التيجو عاملة اية معاكم بعد استخدام فترات طويلة ؟

**pro_samir** · 17-03-2010 10:56 PM

المشاركة الأصلية كتبت بواسطة kesmat

ولكن المهم من ذلك هو أن يكون استمرار جوده هذة السيارة على مدار الأستخدام لسنوات وليس لأول سنه أوسنتين .

للأسف دة السؤال اللي محدش هيعرف اجابتة غير بمرور الزمن

شكرا للمعلومات

**amir** · 19-03-2010 12:48 AM

ممم كلام جميل
بس اللي بيفكر في التيريوس علشان العلو عن الارض و المطبات و خلافه
و في نفس الوقت الكاش مش مساعد علي التيريوس
هل احط التيجو في حساباتي؟
و اخبار العفشه و استهلاك البنزين ايه
و مفيش خبر علي 1600 اوتوماتك؟
اصلي راكب اوتوماتك و اكيد التغيير للمانيوال تاني حاجه مش هعملها الا لو ال 2000 سي سي تستاهل ان الواحد يفكر فيها و بالمناسبه ايه اخر الاسعار حاليا؟

**said.d.y** · 19-03-2010 01:35 AM

السلام عليكم ورحمة اللة وبركاتة،
انا معايا التيجو 2000 اتوماتيك منذ1/1/2009 وعامل بيها حوالى 14000كم، وسافرت ورحت وجيت وافتريت وحملت وكبست وطلعت ونزلت، والعربية زى الفل،وبتسحب وثابتة، مفيهاش عيوب الا ال بتظهر نتيجة التقفيل المحلى وبالنسبة لسعرها حكاية، وطبعاً الهيركبها بعد اى عربية عادية هيحس بفرق فى الخشونة وصوت الموتور واستهلاك البنزين ، بس دة طبيعى بالنسبة للاستيل دة من العربيات (suv)،وبمقارنتها بالمثيل(سوزوكى فيترا)ولما بتكون بنفس سعة الموتور والمواصفات - طبعاً السوزوكى كاسم وجودة اعلى لاكن موش بالدرجة اليكون فيها فرق السعر اكتر من 130%
يعنى التيجو ب105 الف تكون السوزوكى ب130-140 بالكتير، لاكن فوق ال210 الف ، موش قوى كدة، التيجو تكسب بصراحة، واى استفسار انا فى الخدمة

**amir** · 19-03-2010 11:35 PM

انا نزلت شوفت التيجو ال 200 سي سي مانيوال بفتحه سقف
العربيه مع اني متحيز ليها من ناحيه السعر
الا اني كشيت منها قوي قوي لما شفتها و قلبت فيها كده علي خفيف
باب الشنطه تقيل بغباء و تقريبا علي مفصله واحده (اللي عرفت اشوفها علشان وضعيه العربيه في المصريه للسيارات كانت صعبه شويه)
طبعا القعده و راحه الكراسي في التنقل داخل البلد و علي طرق السفر مقدرش احكم
مساحه الشنطه كويسه و معقوله
بس لازالت كده التيريوس مش نافعه تفارق خيالي
و سمعت و الله اعلم ان موتور ال 1600 علي التيجو يادوبك ممشيها
طبعا انتو ادري مني
بس لو سعر الاوتوماتك ال 2000 سي سي ينزل شويه
التيريوس بادئه من 116 تقريبا
انا مستحرم علشان اركب عربيه suv اوتوماتك ادفع في التيجو ال 2000 سي سي 100 الف و شويه و اسيب التيريوس
علي فكره دي مناقشه مش هجوم علي التيجو
انا بس كنت مستني شكل داخلي احسن من كده شويه
و مستني ارائكم و ناقشاتكم مع عميق احترامي للصناعه الصينيه المتطوره (اللي ادتنا علي قفانا اللي اخر فرحتنا صناعه استيكه) و لابو الفتوح شخصيا بتميزه و ارتقائه بمستوي العربيات الصينيه اللي بيجيبها

**amir** · 19-03-2010 11:55 PM

المشاركة الأصلية كتبت بواسطة fgfg1975

على فكره المقارنه غير عادله لان التيجو 2000cc اما التيريوس 1500 فقط .... انا فكرت فى البدايه اجيب تيريوس لكن 1500 cc مع اتوماتيك شيى صعب جدا مع تحياتى
م/نبيل

انا معاك في فرق السعه لكن ما بين كلام اصحاب العربيتين وزن التيريوس اخف من التيجو
و الكلام اللي بيتقال ان التيجو ال 1600 ماشيه بالعافبه و من بق واحد صاحبي نقلا عن عربيه صاحبه التيجو ال 1600 مانيوال
معلش متزعلش مني انا بس بسئل بس مش بهاجم التيجو ولا الصيني عموما
انا نفسي اركب عربيه عاليه و اترحم من شرور الطرق في مصر شويه
بس خايف موت ابيع الصني و اركب تيجو 2000 سي سي و ادفع تراخيص اكتر (علشان ابقي راكب اوتوماتك) لأن عربيتي اوتوماتك و ده عالم تاني من الانتخه و الراحه التامه في السواقه خصوصا في الزحمهو ادفع فرق سعر ضخم ما بين ال 1600 مانيوال و ال 2000 سي سي اوتوماتك و بعد كده اندم
اعذرني كمان الفرق السعري ما بين اول فئه من التيريوس و التيجو ال 2000 سي سي اوتوماتك قليل نسبيا
(مش معني كده اني اساس قادر عليه حاليا)
اتمني ان الصوره تكون وضحتلك

**amir** · 20-03-2010 12:03 AM

المشاركة الأصلية كتبت بواسطة fgfg1975

د/امير رجاء مراجعة ملاحظات الاعضاء عن اتزان التيجو الكبير فى السرعات العاليه........
م/نبيل

طيب حاضر
بس العربيات العاليه زي التيريوس و التيجو لهم سمعه وحشه علي السرعات العاليه في حاله انفجار احدي الاطارات لا قدر الله
فممكن اعرف قصدك بالسرعات العايه لحد فين بالظبط
انا اساسا مش من هواه السرعات و اخري لو هاجري يبقي 120 علي طريق القطاميه و مش كل الطريق