لو جاتلك فرصه تعيش بره مصر تروح؟؟؟؟؟؟؟؟؟؟؟؟؟

**ZALABANY** · 03-01-2008 05:02 PM

لو جاتلك فرصه ممتازه انك تطلع بره مصر وتشتغل في اي دوله الخليج أو غيره حتى لو كنت بتقبض مرتب محترم خلينا نقول مثلا 3000 تطلع ولا تفضل في بلدك حتي لو كنت هاتاخد 5 اضعاف مرتبك مش عارف لو الواحد اتعرض عليه حاجه زي دي يمسك في شغله ويفضل في بلده ولا يطلع ويبني نفسه واما يرجع يبقى يحلها الحلال من عنده ده اذا رجع

يرجى الالتزام باماكن فتح المواضيع الاجتماعية بالمنتدي الاجتماعي
الادارة

**araberphilosoph** · 03-01-2008 05:56 PM

يا اخ زلاباني ولو مرتبي في الخارج زي مرتبي في مصر هاطلع بره برده اكيد
الموضوع مش فلوس وبس الموضوع انك بتوسع مداركك وتعرف حاجه جديده بتتضاف لمعارفك وخبراتك
انا دخلي في مصر داخل علي 4000 وبرده عايز اسافر لاسباب كتير اهمها اني اشوف الدنيا اعيش بجد وبعدبن هنرجه هنرجع متخفش
السوال الاهم تروح اي بلد اي بلد ولا في اسثنائات
ده السوال

**Xpert** · 03-01-2008 06:02 PM

بره اكيد .. الانسان بره ليه تمنه .. الانسان هنا حاجه من 2 ... يأما بتداس بالجزم .. يأما اللي بيدوس غيره بالجزم
بدون تعليق

**hero** · 03-01-2008 06:05 PM

يانهار ابيض....
تعيش برة مصر....دة اسمة كلام....
ومصر مين ايلي يتبهدل فيها ....وهاتسيب المكروباصات لمين والمطبات لمين ...

ياباشا لو مرتبي برة اقل من مرتبي في مصر....(بس يعني ماجوعش برة) اكيد ومن غير تفكير هاطلع برة ..وغالبا مش هابقي عايز ارجع غير اجازات...ودة بس علشان اسرتي مش اكتر.....

انا الحمد لله مستوي دخلي في مصر معقول جدااا وسافرت دول كتير بس للاسف بصفة مؤقتة...يعني زيارات عمل... ومن ايلي شفتة برة ..من نظام ونضافة وآدمية في الحياة...اتمنيت من كل قلبي ان اسافر برة مصر....لمدة لا تقل عن 30 سنة...وبعدين افكر....ارجع ولا واموت برة...

**ahmed** · 03-01-2008 06:07 PM

بس للاسف المصرى برة مالوش ثمن و لا هنا له ثمن يبقى ايه الحل؟

**araberphilosoph** · 03-01-2008 06:09 PM

اذيك يا جوو اخبارك ايه مشمتشكش من زمان معلش كنت كمشغول مووت موسم بقه في السياحه سوري يا بوب

**hero** · 03-01-2008 06:14 PM

المشاركة الأصلية كتبت بواسطة ahmed

بس للاسف المصرى برة مالوش ثمن و لا هنا له ثمن يبقى ايه الحل؟

يا جماعه الكلام المصري هو ايلي مسؤل عنة....
يعني انت ايلي بتحدد مستوي المعاملة بتاعتك برة ...وممكن تكون من احسن المستويات ودة بناءا علي الآتي:
1- مهاراتك في تخصصك وشغلك وايلي بيفرض علي ايلي قدامك انة يحترمك وما يفتحش بقة..
2-قبولك بمرتبات مكافئة لمستواك ومستوي مهاراتك وعدم قبول اي شيء يتعرض عليك ...ودة بيعملك قيمة ووزن..

طبعا الكلام دة مش هايبقي شغال مع ناس كتير ....بس برضة انا شفت بنفسي ناس متخصصين في اعمال متفاوتة يعني مش لازم يكونوا دكاترة او مهندسين ....بس المهم انة محترف في شغلة بطريقة تبهر ايلي قدامة...ساعتها صاحب العمل ما يقدرش غير انة يقبل شروطك انت ....وطبعا دة بيكون في حدود متطلبات السوق..

**tutankhamoun** · 03-01-2008 06:15 PM

أنا كنت عايش بره مصر ( أوروبا -- عدة دول أوروبية ) ........... و ندمان إن رجعت و مش قادر أغير حاجة في البلد للأحسن

و كنت نفسي أعمل حاجة في البلد و أغير من حالها للأحسن و لكني أكتشفت إني أسبح ضد التيار و هذا التيار تيار شديد من تيارات المحيط الأطلنطي و يتمثل في الجهل المنتشر و اللامبالاه و الفوضى و أنعدام النظام و انتشار الفساد بين الناس و أيضا فساد الأخلاق
و انعدام وجود خطط مستقبلية للبلد و كل هذه الأشياء تحبط الإنسان
و أكتشفت حاجة إن الفلوس مش كل حاجة ........ يعني الواحد لو عايز يعيش حياة كويسة أي دخل كافي لسد متطلباته سيكون مناسب و ممتاز
يعني أقصد لو أنا مرتبي خارج مصر بيطير معظمه و مش بعرف أحوش منه قوي و لكني أعيش في منظومة محترمة يبقى أحسن لما أكون غني و أعيش في منظومة يملاؤها الفساد و التخلف و الجهل و انعدام النظام

**araberphilosoph** · 03-01-2008 06:21 PM

المشاركة الأصلية كتبت بواسطة tutankhamoun

أنا كنت عايش بره مصر ( أوروبا -- عدة دول أورو
يعني أقصد لو أنا مرتبي خارج مصر بيطير معظمه و مش بعرف أحوش منه قوي و لكني أعيش في منظومة محترمة يبقى أحسن لما أكون غني و أعيش في منظومة يملاؤها الفساد و التخلف و الجهل و انعدام النظام

100% صح هو ده الكلام السليم

**محمد عز** · 03-01-2008 06:27 PM

90% من الاسباب اللى تخلى الواحد يسيب بلده ويروح يشتغل فى بلد تانيه هى الماده الفلوس يعنى
لو انت مرتاح ماديا فى بلدك بلاش تسافر
فى أول الامر بتبقى تستمنى السفر ده باى طريقة ونفسك تسافر النهارده قبل كمان خمس دقايق
وحاسس انك طقهان من بلدك ومن الزحمة
بعد شويه من السقر تبدا تحس بالغربه وبعدك عن اهلك
بعد شويتين بتفقد الاتصال باصحابك وبمعارفك ولما تنزل اجازه تحس انك غريب
بعد كده تعرف ان حد عزيز عليكى اوى مريض والدك او والدتك مثلا او انهم مخبيبن عليك انهم تعبانين وانت مش قادر تنزل تشوفهم وبعد كده تسمع انه حد فيه مات وبرده مش عارف تنزل علشان تحضر جنازته ولما تنزل تلاقى كل حاجة خلصت
لما تحاول ترجع بلدك تلاقيك مش عارف تتقالم مع بلدك وانك خسرت كتير لما سيبتها
الغربه اصعب ما يكون خد نصيحه من واحد مسافر وعلى راى المثل اسئل مجرب ولا تسال دكتور