الموضوع: تعمل أيه فى الموقف ده!!!

انا عملت حادثه في عند مطعم البرج في السابع واحده ست بتعدي بي ماتريكس التقاطع و انا جاي مش شايفها خالص من العربيات اللي ماشيه في طريقي براحه المهم انا لمحتها على اخر لحظه قبل ما تخبطني فرملت جامد ووقفت المشكله انها كانت جايه ناحيتي بتفادي بلاعة في نص الشارع و مش عارفه تعمل حاجه لانها اتخضت انا لقتها داخله عليه بردو و كانت مركبه دفندرات واللهي تلقائي لقيت نفسي حركت العربيه يمين انا بجد مش عارف ليه عملت كدا يمكن عشان حسيت انها داخله في نص العربيه مش عارف بس الحمدلله الخبطه جت في الكبوت اترفع لفوق و الاكصدام حته منو اتقطت و الفانوس اتكسر هيا بقى جنب العربيه اليمين عندها كلو اتبهدل
نزلت تشتم و تزعق وتقول انتا الغلطان و هتصلح العربيه وي وي وي قولتلها لمي نفسك بلاش غلط انا وقفت في طريقي مش في طريقك وانتي اللي خبطاني عشان تفادي بلاعه
قعدت تاخد نمر كلللل الناس الي شافو الحادثه معرفش ليه المهم كلمت 122 جه امين شرطه مش فاهم حاجه اول كلمه قالهالي انتا مأمن قولتلو اه قالي متقلقش انا هظبطك بس متنسانيش راح عرف اللي حصل و خد الرخص و قال عايزين تعملو ايه انا استغربت يعني دا المفروض يشوف مين الغلطان و يحملو المسؤليه المهم جه جوز الست دي و كان محترم اوي و عرف اللي حصل اتكلم معايا و قالي انتا غلطان و احنا كمان و حصل خير و بلاش محاضر ووجع قلب قولتلو الحمدلله على كل حال ربنا يعوض عليكوا و علينا و روحت اعتذرت لمراتو اني عليت صوتي عليها وهيا كمان وعرفت في الاخر ان امين الشرطه دا مكانش عايز يعمل محضر ويمشي الموضوع ودي لأنوعايز يعملي محضر تاااني خالص وهمي عشان التأمين وياخد 200 جنيه انا نفضتلوا و مشينا و الحمدلله صلحت العربيه و محتجتش للمحضر

إلي أنا أعرفو إن إلبلد مفيهاش الأساسيات بتاعت إلسواقة ، يعني مفيش إشارات ولو فيه محدش بيحترمها، مفيش ستب ساين ، ولا أي حاجة.
اي حد يخبط حد من ورا ، ديه غلطة الورا علطول ، حاجة أوتوماتيك. إنت مفروض تسيب مسافة بينك وبين إلقدامك دة بغض النظر هو وقف ليه وازاي كمان أي حد عند إشارة ال-yield
أو المثلث لازم يستنى ، وأي حادثة تبقى غلطة العندو الإشارة و ده أوتوماتيك بردو .إشارات إلمرور لزم يبقى فيها شاهد معاك أو صورة كاميرا لأن ديه حاجة ممكن يكون الغلط فيها من الطرفين. شاهد المقصود بها عربية تانية كنت موجودة في مكان الحادثة ،مش واحد صاحبك كان قاعد جنبك

دة القانون إل موجود برا.

أنا هاحكي عن الخبطتين اللي العربيه إتخبطتهم لغايت دلوقتي:
كنت جايب العربيه جديد و لسه عامله 4000 كلم. ماشي في صلاح سالم عند سور مجرى العيون باتفسح و ماشي على 20كلم/س على اليمين. لقيت عربيه فيرنا خارجه من الركنه و صاحبها بيستأذنني. أولت لنفسي أنا ماواريش حاجه. خليه يعدي. كان ورايا علربيه كورولا زيرو بأكياسها شافني هديت آم هو مهدي. 100 100 و مافيش أي مشكله. إذ فجاةا نلاقي ميكروباص إلترامكو خيش في الكورولا و طيرها عليا. الكورولا لبست في من ورا و للأسف أنا كنت دايس فرامل. المهم الرفرف الخلفي إتعوج شويه الفانوس إتكسر. حصل خير و أولت أنزل أشوف سواق الميكروباص إنت ال....*.لقيت الكورولا ضاعت من أدام و من ورا. صاحب الكورولا كان راجل بلطجي حبتين و راح يتخانق مع سواق الميكروباص. كان عيل عنده بتاع عشرين سنه. لقينا إبن ال....* عايز يهرب رحنا نوقفه، ضرب صاحب الكورولا بالبوكس و وقعه و كان هيدوسني و هرب. للأسف إحنا خدنا نمرة الميكروباص. أيوه للأسف لأنناروحنا عملنا محضربالحادثه علشان على الأقل السواق الصايع ده مايئذيش حد تاني.
الميكروباص طلع بتاع أمين شرطة و السواق عسكري عنده و ماعندوش رخصة و إتطرمخ عالموضوع بعد ماتمشورت أكتر من مره.
أنا بصراحه لمل بصيت على الكورولا أولت الحمد لله على الخبطه البسيطه اللي عندي.


تاني خبطه، كنت راكن العربيه عند واحد صاحبي، نزلت لقيت الرفرف الأمامي شمال متدغدغ. سألت البواب و عرفت مين اللي خبطها. بصراحه الراجل كان محترم و دفع تمن التصليح (رفرف جديد + دهان) بس أنا اللي إتزليت عند البوهيجي يومين كاملين. أصل أنا نعقد و ماسبش عربيتي لحد.

من الآخر إنت لازم تتصرف حسب اللي تقدر عليه
أنا مقتنع تماما إن من أفسد شيء فعليه إصلاحه، لكن أحيانا زي ما السواق إبن ال....* عمل، ماتعرفش تاخد حاجه. يبقى اللي تقدر تعمله إنت تقول حسبي الله و نعم الوكيل