الموضوع: حادث محمد مدوح وما بين السطور

بص يا كريم... انا لا حقولك دى فكرة هايلة ولا الكلام دة... انا حضربلك مثال عملى على نتيجة اللى انت بتحاول تعملة

شوفت فى وقت قليل قد ايه كنتم كلكم معايا ساعة الحادث؟
شوفت كان فيه كام واحد معايا و انا رايح القسم منكم؟
شوفت كم المشاركات اللى اضافت فى موضوع اسلام اللى بحصوص الحادث بتاعى؟
و مش ححكيلك على كم التليفونات اللى جتلى من ناس بتتطمن عليا

كل الناس دى انا عمرى مشوفتهم وجها لوجة... و لا اتكلمنا اكتر من مكالمتين تلاتة فى التليفون... انت نفسك مكنتش كلمتنى فى حياتك اللا قبل الحادثة ب كام ساعة لما كنت فى التوفيقيه لكن عشان الواحد دايما بيعمل خير و يساعد الناس و يقف جنب المحتاج لحد ما حاجتة تقدى ربنا بيكرمة و ساعة الشدة بتلاقى الف صديق يقفوا جنبك... دا لانك قدمت السبت من غير ما تفكر حتاخد ايه الحد... فا ربنا بيديك و يساعدك من وسع

ناس كتير قالتى ايه اللى بيعود عليك كل يوم تخش على النت و تكتب للناس الف سطر و تشرح و توضح و تفهم... كل دة تعب بدون داعى و كنت بجاوب: الدنيا سلف و دين... و يوم الجمعة كان يوم رد الدين و الحمد لله ربنا كرمنى بيكم و خرجت من محنتى على خير

اللى انت بتعملة دة يا كريم عمل خير لصالح ناس غرب عنك بدافع مساعدة الناس لا اقل و لا اكتر و انت مش مجبر عليه... و بما ان الدنيا سلف و دين ربنا حيكتبلك كل دة فى ميزان حسناتك و لا قدر الله لا قدر الله لو وقعت فى ديقة حتلاقى الخير دة اتردلك اضعاف اضعاف فوق ما تتخيل و من حيث لا تدرى

ربنا يباركلك يا كريم و يجعلها فى ميزان حسناتك ان شاء الله

MMamdouh