الحمد لله اشتريت التيدا سيدان اتوماتيك 2010
* الحمد لله اشتريت التيدا سيدان اتوماتيك 2010 الفل اوبشن الاساسيه ب114 الف وبعد الفصال والذى منه وصلنا 112 الف واشتريتها من عند السبع مصر الجديده بالرغم من انى كنت رايح اتفرج واخلص فى الصنى السوبر صالون لانى كان معايا 2006 وعارف الصنى كويس ولكن لما ذهبت وجلست فى التيدا من الداخل وجدت فرق كبير جدا فى جودة التقفيل والخامات ووسع الصالون جميل جدا وعملت تجربة قيادة ونزلت من السياره واشتريتها واستلمت تانى يوم على طول علشان كنت عاوز اللون الاسود وماكنش فيه يومها فى المعرض.
* انا عملت بيها حتى الان 1200 كم فى خلال 7 ايام بجد العربيه ممتازه وصوت الموتور هادىء جدا والعزل عالى وانت جالس فى الداخل لا تسمع شىء فى الخارج تقريبا.
* العفشة ناعمه مع انى كنت مجربها فى الخليج بس لما جربتها فى مصر لقيت الموضوع مختلف تماما فعلا العفشه ناعمه وكويسه.
* وانت جالس فى الصالون لا ترى الكبوت وتعتمد على تقديرك ومعرفتك بالعربيه.
* نيجى بقى لل اى بى اس والفرامل بجد يا جماعه الفرامل شغاله وممتازه جدا جدا جدا انا ركبت سياره بها اى بى اس ولما ضغطت على الفرامل لقيت فيه تكتكه فى الفرامل يعنى تحس برعشه فى الدواسه وانت دايس عليها لما اى بى اس تشتغل ولكن فى التيدا بضغط على الفرامل اكنها عاديه وليست اى بى اس يعنى مفيش حركه ولا تنتيش فى الدواسه والعربيه بتقف بسرعه وتستجيب على اى سرعه.
* انا كان معايا الصنى 2006 بس لما جربت التيدا حسيت انى كنت راكب عربيه تانيه مش يابانى خالص(الصنى) وده مش معناه ان الصنى وحشه ولكن معناه ان التيدا افضل بكتير والصنى افضل من مثيلاتها ايضا.
* الثبات على الطريق كويس انا جبت بيها 160 كم/س وكانت كويسه معايا بس الطريق كان زحمه وكنت بناور بيها وكانت فعلا جيده
فى المجمل يا جماعه العربيه فعلا ممتازه واللى ناوى يشترى يتوكل على الله.
ادعو لى ربنا يسترها معايا احسن عفاريت الاسفلت وشياطين العين والحسد بيرقصوا حولى وربنا بيسترها فى كل مره.