عالمنا الافتراضي

**نور القمر** · 15-03-2010 08:40 PM

جميع الاراء تمثل حقيقة العالم الافتراضي والاختلاف بينها بسبب اختلاف شخصية كل فرد عن الاخر

المشاركة الأصلية كتبت بواسطة yoko

يمكن لإن فرصة إنك تقابلي ناس أكتر في العالم الإفتراضي ويكونوا شبهك في حاجات كتير
والواحد بيكون أسعد لما يتعرف في العالم الحقيقي على الناس في العالم الإفتراضي (مش عارف ليه)
وغالبا مبتلقيش مساعده من العالم الإفتراضي وأنا شايف إن نايل موتورز شاذ في القاعده دي لإن كل الأعضاء خيفين على بعض وبيساعدوا بعض حتى لو مكانوش إتكلموا في أي موضوع تاني غير موضوع طلب المساعده وده الي مخليني متمسك بالمنتدى وبطلت أخش على أي منتدى تاني

فعلا فرصة انك تقابل ناس شبهك في العالم الحقيقي قليلة ولو قابلته على النت بيكون صعب يكون في تواصل حقيقي ملموس لاسباب كتير من ضنمها البعد الجغرافي

**نور القمر** · 15-03-2010 11:54 PM

المشاركة الأصلية كتبت بواسطة zyadahmed

اذا كانت الصداقة قد انتهت من العالم الحقيقى فمن العبث البحث عنها فى عالم افتراضى
صديق العالم الافتراضى قد يصلح ان يكون انيس وجليس وونيس لبعض الوقت ....
ولكن بالطبع لن يكون صديق ورفيق طول الوقت
وهذا لا يقلل من قيمة الصديق الافتراضى فى العالم الافتراضى
ولكن متى تحول الافتراضى الى واقعى فلا تتوقعى منه الكثير فللعالم الافتراضى ظروفه وملابساته ..... وللعالم الحقيقى فروضه ومتطلباته ..

هي فعلا انتهت في العالم الحقيقي
اما العالم الافتراضي فليس اكثر من مُسكن

المشاركة الأصلية كتبت بواسطة Col. Eng. Khaled

مؤيد كلام حضرتك قلبا و قالبا يا باشمهندس

على سبيل المثال ....... سفر زميلنا أحمد عبد المقصود (ربنا يكتب له الخير) بجد مأثر جدا معايا معنويا .

و في ناس لما ألاقيهم مش بيدخلوا المنتدى فترة بقلق و أتصل أتطمن عليهم مش أكتر .

اعتقد كتير مننا مر باحساس الافتقاد لشخص او اشخاص ارتبط بهم في العالم الافتراضي حتى وان كان الارتباط ده مقتصر على صفحات المنتدى
يمكن في حالة حضرتك احساسك بالافتقاد اكبر لان كان في علاقة شخصية بين حضرتك وبشمهندس عبد المقصود
ربنا يوفقه ويوفق الجميع

المشاركة الأصلية كتبت بواسطة mhoss

أظن إننا بنهرب من العالم الحقيقى للعالم الأفتراضى علشان أحنا اللى بنرسم بنفسنا صورة الصديق فى العالم الأفتراضى....
على العكس الصورة بتبقه واقعية و على حقيقتها فى العالم الحقيقى...
علشان كده بنبقى أسعد مع أصدقائنا فى العالم الأفتراضى....

الكلام ده بجد بس إيه الكلام الكبير ده....

هو فعلا كلام كبير بجد

المشاركة الأصلية كتبت بواسطة KSA2011

النفاق
وعدم الصبر
مم
على النت ممكن اتكلم مع حد و هيصدقنى و هصدقه وكل واحد بيحاول يتجمل ادام التانى بنشكل شخصيات بعض وان كان النفاق هو الاساس بس اتطبعنا على بعض او هنستحمل بعض
لكن فى الواقع الغرور و عدم الصبر والتعالى و ظن كل واحد انه افضل من التانى بيمنع حدوث الارتباط ده
كمان الواحد دايما محطوط تحت ضغط فى الواقع لكن على الصفحات الافتراضيه لازم بيكون مزاجه حلو ورايق الى حد ما وده بيسهل حاجات كتير
موضوع خيالى جميل واسلوب جميل

ياه الصور عندك مضلمة اوي
يعني في عالم النت نفاق
وفي العالم الحقيقي غرور وعدم صبروتعالي
معلش انا شايفة انك بتبالغ شوية ممكن على النت نجامل بعض لكن متوصلش لدرجة النفاق وفي العالم الحقيقي مش كل الناس مغرورة وعديمة الصبر

المشاركة الأصلية كتبت بواسطة misoalex

مش مشكله
المهم ان الواحد سعيد
حندور كمان احنا سعداء ليه
.
.

متابع

ربنا يسعدك ديما

المشاركة الأصلية كتبت بواسطة A7MED_PHARMA

أنا بتخيل عالمنا الرقمي إلي إحنا فيه دلوقتي
وكأننا أصحاب قاعدين على قهوة ..كل واحد فينا يرغي في موضوع
والباقيين بيردوا عليه...
وشئ جميل لما تكون عارف الناس إلي بتكلمها..علشان كده كل فترة بتتعمل مقابلة علشان نعرف بعض.
ودي حاجة كويسة جدا
يعني أنا دلوقتي ليا أصحاب محترمين من أماكن كتير في مصر وبره مصر
ودول أصدقاء بتختارهم بعد محادثات طويلة ..بتعرف بيها شخصياتهم
.

.والله أعلم.

هل احساسك بالحرية في التعبير عن اي مشاعر او مواقف اتغير بعد ما اصبحت العلاقات مش مجرد علاقات افتراضية واصبح في معرفة شخصية !!!!!
اعتقد الاجابة بنعم

المشاركة الأصلية كتبت بواسطة aif

اعتقد ان اسباب اللجوء للعالم الافتراضي كتير ... منها
- صعوبة القدرة على التواصل في العالم الحقيقي .... محدش بيسمع حد ومحدش بيثق في حد
- كتير من نجوم النت ( اكيد مش كلهم طبعا ) بيبقوا اصلا غير اجتماعيين وبيبقى صعب عليهم تكوين الصداقات في العالم الحقيقي
- المميزات الموجودة في النت مستحيل وجودها في الواقع .... انت بتعرف الناس من كتابتهم وفكرهم .... من غير اي تأثير للمظهر والوظيفة واللون والوضع المالي والمسافة والعمر ..... يعني بتخاطب الفكر المطلق ... وده مستحيل في الواقع
- واخيرا كل واحد بيبقى راسم صورة كلاسيكية لصديق النت ..... وممكن لما يقلبلة الصورة تتغير للأسف

تصدق عندك حق في كل كلمة يا حاج احمد وخصوصا نقطة ان نجوم النت ممكن كتير مش سهل عليهم تكوين صداقات في الحقيقة بس كونهم غير اجتماعيين بطبعهم مش السبب الوحيد
ممكن الظروف المحيطة ساهمت بشكل كبير على العزلة عن العالم الحقيقي زي عادات وتقاليد بعض المناطق او اسلوب الاسرة في التربية على الانعزال

المشاركة الأصلية كتبت بواسطة mahora

تأملات عميقة يا نور...... العالم الافتراضى يحقق للناس اشباعا حاليا اكثر من الواقع بكتير..... و هى دى المشكلة الحقيقية للناس حاليا..... الفراغ االذى يحتاج الى اشباع..... الانسان جوعان الى من يسمعه.... الى من يفهمه..... الى من يهتم به.....فى العالم الحقيقى مفيش حد فاضى لحد..... فى حين من يهرب الى العالم الافتراضى ليجد من يسمعه او يتفاعل معه مؤكد سيجد...... و هذا ميزة اخرى للعالم الافتراضى...... هو الحجم الاكبر فى التواصل..... لان دائرة التواصل فى العالم الواقعى اضيق بكتير و تقتصر على افراد العائلة و زملاء الشغل فى حين التواصل الافتراضى لا حدود له.... خاصية الحياد ايضا مهمة لان العالم الافتراضى يقبل الانسان بدون شروط فى حين العالم الواقعى يفرض قيود اجماعية و اقتصادية و سياسية و دينية.....

المشكلة الحقيقية هى من ليس لهم اساس داخلى صلب يحميهم من الانجراف مع العالم الافتراضى.... و دى مشكلة صغار السن و الخبرة.....

سعيدة بمرورك بموضوعي يا ماهر
ياترى هو فعلا اشباع ولا مٌسكن بياخد وقته لفترة وينتهي مفعولة !
هل فعلا اللي بيسمعني على النت بيفهمني ويهتم !
يعني لو بحكي مشكلة لشخص في الحقيقة مجرد نظرة لملامحي هايقدر يحدد اد ايه متضايقة او مكتئبة او المشكلة تافهة بالنسبة لي
بس عارف بردو من رأيي ان اصدقاء العالم الافتراضي افضل لان اللي بيشاركني همومي قبل فرحي مش مضطر يشاركني انما بيشاركني لانه عايز يشارك
لكن في الواقع ممكن في كتير من الاوقات مشاركته ليا في نوع من الجمايل او التزين الاجتماعي
انا حاسة ان افكاري ملخبطة

**Karim_Monir** · 16-03-2010 12:12 AM

عارفة يا نور انتي حواليكي ناس قد ايه
فرصتك في التعرف على ناس جديدة قد ايه
يا دوب
نطاق عملك
لو عندك وقت في القهوة
لو في ملتقى ثقافي وده بقي معدوم حاليا
في الندي ومبقاش في وقت
جيران وبقت علاقات محدودة
اقارب وبقو قلتهم احسن

لكن انتي عارفة فرصتك على مجتمع زي نايل موتورز قد ايه
65 الف عضو
نقول منهم 25 الف بيقرو فقط
نقول منهم 15 فعالين
نقول منهم 5 الالاف بيدخلو مكان زي الاجتماعي وان كان اكتر
نقول منهم 500 عارفين بعض بالاسماء والافكار والاتجاهات
قوليللي انتي فرصتك في عالم الواقع تتكلمي مع 500 واحد فين
بلاش 500 نقول 50 واحد تبقي عارفاهم وعارفينك بافكارك وميولك واتجاهاتك واللي يزعلك واللي يفرحك وياركوكي فيها ولو بكلام جبر خواطر
انتي عارفة انا بقي ليا كام صديق من المجتمع الافتراضي
عارفة ان قائمة اسماء الموبايل من نايل موتورز فقط اكثر من 500 اسم اكثر من نصفهم ادين لهم باعتزاز وتقدير واكثر من ربعهم تزيد الدرجة لاكثر من المعزة الى المودة
واكثر من 50 فرد منهم اصدقاء مقريبن
انا في حياتي اللي قبل نايل موتورز ماكنش ليا 3 اصدقاء على بعض مش 50 فرد اهمهم ويهموني
عارفة عالمنا الافتراضي ليه جميل
مستحيل انك تلمي العدد ده بتون ميوله وافكاره واتجاهاته في اي مكان في اي وقت
انتي عارفة لو نازل اقابل واحد صاحبي لازم اغير هدومي واحلق دقني واستعد وادور عربيتي واروح مشوار واتكلف معنويا وماديا ايا كانت التكلفة ولو بوقت ضائع
عارفة هنا الواحد ممكن يقعد مع اصحابة 10 دقائق ويمشي يعمل شوية شغل ويرجعلهم تاني

باختصار عشان حاسس اني طولت
كاني بقرأ قصة او كتاب وعشت الرواية مع الابطال وحاولت اني احول ابطل الورق دول الي حقيقة ملموسة بميولهم وافكارهم وبقوا اصدقائى ونجحــــــــــــت
مستوعبة فرحة تحويل اشخاص على ورق او شاشة كمبيوتر الى حقيقة ملموسة
تقدري تقوليلي انا فرصة اني اقابل واحد زي العميد جمال ولا استاذ احمد ابراهيم ولا شنوري ولا غازي ولا شاركي ولا انتي شخصيا في الواقع قد ايه
تقريبا لن تزيد عن 1% ولو حصل مش هايكون كافي للتعرف والتقرب بهذا الشكل

اذن فليحيا الواقع الافتراضي الذي تحول الى حقيقة ملموسة في نايل موتورز وغيرها من الاماكن الهادفة الصادقة

عذرا للاطالة

**KSA2011** · 16-03-2010 12:48 AM

هى مظلمه فعلا عندك حق وبجد انا ماخدتش بالى من ردى الا لما حضرتك قلتى كده بس بجد هى دى الحقيقه
عالم النت انا قصدت منه النفاق بس نفاق ايجابى زى ما قلت انه بنتكيف على بعض يعنى كل واحد بيرضى بالتانى
زى اتفاق انه انا بحب حاجه وحضرتك مش بتحبيها مثلا حضرتك ممكن تقولى انك بتحبيها برضه وبكده يبقى الاتفاق ما بينا اننا الاتنين بنحب الحاجه دى تقريب وجهات نظر بطريقه اسرع واسهل
انا بصراحه حتى هذه اللحظه ذكرياتى على النت كانت ممكن تبقى جميله جداا بس للاسف حبيت على النت مره و ده الى دمرلى ذكريات جميله و ارتباطات بناس جميله الحب ده كان سبب انى ابعد عن ناس كتير
كمان انا بطبعى خجول جداا ومش بحب الظهور
عجبنى جو الالفه والتميز فى نايل موتور
الناس هنا مصريين وجدعان واولاد ناس متعلمين ومثقفين ورجاله برضه
يعنى التعامل مع الرجاله على النت وفى المنتديات صعب شوى الا منتدانا
كلام كريم باشا جميل جداا و لخص كلامنا كله بالمثال حبيت رده جداا
بس ما قلتليش بقى افكارك ملخبطه ليه ؟ وايه الى خلا حضرتك تفكرى فى الموضوع ده واضح انه فيه سبب !!

**ghada_zaky** · 16-03-2010 12:49 AM

نور بهنيكى على موضوعك
دايما اختيارتك موفقة
كريم اهنيك كمان على رايك

**pro_samir** · 16-03-2010 01:02 AM

من ساعة ما الموضوع اتفتح وانا عايز اكتب رد ، بس من كتر اللي عايز اقولة مش عارف اكتب ولا حاجة

كفاية اقول انة بيبقي شعور رائع لما تقابل ناس أول مرة تشوفهم لكن عارفهم وعارف دماغ كل واحد وبتتكلمو كأنكم تعرفو بعض من عشر سنين

**A_H_M_A_D** · 16-03-2010 08:08 AM

ممكن فعلا يكون العالم الإفتراضي ده فرصة نحقق فيها صداقات و معارف مش عارفين أو مش لاقيين وقت إننا نحققها في عالمنا الواقعي

وبالتالي هي وسيلة سهلة و مضمونة لتغيير مود الواقع الممل في كتير من الأحيان

**بحري** · 16-03-2010 09:54 AM

- الإنسان بطبعه يحب الخيال مهما كان واقعيا صارما، من بداية نشأته وهو طفل بدأ حياته متخيلا، وكلما كبر كلما ازدادت عليه ضغوط الحياة وطحنته وضيقت مساحة الخيال، لذا قديما كلما كان الشخص أوسع خيالا وأرق مشاعرا كلما كانت محبته للراديو أكثر من التلفاز، وحاليا أصبحت الانترنت هي لكل المضغوطين والمطحونين نفسيا

- الإنترنت أصبحت نمط حياة وأداة أساسية للتعلم والكسب والتواصل الأساسي (لا أتكلم عن محاولة اكتساب أصدقاء الآن) مما يعني أن مستخدمي العالم الافتراضي والمنغمسين فيه لم يصبحوا فقط من المحبطين والفاشلين اجتماعيا أو عاطفيا، بل أضيفت شرائج جديدة أعطت للتفاعل على الإنترنت صبغة جديدة (نايل موتورز نموذجا)

- يبقى أنه حتى هؤلاء الناجحين عندهم بعض جوانب الخلل بطبيعة الحال وأتاحت لهم الإنترنت فرصة لتصحيح هذا الخلل ولتحقيق بعض المتعة ولو على هامش حياتهم ولا أظن أنه بالنسبة لهذه الفئة يمكن أن يتجاوز الأمر مقدار الهامش لأن تجاوزه يدخل الإنسان في دائرة الانعزال والفشل الاجتماعي الحقيقي ولعل هذا يفسر الصراع الداخلي الموجود عند الكثيرين من التردد بين الانغماس في التواصل الاجتماعي عبر الانترنت وتركه تماما وستكون هذه الفئة غالبا من هذا النوع الناجح المتحقق ذاتيا القادر على التواصل اجتماعيا وفتحت له النت آفاقا جديدة ولكنه يخشى من تحول الأمر إلى قيد وإدمان يعزل الإنسان عن حياته الحقيقية الصحية اجتماعيا

لم أتكلم عن الفئات الأخرى فللحديث بقية إن شاء الله

-

الموضوع: عالمنا الافتراضي

LinkBack

أدوات الموضوع

عرض

-

-

-

المواضيع المتشابهه

العمر الافتراضي

العمر الافتراضي للماروتي

العمر الافتراضي للمحرك

عمر الماروتي الافتراضي

عمر الكمبوريسور الافتراضي

الكلمات الدلالية لهذا الموضوع

المفضلات

المفضلات

ضوابط المشاركة