الموضوع: دار المدرعات

و عليكم السلام و رحمة الله و بركاته
شوف يا سيدى
عندك السكة الأولى إنك تمشى دائرى ، و ده أوفر ف الوقت علشان الزحمة و كده لكن السكة تعتبر أطول بكتير من جوة البلد
و إنت جاى م الزراعى حتلاقى الدائرى بيعدى من فوق حضرتك تاخد تانى يمين و تطلع فوق و تمشى ف اتجاه مدينة نصر و تفضل ع الدائرى لحد ما توصل لمنزل جسر السويس تاخد يمين و تنزله و تفضل ماشى ، حتلاقى كوبرى الهايكستب تطلعه و تمشى معاه و تفضل مكمل ف الطريق إللى حينزلك فيه لحد ما الطريق تلاقيه بياخدك شمال بالعافية على طريق عمودى عليك ، برضه تفضل ماشى لحد ما تلاقى كوبرى المطار ماتطلعهوش من قبله كده تاخد يمين لصلاح سالم و تفضل ماسك صلاح سالم لحد ما تلاقى الاستاد الناحية التانية تمشى شوية لحد أول يو ترن تقريبا حتلاقيه قبل كوبرى الفنجرى و و تحضن يمين تلاقى المدرعات على يمينك ، شوف بقى ركنة حلوة من بتوع الاستاد و ألف مبروك

السكة التانية بقى إنك تدخل البلد ، و هنا فى مليون طريق ، بس من وجهة نظرى الأفضى مع إنه الأطول نسبياً هو إنك تاخد الكورنيش لحد رمسيس و تاخد كوبرى أكتوبر و تنزل منزل صلاح سالم و تكمل فيه لحد الاستاد
بس أنا عن تجربة لا أنصحك بهذا الطريق