو أعتنيت بيها وجبت كل قطع غيارها أصلية هتاخد منها اداء فوق ماتتخيل ولا يمكن تفرط فيها زينا كدا

هيرو باشا شرف يا فندم مرورك و ردك
هى العربية وجيه أفندى اباظة فعلاً انا حاولت النهادرة بعد الشغل اروح عند ياسر الميكانيكى اللى قالى عليه استاذ محمد بس الزحمة و العربية بطلت منى 3 مرات فى السكة و الله اتخنقت من الزحمة و اللى حصل اول مرة من فترة طويلة عربية تبطل فى السكة تخيل فى اشارة - خدت كلام من الناس - بس الصبر مفتاح الفرج
اما عن موضوع اللباد و علبة البيئة لا اعرف عنهم شيئ الا من حضرتك و هم ممكن الواحد يشترهم يعنى ؟؟
اسف جداً للأطالة

ياباشا ده بس من كرم اخلاقك احنا اللى شرف لينا وجودك معانا بمنتدى بيجو

هما فعلا موجودين عند تجار الأستيراد بس لازم تكون حالتهم جيدة جدا