غسل موتور العربية ورفعها لأول مرة... تجربتى ما ليها وما عليها
اولآ:- أحب أقول لإخوانى هنا فى المنتدى إنى استفدت منهم أعظم إستفادة وربنا يقدرنى وأفيدهم.
ثانيآ:-
بدأ الموضوع كله انى رحت من حوالى 3 أسابيع أظبط زوايا بعدى تغييرى بيض الطرف.. والفنى اللى كان بيظبط قالى انتا يابيه مغسلتش العربية دى من تحت خالص.. صح؟؟
قولتله أيوة دى من ساعة ما جبتها من شهر 5 اللى فات وانا مرفعتهاش خالص... قالى ياريت تبقة تروح تغسلها من تحت وتاخد معاك 2 ليتر جاز وتخلى بتاع المغسلة يرشهم على العفشة من تحت... قولتله ربنا يسهل.
وقد كان .. إمبارح رت جبت اثنين ليتر جاز وطلعت على المغسلة .. فا الفنى بتاع المغسلة قالى طيب الموتور شكله ما اتغسلش خالص.. قولتله انا غسلته مرة واحد بالكيماوى عندكم وبصراحة ولا حسيت انى غسلته.. قالى ولا يهمك انا هغسلهولك... هوا بصراحة قالى الكلمة دى وانا سرحت بالبلاوى اللى كنت بقراها هنا فى المنتدى من غسيل المواتير وصيحات التحذير من غسيل المتور... بس جه فى دماغى كلام محمد ممدوح وهوا بيقول انه أهم حاجة انك تبعد عن الحساسات... فا قلتله طيب خد بالك من الحساسات انا بصراحة قلقان بس عايز أجرب.. لقيته قام راشش الجاز على الموتور وبحرص شديد.. وبعديها قام رفعها وغسلها من تحت ورش الجاز على العفشة من تحت وقام غسلها.. بصراحة العربية بقت زى الفل من تحت.. طيب والموتور..؟ لقيته جايب الفوم اللى بيغسله بيه العربية.. وقام رشه على الموتور.. وجت اللحظة الحاسمة وهوا هيغسلها بالمسدس.. قلته أبوس ايدك براحة.. قالى ياباشا متقلقش.. انا سمعت منه متقلقش دى .. وبدأت أدوخ.... المهم بصراحة كان بيشطف المتور بكل حرص ولما خلص بصيت على الموتور لقيته بقة زى الفل وقالى دور ياباشا.. انا دخلت الصالون وعارف ومتأكد انى هلاقى لمبة السيرفس منورة اول ما اضرب المفتاح فى الكونتكت... ولكن الحمد لله العملية تحت بنجاح.. وكله بقة تمام التمام.
انا كتبت الموضوع دا.. علشان انا عايز أقول للإخوانى هنا فى المنتدى إن مفيش حد بيتعلم غير بالتجربة.. ومن غيرها إستحالة هنتعلم.. أرجوا انى مكنش صدعتكم بكلامى الكتير
أخوكم
م/ أحمد نبيل