الستائر الجديدة للاسنر

**إسلام شاهين** · 03-01-2008 10:09 PM

لو فاكرين كنت مركب الستائر اللي هيا بمجرى على الباب فوق وتحت وبتتشد وكان أكثر من واحد قالولي إنها مش حلوه علشان خفيفة ومش مشدودة .

المهم هيثم باشا ( معانا في منتدى المتسوبيشي ) اتصل بيا امبارح وكان قبل كده قالي على نوع ستائر بيركب كبس على الباب على طول وتفتح وتقفل الزجاج عادي المهم قالي إنه شايف واحد مركبهم سأله قاله من التوفيقية ماكدبناش خبر نزلت أنا وهو النهارده وركبناهم بصراحة جامدين جدا عبارة عن فرام بلاستيك مقوى والستارة على نفس رسمة الزجاج وبتتكبس عليه وتفكها عادي برضه هي ثلاث قطع البابين والبربريز الخلفي وآدي صورتها :-

**Nader** · 03-01-2008 10:15 PM

ايوة دي شكلها جامد يا اسلام واحسن من القديمة اللي كانت بتبقى متكرمشة ومش مشدودة، طيب عاوزين تفاصيل اكتر وهل في منها لسيارات اخري غير اللانسر والسعر اية؟ وياريت تبقى تصور السيارة الخلفية.

**أبو عبدالله** · 03-01-2008 10:35 PM

الف مبروك يا اسلام
وخلي بالك هيا دي اللي انا اتلكمت عليها قبل ذلك وكان في احد الاخوه بيسال عليها

وانا شوفتها على باسات ولانسر
وفي ناس قالتلي انها بتتعمل على مقاس العربيه

فمش عارف في حد بيعملها وله هيا بتيجي لكل موديل على حده وبس
وسعرها كام

وشكرا لك

**إسلام شاهين** · 03-01-2008 10:39 PM

الله يخليك يا أبو عبدالله كلك ذوق اللي أعرفه إنهم بتعملوا في إسكندرية والراجل قالي إنه فيه منهم أنواع فعلا لعربيات ثانية بس بصراحة نسيت أسأله إيه هما ، وسعرهم كان 75 جنيه وقالي لو هتاخد كمية يعني ممكن يحسبهم من 60 ل 65 وفعلا أنا سألت عليهم على بتوع الجملة مالقيتهمش خاااااااالص غير هو الراجل ده بس .

بس بصراحة يستاهلوا لأن خامتهم نظيفة قوي وتركيبهم بتعملوه بنفسك .

**mido777** · 04-01-2008 12:05 AM

لو فاكر يا اسلام السروجى اللى انا قولتلك علية فى اسكندرية (اللى عملت عنده الفرش)هو اللى بيعملهم وممكن يتعملولكل انواع العربيات...

والتكلفة تقريبا من 60 - 90 جنيه تقريبا

ولو حد من اسكندرية عايز يعملها ممكن يرتب معايا واروح معاه لأنى اعرفه كويس

**إسلام شاهين** · 04-01-2008 12:13 AM

محمد باشا يبقى أكيد هو ده الراجل فعلا بس هما فعلا حلوييين ويستاهلوا السعر ده لأن الخامة نظيفة وثقيلة وسهلة الفك والتركيب ، ألا صحيح ماعملتهمش عندك ليه ؟؟

وطلب صغير ممكن السروجي حبيبك ده ( بس في أي وقت بدون ما تعطل نفسك ) يفتكس فرش جلد زي بتاعك التحفة ده بس يختارلي لونين رماديات في بعض وتقولي هيعملهم في قد إيه وبالسعر التحفة بتاعك ؟؟
ولو كده بياخد وقت قد إيه وممكن يعمله وأروح أركبه على طول ولا لازم أكون موجود من الأول ؟
بتقل عليك معلش .

**mido777** · 04-01-2008 12:49 AM

المشاركة الأصلية كتبت بواسطة إسلام شاهين

محمد باشا يبقى أكيد هو ده الراجل فعلا بس هما فعلا حلوييين ويستاهلوا السعر ده لأن الخامة نظيفة وثقيلة وسهلة الفك والتركيب ، ألا صحيح ماعملتهمش عندك ليه ؟؟

ناوى ان شاء الله بس الكسل هو اللى معطلنى

وطلب صغير ممكن السروجي حبيبك ده ( بس في أي وقت بدون ما تعطل نفسك ) يفتكس فرش جلد زي بتاعك التحفة ده بس يختارلي لونين رماديات في بعض وتقولي هيعملهم في قد إيه وبالسعر التحفة بتاعك ؟؟
ولو كده بياخد وقت قد إيه وممكن يعمله وأروح أركبه على طول ولا لازم أكون موجود من الأول ؟
بتقل عليك معلش

الكلمة دى زعلتنى

.

بكره ان شاء الله اكون عنده و اقوله على الطلبات دى و ارد عليك

بس غالبا التفصيل حياخد يوم والتركيب يوم ...
بس غالبا حتيجى يوم قبل التركيب علشان تختار الألوان ومش لازم تيجى بالعربية اليوم ده